ଧର୍ମଶାଳା ନେଇ ଛାତି ଧଡ଼ଧଡ଼ ! ପ୍ରାର୍ଥୀ ଚୟନ ନେଇ ଦ୍ୱନ୍ଦରେ ତିନି ଦଳ, କାହାକୁ ବାଛିବେ ଦଳୀୟ ସୁପ୍ରିମୋ ।
ଅଣକଂଗ୍ରେସ ଦୁର୍ଗ କୁହାଯାଉଥିବା ଧର୍ମଶାଳାରେ ସାଙ୍ଗଠନିକ ଦୃଷ୍ଟିରୁ ବିଜେଡି ଆଗୁଆଥିବାବେଳେ କାହାକୁ କେଉଁ ଦଳରୁ ଟିକେଟ୍ ମିଳିବ ତାକୁ ହିଁ ସମସ୍ତଙ୍କର ଅପେକ୍ଷା ।
କନକ ବ୍ୟୁରୋ: ଆଗାମୀ ନିର୍ବାଚନ ପାଇଁ ଯାଜପୁର ଜିଲ୍ଲା ଧର୍ମଶାଳା ନିର୍ବାଚନ ମଣ୍ଡଳୀର ରାଜନୈତିକ ବାତାବରଣ ଏବେ ଚଳଚଞ୍ଚଳ । କିଏ ପାଇବ ଟିକେଟ୍ ? କାହା ମୁଣ୍ଡରେ ପିନ୍ଧାହେବ ଶିରିପା । ଏବେଠୁ ଆରମ୍ଭ ହେଲାଣି କସରତ । କିଏ ପଦଯାତ୍ରା କରି ଦଳୀୟ ସଫଳତା ପ୍ରଚାର କରୁଛି ତ ଆଉ କିଏ ବିଭିନ୍ନ ପ୍ରସଙ୍ଗକୁ ନେଇ ସରକାରୀ ଦଳକୁ ଘେରିବାକୁ ଗୋଟିଚାଳନା କରୁଥିବା ଦେଖାବାକୁ ମିଳିଛି । ଧର୍ମଶାଳା ନିର୍ବାଚନ ମଣ୍ଡଳୀ ଅଣକଂଗ୍ରେସ ଦୁର୍ଗଭାବେ ଦୀର୍ଘ ୨୨ ବର୍ଷ ହେବ ରହିଥିବା ବେଳେ ରାଜ୍ୟ ରାଜନୀତିରେ ମଧ୍ୟ ବେଶ ପ୍ରଭାବ ବିସ୍ତାର କରିପାରିଥିଲା । କିନ୍ତୁ ଏହାରି ମଧ୍ୟରେ ସବୁ ଗଣିତ ପରିବର୍ତ୍ତନ ହୋଇଯାଇଛି ଆଉ ଆଗାମୀ ନିର୍ବାଚନରେ ବାଜିମାତ୍ କରିବାକୁ ରଣନୀତି ପ୍ରସ୍ତୁତ କରୁଛନ୍ତି ଉଭୟ ଶାସକ ଓ ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
ସାଧାରଣ ନିର୍ବାଚନ ଆଉ ଅଳ୍ପଦିନ ବାକିଥିବାବେଳେ କାହାକୁ କେଉଁ ଦଳରୁ ଟିକେଟ ମିଳିବ ସେନେଇ କଳ୍ପନା ଜଳ୍ପନା ଲାଗି ରହିଛି । ପ୍ରଥମେ ଶାସକ ବିଜେଡିକୁ ବିଚାରକୁ ନେଲେ ଏବେ ଧର୍ମଶାଳା ବିଧାନସଭା କ୍ଷେତ୍ରକୁ ପ୍ରତିନିଧିତ୍ୱ କରୁଛନ୍ତି ସ୍ୱର୍ଗତ ରାଜ୍ୟସଭା ସାଂସଦ କଳ୍ପତରୁ ବଳବନ୍ତରାୟଙ୍କ ପୁତ୍ର ପ୍ରଣବ ପ୍ରକାଶ ବଳବନ୍ତରାୟ । ଧର୍ମଶାଳା ବ୍ଲକରେ ନିଜ ଭାଇ ପ୍ରଭାତ ବଳବନ୍ତରାୟ ଓ ରସୁଲପୁର ବ୍ଲକରେ ନିଜର ଅନୁଗତ ସାରଥୀ ଜେନାଙ୍କୁ ଅଧ୍ୟକ୍ଷ ପଦରେ ବସାଇ ନିର୍ବାଚନ ମଣ୍ଡଳୀକୁ କବଜାରେ ରଖିଛନ୍ତି ପ୍ରଣବ । ତେଣୁ ଆଗାମୀ ନିର୍ବାଚନରେ ନିଜର ରାଜନୈତିକ ଅଭିଜ୍ଞତାକୁ ଆଧାର କରି ଧର୍ମଶାଳାରେ ବିଜେଡି ଟିକେଟ୍ ହାତେଇବା ପାଇଁ ଉଦ୍ୟମ ଚଳାଇଛନ୍ତି । ଏକଦା ରାଜ୍ୟ ବିଜେଡି ରାଜନୀତିର ହେଭିୱେଟ୍ କଳ୍ପତରୁଙ୍କ ଦେହାନ୍ତ ପରେ ଦଳ ପ୍ରଣବଙ୍କୁ ସାଙ୍ଗଠନିକ ଦାୟିତ୍ୱ ଦେଇ ଦଳରେ ତାଙ୍କର ଗୁରୁତ୍ୱଦେଇ ପ୍ରକାଶ କରିଛି ।
ଅନ୍ୟପଟେ ପ୍ରଣବଙ୍କ ବ୍ୟତୀତ ବିଜେଡି ଟିକେଟ୍ ପାଇବାକୁ ଆଶବାଦୀ ଅଛନ୍ତି ଯାଜପୁର ଜିଲ୍ଲା ପରିଷଦ ଅଧ୍ୟକ୍ଷ ଥିବା ନରେଶ ଚନ୍ଦ୍ର ମହାନ୍ତି । ସ୍ୱର୍ଗତ ବାଙ୍କବିହାରୀ ଦାସଙ୍କ ଠାରୁ ରାଜନୀତି କ୍ୟାରିୟର ଆରମ୍ଭ କରିଥିବା ନରେଶ କଳ୍ପତରୁଙ୍କ ବିଶ୍ୱାସଭାଜନ ହୋଇ ସମିତିସଭ୍ୟ, ବ୍ଲକ ଅଧ୍ୟକ୍ଷ ଓ ପରେ ଜିଲ୍ଲା ପରିଷଦ ଅଧ୍ୟକ୍ଷ ହୋଇ ଦଳରେ ନିଜର ସ୍ଥିତି ଜାହିର କରିବାରେ ସକ୍ଷମ ହୋଇଛନ୍ତି । ତେବେ ଟିକେଟ୍ ପାଇଁ ଆଶାବାଦୀ ଥିବା ଏହି ଦୁଇ ନେତା ଚତୁରତାର ନିଷ୍ପତି ଦଳର ସୁପ୍ରିମୋଙ୍କ ହାତରେ ରହିଛି । ତେବେ ତୃତୀୟ ମହଲା ସହ ସିଧାସଳଖ ସମ୍ପର୍କ ରଖୁଥିବା ଯାଜପୁର ବିଧାୟକ ବବିଙ୍କର ନରେଶଙ୍କ ପଛରେ ସମର୍ଥନ ଥିବା ଚର୍ଚ୍ଚା ହେଉଛି ।
ସେପଟେ ଧର୍ମଶାଳା ନିର୍ବାଚନ ମଣ୍ଡଳୀରେ ବିଜେପିରୁ ଏଥର ୩ଜଣ ଟିକେଟ୍ ଆଶାୟୀ ଥିବା ବେଳେ ଦଳୀୟ ସଙ୍ଗଠନ ରମେଶ ପରିଡ଼ାଙ୍କ ହାତରେ ରହିଛି । କଳ୍ପତରୁଙ୍କ ଏକାନ୍ତ ଅନୁଗତ ଥାଇ ବ୍ଲକ ଅଧ୍ୟକ୍ଷ ପଦ ହାତେଇଥିବା ରମେଶ ଲଗାତାର ତିନିଥର ବିଜେପି ଟିକେଟରେ ଦୁଇଥର କଳ୍ପତରୁ ଓ ଥରେ ପ୍ରଣବଙ୍କ ବିପକ୍ଷରେ ପ୍ରତିଦ୍ୱନ୍ଦିତା କରିଛନ୍ତି । ତେବେ ଗତ ପଞ୍ଚାୟତ ନିର୍ବାଚନରେ ରମେଶଙ୍କ ନେତୃତ୍ୱରେ ଧର୍ମଶାଳାରେ ବିଜେପି ଗୋଟିଏ ଜିଲ୍ଲାପରିଷଦ ଆସନ ହାତେଇଥିବାବେଳେ ଦଳକୁ ୫୫ ହଜାରରୁ ଅଧିକ ଭୋଟ୍ ମିଳିବା ରମେଶଙ୍କ ଗୁରୁତ୍ୱ ଦଳରେ ବଢ଼ାଇଦେଇଛି । ସେହିପରି ବିଜେଡି ବିପକ୍ଷରେ ଧର୍ମଶାଳା ବ୍ଲକର ସିନ୍ଦୁରିଆ ପଞ୍ଚାୟତରୁ ସମିତିସଭ୍ୟ ଭାବେ ନିଜ ପତ୍ନୀଙ୍କୁ ଜିତାଇଥିବା ଜିଲ୍ଲା ବିଜେପିର ସାଧାରଣ ସମ୍ପାଦକ ସବେଶ୍ୱର ବେହୁରା ମଧ୍ୟ ବିଜେପି ଟିକେଟ୍ ପାଇଁ ଆଶାୟୀ ରହିଛନ୍ତି । ଏହି ଦୁଇ ଜଣଙ୍କ ବ୍ୟତୀତ ଧର୍ମଶାଳା ରାଜନୀତିରେ ସମ୍ପୂର୍ଣ୍ଣ ମୁହଁ ରାଣୀ ଅପର୍ଣାଧୀର ସିଂ ରାଜ୍ୟ ବିଜେପିର କାର୍ଯ୍ୟକାରିଣୀ ସଦସ୍ୟାଥିବାରୁ ସେ ମଧ୍ୟ ନଜସ୍ୱ ଉଦ୍ୟମରେ ସାଂଗଠନିକ ଗଢ଼ି ଟିକେଟ୍ ହାତେଇବାକୁ ଚେଷ୍ଟା ଚଳାଇଛନ୍ତି ।
ବିଜେଡି ଓ ବିଜେପି ବାଦ୍ କଂଗ୍ରେସ ମଧ୍ୟ ଏଥର କମାଲ କରିବାକୁ ଯୋଜନା କରୁଛି । ବ୍ଲକ ପଦ ହାତେଇଥିବା କଂଗ୍ରେସ ନେତା କିଷାନ ପଣ୍ଡା ଏଥର ଦଳୀୟ ଟିକେଟ୍ ପାଇବା ପାଇଁ ଆଶବାଦୀ ଅଛନ୍ତି । ସେହିପରି ଯାଜପୁର ଜିଲ୍ଲା ଧର୍ମଶାଳା ରାଜନୀତିରେ ସଂଜୟ ରାୟ ସମ୍ପୂର୍ଣ୍ଣ ନୂଆ ଚେହେରା ହୋଇଥିଲେ ବି ସଂଜୟ ଏବେ ଜିଲ୍ଲା କଂଗ୍ରେସ ଓବିସି ସେଲର ସଭାପତି ଅଛନ୍ତି । ଛାତ୍ରବସ୍ଥାରୁ କଂଗ୍ରେସର ନୀତି ଆଦର୍ଶରେ ବିଶ୍ୱାସ ରଖୁଥିବାରୁ ତାଙ୍କୁ ଏଥର କଂଗ୍ରେସ ଟିକେଟରେ ଦଳ ମଙ୍ଗଧରି ରାଜନୀତିକୁ ଓହ୍ଲାଇବେ ବୋଲି ଆଶାରଖି ସଙ୍ଗଠନ ଚଳାଇଛନ୍ତି । ଏମାନଙ୍କ ବ୍ୟତୀତ ରାଜ୍ୟ ଯୁବ କଂଗ୍ରେସର ମୁଖପାତ୍ର ମାନସ ରଞ୍ଜନ କର, ଶ୍ରୀକାନ୍ତ ସାହୁଙ୍କ ଭଳି କଂଗ୍ରେସ ଟିକେଟ ପାଇଁ ମନବଳାଇଛନ୍ତି । ତେବେ ଅଣକଂଗ୍ରେସ ଦୁର୍ଗ କୁହାଯାଉଥିବା ଧର୍ମଶାଳାରେ ସାଙ୍ଗଠନିକ ଦୃଷ୍ଟିରୁ ବିଜେଡି ଆଗୁଆଥିବାବେଳେ କାହାକୁ କେଉଁ ଦଳରୁ ଟିକେଟ୍ ମିଳିବ ତାକୁ ହିଁ ସମସ୍ତଙ୍କର ଅପେକ୍ଷା ।