ଦିଲ୍ଲୀରେ ୧୧ ଜଣଙ୍କ ମୃତ୍ୟୁ ଘଟଣାରେ କାହାଣୀରେ ନୂଆ ମୋଡ଼ : ମୃତ ବ୍ୟକ୍ତିଙ୍କ ସହ ଭାଟିଆ ପରିବାର କଥାବାର୍ତ୍ତା କରୁଥିବା ନେଇ ଡାଇରୀରେ ଉଲ୍ଲେଖ
କନକ ବ୍ୟୁରୋ : ଦିଲ୍ଲୀର ସନ୍ଥନଗରରେ ଗୋଟିଏ ପରିବାରର ୧୧ଜଣଙ୍କ ମୃତ୍ୟୁ ଘଟଣାର ରହସ୍ୟ ଧୀରେ ଧୀରେ ଖୋଲିବାରେ ଲାଗିଛି । ମୋକ୍ଷ ପାଇଁ ପୁରା ପରିବାର ଆତ୍ମହତ୍ୟା କରିଥିବା ସନ୍ଦେହ କରୁଛି ପୋଲିସ । ମୃତକଙ୍କ ଠାରୁ ମିଳିଥିବା ଡାଏରୀରେ ଲେଖାଯାଇଛି ଯେ, ବରଗଛର ଓହଳ ଭଳି ଝୁଲି ରହିଥିବେ । ହାତ-ଗୋଡ ବନ୍ଧା ହୋଇଥିବ । ସମସ୍ତେ ସ୍ଥିରନିଷ୍ଠ ଥିବେ ଆଉ ଅନ୍ୟ କିଛି ଚିନ୍ତା କରୁନଥିବେ । ଡାଏରୀରେ ଏହା ମଧ୍ୟ ଉଲ୍ଲେଖ ରହିଛି ଯେ, ରସିରେ ଝୁଲୁଥିବା ବେଳେ ଶେଷ ମୁହୁର୍ତ୍ତରେ ଭଗବାନ ଆସି ରକ୍ଷା କରିବେ । ସେପଟେ ଭାଟିଆ ପରିବାରର ଘର କାନ୍ଥରେ ଥିବା ୧୧ଟି ଛିଦ୍ରକୁ ନେଇ ବି ଉତ୍କଣ୍ଠା ବଢିବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀର ବୁରାରୀ ଅଂଚଳରେ ଗୋଟିଏ ପରିବାର ୧୧ ଜଣଙ୍କ ଆତ୍ମହତ୍ୟା ଘଟଣାରେ ମିଳିଥିବା ଡାଏରୀରୁ କିଛି ଏଭିଳି ତଥ୍ୟ ପାଇଛି ପୋଲିସ । ୪୫ ବର୍ଷିୟ ଲଳିତ ଭାଟିଆ କିଛି ଏହିଭଳି ଢ଼ଙ୍ଗରେ ମୋକ୍ଷ ପାଇବାକୁ ଆତ୍ମହତ୍ୟା କରିବା ପାଇଁ ପରିବାର ଲୋକଙ୍କୁ ପ୍ରବର୍ତ୍ତାଇ ଥିଲେ ବୋଲି ଅନୁମାନ କରାଯାଉଛି । ୨୦୧୫ରୁ ଏହି ଡାଏରୀ ଲେଖୁଥିଲେ ଲଳିତ ଭାଟିଆ । ତାଙ୍କ ହସ୍ତାକ୍ଷର ପରୀକ୍ଷା ପରେ ଡାଏରୀରେ ତାଙ୍କ ଦ୍ୱାରା ଲେଖାଯାଇଛି ବୋଲି ସ୍ପଷ୍ଟ ହୋଇଛି । ତାଙ୍କ ପରିବାର ବଟ ବୃକ୍ଷକୁ ପୂଜା କରନ୍ତି ଏବଂ ୩୦ ଦିନ ଧରି ମୋକ୍ଷ ପ୍ରାପ୍ତି ପାଇଁ କ’ଣ ସବୁ ପଦକ୍ଷେପ ନେବେ ସେ ବିଷୟରେ ମଧ୍ୟ ଉଲ୍ଲେଖ ରହିଛି । ସେମାନେ ଆତ୍ମହତ୍ୟା ପାଇଁ ରିହର୍ସାଲ ବା ଅଭ୍ୟାସ କରିଥିବା ନେଇ ମଧ୍ୟ ଡାଏରୀରେ ଉଲ୍ଲେଖ ରହିଛି ।
ଡାଏରୀରେ ବାରମ୍ବାର ଲେଖାହୋଇଛି ମୋକ୍ଷ ପ୍ରାପ୍ତି ପାଇଁ ଏସବୁ କରିବା ପାଇଁ ଉପରୁ ଆଦେଶ ଆସୁଛି । ତେବେ ଉପରୁ ଆଦେଶ ଆସିବା ଅର୍ଥ ସମ୍ପୂର୍ଣ୍ଣ ସ୍ପଷ୍ଟ ହୋଇନାହିଁ । ତେବେ ଲଳିତ ଭାଟିଆ ସ୍ୱପ୍ନରେ ତାଙ୍କ ମୃତ ପିତାଙ୍କ ଠାରୁ ଆଦେଶ ନେଉଥିଲେ ବୋଲି ପୋଲିସ ଅନୁମାନ କରିଛି । ତେବେ ମୋକ୍ଷ ପ୍ରାପ୍ତିକୁ ନେଇ ତାଙ୍କ ଘର କାନ୍ଥରେ ୧୧ ଟି ଛିଦ୍ର କରାଯାଇଥିବା ରହସ୍ୟକୁ ନେଇ ମଧ୍ୟ ଉତ୍କଣ୍ଠା ବଢ଼ୁଛି । ପରିବାର ସହ ଜଡ଼ିତ ଜଣେ ବ୍ୟକ୍ତି ଅନୁମାନ କରି କହିଛନ୍ତି, ୧୧ ଟି ଆତ୍ମା ଘରୁ ବାହାରିବା ପାଇଁ ଘରୁ ବାହାରିବା ପାଇଁ ୧୧ଟି ଛିଦ୍ର କରାଯାଇଛି । ପରିବାର ସହ ଦୀର୍ଘ ବର୍ଷ ସମ୍ପର୍କରେ ଥିବା ଅହମ୍ମଦ ଅଲ୍ଲୀ କହିଛନ୍ତି, ଭେଣ୍ଟିଲେସନ ପାଇଁ ଏପରି କରାଯାଇଛି, କିନ୍ତୁ ୧୧ଟି ଛିଦ୍ର କାହିଁକି କରାଯାଇଛି, ସେ ନେଇ କିଛି ସ୍ପଷ୍ଟ କହିପାରିନଥିଲେ ।
ତେବେ ଏହି କାହାଣୀକୁ ନେଇ ଲୋକଙ୍କ ମନରେ ଦିନକୁ ଦିନ ଉତ୍କଣ୍ଠା ବଢ଼ୁଛିଏବଂ ନୂଆ ନୂଆ ତଥ୍ୟ ମଧ୍ୟ ସାମ୍ନାକୁ ଆସୁଛି । ଯାହା ଘଟଣାକୁ ଆହୁରି ରହସ୍ୟମୟ କରୁଛି । କାରଣ ଏହାର କାରଣ ଖୋଲିବା ପାଇଁ ଆଉ କେହି ବି ଜୀବିତ ନାହାନ୍ତି ।