କନକ ବ୍ୟୁରୋ : ବଡ ରାଜନୀତି ଦେଖିବ ଟ୍ୱିନସିଟି । ଘରେ ଘରେ ଗ୍ୟାସ୍ ପହଂଚାଇବାକୁ ଭୁବନେଶ୍ୱରରେ ଶୁକ୍ରବାର ଆରମ୍ଭ ହେବାକୁ ଯାଉଛି କେନ୍ଦ୍ର ସରକରାଙ୍କ ନୁଆ ଯୋଜନା । ଆଉ ସେପଟେ କଟକରେ ରାଜ୍ୟ ସରକାରଙ୍କର ଜଳ ଯୋଗାଣ ପ୍ରକଳ୍ପ କାର୍ଯ୍ୟକ୍ରମ । ଘରକୁ ପାଣି ଆଉ ଗ୍ୟାସ୍ ପହଂଚାଇବା ମାଧ୍ୟମରେ ସହରବାସୀଙ୍କର ଭୋଟବ୍ୟାଙ୍କ ହାତେଇବାକୁ ବଡ ଧରଣର ଉଦ୍ୟମ । ପ୍ରଧାନମନ୍ତ୍ରୀ ଉର୍ଜ୍ଜା ଗଙ୍ଗା ଯୋଜନା ଜରିଆରେ ବିଜେପି ସହରାଂଚଳରେ ପ୍ରଭାବ ବିସ୍ତାର କରିବାକୁ ଚିନ୍ତା କରିଥିବା ବେଳେ ବିଜେଡି ଦେଇଛି ବଡ ଧରଣର ଚେକ୍ ।
Kanak News is now on WhatsApp
Join and get latest news updates delivered to you via WhatsApp
ଶୁକ୍ରବାର ମୁଖ୍ୟମନ୍ତ୍ରୀ କଟକରେ ୧୦୧ଟି ସହରାଂଚଳ ପାଇଁ ୭୮୩ କୋଟି ଟଙ୍କା ମୂଲ୍ୟର ୫୫୫ଟି ନୂତନ ଜଳ ଯୋଗାଣ ପ୍ରକଳ୍ପର ଶିଳାନ୍ୟାସ କରିବେ । ସେହିପରି ୭୪ଟି ସହରାଂଚଳରେ ୧୫୭ କୋଟି ବ୍ୟୟରେ ନିର୍ମିତ ୧୮୨ଟି ଜଳ ଯୋଗାଣ ପ୍ରକଳ୍ପ ଓ ୬ଟି ଜଳ ପରିକ୍ଷାଗାରର ଲୋକାର୍ପଣ କରିବେ ନବୀନ । ସହରରେ ସମସ୍ତଙ୍କ ନିକଟରେ ବିଶୁଦ୍ଧ ପାନୀୟ ଜଳ ଯୋଗାଣ ଲକ୍ଷରେ ଏହା ପଦକ୍ଷେପ ବୋଲି ଦଳ କହିଛି ।
ଅନ୍ୟପଟେ ରାଜଧାନୀରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଧାନମନ୍ତ୍ରୀ ଉର୍ଜ୍ଜା ଗଙ୍ଗା ଜରିଆରେ ଘରେ ଘରେ ଗ୍ୟାସ୍ ପହାଂଚାଇବା ଯୋଜନାକୁ ଉଦଘାଟନ କରିବେ । ଭୁବନେଶ୍ୱରର ନାଲକୋ ନଗରର ୨୫୫ ଘରକୁ ପ୍ରାଥମିକ ପର୍ଯ୍ୟାୟରେ ସଂଯୋଗ ମିଳିବ । ରାଜ୍ୟର ୧୩ଟି ଜିଲ୍ଲାରେ ୭୬୯ କିମି ଗ୍ୟାସ୍ ଲାଇନ୍ ବିଛାଇବାକୁ ୪ ହଜାର କୋଟି ଟଙ୍କା ଖର୍ଚ୍ଚ ହେଉଛି ।
ନିର୍ବାଚନର ଅବଧି ନିକଟତର ହେଉଥିବା ବେଳେ ଦୁଇ ପ୍ରମୁଖ ରାଜନୈତିକ ଦଳ ପରସ୍ପରକୁ ମାତ୍ ଦେବାକୁ ନୂଆ ନୂଆ ରଣନୀତି ବାହାର କରୁଛନ୍ତି । ପ୍ରତି ଘରେ ଗ୍ୟାସ୍ ଯେମିତି ଆବଶ୍ୟକ, ସହରାଂଚଳରେ ବିଶୁଦ୍ଧ ପାନୀୟ ଜଳ ମଧ୍ୟ ଦରକାର । ଯାହାକୁ ନେଇ ଉଭୟ ବିଜେଡି ଓ ବିଜେପି ଗୋଟିଚାଳନା କରିଛନ୍ତି । ଗାଁ ଭୋଟରେ ବିଜେଡି ନିଜକୁ ଅନୁଶୀଳନ କରିବା ପରେ ଏବେ ସହରୀ ଭୋଟକୁ ନିଜ ଅକ୍ତିଆରରେ ରଖିବାକୁ ଅଂଟା ଭିଡିଛି । ରାଜଧାନୀରେ ଧର୍ମେନ୍ଦ୍ର ଆଉ କଟକରେ ନବୀନ ଆରମ୍ଭ କରିବାକୁ ଥିବା ଏହି ଯୋଜନା କେତେଦୁର ଲୋକାଭିମୁଖୀ ହେଉଛି ଓ କାହାର ଭୋଟବ୍ୟାଙ୍କକୁ ବଜାୟ ରହିପାରୁଛି, ତା ଉପରେ ନଜର ।