ଚାଷୀଙ୍କ ଉପରେ ବିମୁଦ୍ରାକରଣର ପ୍ରଭାବ : ରାଜ୍ୟରେ ଚିନ୍ତା ବଢାଇଲା ଦୁଇଟି ଘଟଣା
କନକ ବ୍ୟୁରୋ : ବିମୁଦ୍ରାକରଣ ପରେ ରାଜ୍ୟରେ ବ୍ୟଥିତ କଲାଭଳି ଯେଉଁ ଦୁଇଟି ଘଟଣା ସାମ୍ନାକୁ ଆସିଛି, ତାହା ସମସ୍ତଙ୍କର ଚିନ୍ତା ବଢାଇ ଦେଇଛି । ଦୁଇଟି ଯାକ ଘଟଣା ରାଜ୍ୟର ଚାଷୀମାନଙ୍କ ଦୁର୍ଦ୍ଦଶା ବୟାନ କରୁଛି । ଦିଲ୍ଲୀର ପୁରୁଣା ନୋଟ ଅଚଳ ନିଷ୍ପତି ବିଶେଷ ଭାବେ ପ୍ରଭାବିତ କରିଛି ପଲ୍ଲୀକୁ । ବରଗଡ ଜିଲ୍ଲାରେ ରାସ୍ତାରେ ଫୋପଡା ହେଉଛି କ୍ୱିଂଟାଲ କ୍ୱିଂଟାଲ ଟମାଟୋ । ୧ ଟଙ୍କାରେ ବି ବିକ୍ରି ହେଉନାହିଁ ବିଲାତି ବାଇଗଣ । ଧାର, କରଜ କରି ଟମାଟୋ ଚାଷ କରିଥିବା ଜିଲ୍ଲାର କୃଷକ ଏବେ ମୁଣ୍ଡରେ ହାତ ଦେଇ ବସିଛନ୍ତି । ଏକର ଏକର ଜମିରେ ଚାଷ ହୋଇଛି ଟମାଟୋ । ହେଲେ ଅମଳ ହେଲା ବେଳକୁ ନାହିଁ ବିକ୍ରି କରିବା ସୁବିଧା । ବଡ ନୋଟ ବ୍ୟାନ ପରେ ରାଜ୍ୟର ଚାଷୀ ଯେ, ନାହିଁ ନଥିବା ଅସୁବିଧା ଭୋଗୁଛନ୍ତି, ଯାହାର ନଜିର ଦେଖିବାକୁ ମିଳିଛି ବରଗଡ ଜିଲ୍ଲାର ଗାଈସିଲେଟ ବ୍ଲକରେ । ଉତ୍ପାଦିତ ଟମାଟୋର ଚାହିଦା ନଥିବାରୁ ରାସ୍ତାରେ ଫୋପାଡି ଦେବାକୁ ବାଧ୍ୟ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟ ଏକ ମନକୁ ଦୋହଲାଇ ଦେବା ଭଳି ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା କୋକସରା ବ୍ଲକ୍ କାଶିବାହାଲରେ । ଲୋକଙ୍କୁ କିରୋସିନ୍ ବଂଟନ କରାଯାଉଥିଲା । ତେବେ ଲୋକଙ୍କ ପାଖରେ ଖୁଚୁରା ଟଂକା ନଥିଲା । ଫଳରେ ଲୋକେ ନିଜ ଉତ୍ପାଦିତ ଧାନ ଧରି ପଂଚାୟତ କାର୍ଯ୍ୟାଳୟରେ ପଂହଚିଥିଲେ । ଧାନ ବଦଳରେ କିରୋସିନ୍ ଦେବାକୁ ଦାବି କରିଥିଲେ । ତେବେ ଏଥିରେ ଅମଂଗ ହେବାରୁ ସରପଂଚକୁ ଘେରିଯାଇଥିଲେ ଗ୍ରାମବାସୀ । ଏପରିକି ତାଂକୁ ଏକ କଠୋରୀରେ ବନ୍ଦ କରିଦେଇଥିଲେ । ପରେ ବିଡିଓ ଖବର ପାଇ ଘଟଣାସ୍ଥଳରେ ପହଁଚିଥିଲେ । ଲୋକଙ୍କୁ ବୁଝାସୁଝା କରିବା ପରେ ସରପଂଚଙ୍କୁ ମୁକ୍ତି ମିଳିଥିଲା । ସରକାରଙ୍କ ବିମୁଦ୍ରାକରଣ ଘୋଷଣା ପରେ ସଂଗୀନ ହୋଇପଡିଛି ସ୍ଥିତି । ଲୋକଙ୍କ ପାଖରେ ଟଙ୍କାର ଘୋର ଅଭାବ ଦେଖାଦେଇଛି । ଆଉ ଏହି ଘଟଣା ହେଉଛି ତାର ପ୍ରତିବାଦ ।