ସଂଘର୍ଷମୟ ଜୀବନ ଏବଂ କର୍କଟ ରୋଗ ଆଗରେ ହାରିନାହାଁନ୍ତି ଏହି ଝିଅ ! ମୁଣ୍ଡରେ ସ୍କାର୍ଫ ଏବଂ ହାତରେ ଖାଦ୍ୟ ପୁଡିଆ ଧରି ଗରିବ ପିଲାଙ୍କ ମୁହଁରେ ହସ ବାଣ୍ଟୁଛନ୍ତି ।
ଆଞ୍ଚଲ୍ ଶର୍ମା ଏକ ଏଭଳି ନାମ ଯେ ଦିଲ୍ଲୀର ଭଙ୍ଗା ଦଦରା ବସ୍ତିରେ ରହୁଥିବା ୧୦୦ ରୁ ଅଧିକ ପିଲାଙ୍କ ପାଇଁ ଏବେ ସୁପରହିରୋ ପାଲଟିଛନ୍ତି । କର୍କଟ ରୋଗରେ ପୀଡିତ ଆଞ୍ଚଲ୍ ଙ୍କ କେମୋଥେରାପୀ ଟେଷ୍ଟ୍ ପରେ ମୁଣ୍ଡରେ ଷ୍କାର୍ଫ ଏବଂ ହାତରେ ଖାଦ୍ୟପୁଡିଆ ଧରି ପ୍ରତିଦିନ ସେ ଏଭଳି ବସ୍ତିମାନଙ୍କୁ ଆସିଥାନ୍ତି । ପିଲାମାନେ ମଧ୍ୟ ଆଞ୍ଚଲଙ୍କ ଆସିବା ବାଟକୁ ଚାତକ ପରି ଚାହିଁ ରହିଥାନ୍ତି । ଘରୋଇ ହିଂସା , ଦାରିଦ୍ର୍ୟ ଏବଂ ସାନ ଭଉଣୀର ହତ୍ୟା ଭଳି କଠିନରୁ କଠିନ ପରିସ୍ଥିିତି ଦେଇ ଗତି କରିଥିବା ଆଞ୍ଚଲ୍ କେବେ ବି ନିଜର ଆତ୍ମବିଶ୍ୱାସ ହରାଇ ନଥିଲେ । ୨୦୧୭ ରେ ତାଙ୍କୁ ଯେତେବେଳେ ବ୍ରେଷ୍ଟ୍ କ୍ୟାନସର୍ ଥିବାର ସୂଚନା ମିଳିଲା ସେତେବେଳେ ବି ସେ ହାର୍ ମାନିନଥିଲେ । ଦିଲ୍ଲ୍ୀର ଏହି “ୱାଣ୍ଡର୍ ୱମେନ୍” କର୍କଟ ପୀଡିତ ହେବା ପରେ ବି ପ୍ରତିଦିନ ନିଜ ରୋଜଗାରରେ ୧୦୦ ରୁ ୨୦୦ ଜଣ ପିଲାଙ୍କୁ ଖାଦ୍ୟ ଦେଇଥାନ୍ତି ।
Kanak News is now on WhatsApp
Join and get latest news updates delivered to you via WhatsApp
ନିମ୍ନ ମଧ୍ୟବିତ୍ତ ପରିବାରରେ ଜନ୍ମିତ ଆଞ୍ଚଲଙ୍କ ବାପା ଜଣେ ଅଟୋ ଚାଳକ ଥିଲେ କିନ୍ତୁ ଭୁଲ୍ ନିବେଶ ଚକ୍କରରେ ଫସି ସେ ନିଜର ସମସ୍ତ ପୁଞ୍ଜି ହରାଇଲେ ଏବଂ ଦୁଃଖ ଦୂର କରିବା ପାଇଁ ମଦ ପିଇବା ଆରମ୍ଭ କରିଦେଲେ । ପିଲାଙ୍କ ପେଟକୁ ଚାହିଁ ମା’ ଗୋଟିଏ କାରଖାନାରେ ଅତିରିକ୍ତ ସମୟ ପର୍ଯ୍ୟନ୍ତ କାମ କଲେ । କିନ୍ତୁ କିଛି ଦିନ ପରେ କମ୍ପାନୀରୁ ଶ୍ରମିକଙ୍କ ଛଟେଇ ହେବାରୁ ତାଙ୍କୁ ମଧ୍ୟ କାମରୁ ବାହାର କରାଯାଇଥିଲା । ପରିବାରର ଗମ୍ଭୀର ସ୍ଥିତିକୁ ଦେଖି ଆଞ୍ଚଲ୍ ଏବଂ ତାଙ୍କ ଭାଇ ସ୍କୁଲ୍ ଛାଡିଲେ । ଭାଇ ଗୋଟିଏ ମୋଟର୍ ଗ୍ୟାରେଜ୍ ରେ କାମ କଲେ ଏବଂ ଆଞ୍ଚଲ୍ ଗୋଟିଏ କମ୍ପାନୀରେ ପରିଚାରିକା ରୁପେ କାମ କଲେ । ପରିଶ୍ରମୀ ହୋଇଥିବାରୁ କେଉଁଠି ତାଙ୍କୁ ଶିକ୍ଷାଗତ ଯୋଗ୍ୟତା ପାଇଁ ସଂଘର୍ଷ କରିବାକୁ ପଡିନଥିଲା । ଧିରେ ଧିରେ ସେ ଏକ ଏଜେନ୍ସୀରେ ବ୍ରୋକର୍ ଚାକିରୀରେ କାମ କରିବା ଆରମ୍ଭ କଲେ ଏବଂ ପରିବାର ପାଇଁ ବ୍ୟକ୍ତିଗତ ଫ୍ଲାଟ୍ ନେବା ପାଇଁ ସକ୍ଷମ ହେଲେ । ଜୀବନରେ ଏତେ ସଂଘର୍ଷ କଲା ପରେ ସାନଭଉଣୀର ହତ୍ୟା ତାଙ୍କ ଶକ୍ତ କରୁଥିବା ମେରୁଦଣ୍ଡକୁ ଭାଙ୍ଗି ଦେଇଥିଲା । ପରିବାରର ବିନା ସମର୍ଥନରେ ନିଜ ପୁରୁଷ ବନ୍ଧୁଙ୍କୁ ବିବାହ କରିଥିବା ସାନଭଉଣୀଙ୍କୁ ଆଞ୍ଚଲ୍ ସହଯୋଗ କରିଥିଲେ । କିନ୍ତୁ ବିବାହର ୫ ମାସ ପରେ ନିଜ ସ୍ୱାମୀଙ୍କ ହାତରୁ ହିଁ ପ୍ରାଣ ହରାଇଥିବା ସାନଭଉଣୀକୁ ନ୍ୟାୟ ଦେବା ପାଇଁ ସେ କୋର୍ଟକଚେରୀର ଦ୍ୱାରସ୍ଥ ହେଲେ । ଶେଷରେ ଦୋଷୀଙ୍କ ଆଜୀବନ କାରାବାସ ଦଣ୍ଡରେ ଦଣ୍ଡିତ କରି ମୃତ ଭଉଣୀକୁ ନ୍ୟାୟ ଦେଇଥିଲେ ଆଞ୍ଚଲ୍ । ଏହି ଦୁଃଖଦ ଘଟଣା ସମ୍ପୁର୍ଣ୍ଣ ପରିବାରକୁ ସ୍ତବ୍ଧ କରି ରଖି ଦେଇଥିଲା । ସଂପର୍କୀୟଙ୍କ କହିବା ପରେ ଆଞ୍ଚଲଙ୍କ ବିବାହ ମଧ୍ୟ ହୋଇଥିଲା କିନ୍ତୁ ବାରମ୍ବାର ଯୌତୁକ ନିର୍ଯାତନା ମିଳିବା ପରେ ବିବାହର ୩ ମାସ ପରେ ହିଁ ସେ ଛାଡପତ୍ର ଦେଇ ରିୟଲ୍ ଏଷ୍ଟେଟ୍ ଫର୍ମ ଆରମ୍ଭ କରିଥିଲେ ।
ଗୋଟିଏ ପଟେ ମା’ଙ୍କ ମସ୍ତିଷ୍କ ରୋଗ ଅନ୍ୟପଟେ ପିତାଙ୍କ ପକ୍ଷଘାତ ରୋଗ ଦୁହିଁଙ୍କ ଭାର ଆଞ୍ଚଲଙ୍କ କାନ୍ଧ ଉପରେ ପଡିଥିଲା । ଏଭଳି ସ୍ଥିତିରେ ସ୍ୱାସ୍ଥ୍ୟଗତ ଅବହେଳା ଦୃଷ୍ଟିରୁ ତାଙ୍କ ଦେହ ଖରାପ ହେବାକୁୁ ଲାଗିଲା ଏବଂ ସ୍ତନରେ ଗାଣ୍ଠ ପଡିବା ଭଳି ଅନୁଭବ ହେଲା । କିନ୍ତୁ ରୋଗାଗ୍ରସ୍ତ ବାପାମା’ଙ୍କ ଆଗରେ ତାଙ୍କୁ ନିଜ ସ୍ୱାସ୍ଥ୍ୟର ଅଣଦେଖା କରିବାକୁ ପଡିଥିଲା । ୨୦୧୭ ରେ ତାଙ୍କୁ ତୃତୀୟ ଚରଣର ସ୍ତନ କର୍କଟ ହେବାର ସୂଚନା ମିଳିଲା । ମହଙ୍ଗା ଏବଂ ଶରୀରରୁ ପ୍ରାଣ ବାହାର କରିଦେଲା ଭଳି ଚିକିତ୍ସା ସମୟରେ ଯେତେବେଳେ ତାଙ୍କ ପାଖକୁ ସିଗନାଲ୍ ର କିଛି ପିଲା ଟଙ୍କା ମାଗିବାକୁ ଆସିଲେ ସେ ଟଙ୍କା ଦେବାକୁ ମନା କରି ସେମାନଙ୍କୁ ଏକ ଢାବାରେ ଖାଇବାକୁ ଦେଇଥିଲେ । ଭୋକିଲା ପିଲାଙ୍କ ପେଟ ପୁରୁଥିବାର ଖୁସି ଆଞ୍ଚଲଙ୍କୁ ଏତେ ଆତ୍ମତୃପ୍ତି ଦେଲା ଯେ ସେ ପ୍ରତିଦିନ ପିଲାମାନଙ୍କ ପାଇଁ ଘରେ ଖାଦ୍ୟ ପ୍ରସ୍ତୁତି କରି ରଙ୍ଗପୁରୀ ମଲିନ୍ ବସ୍ତିରେ ପହଁଚନ୍ତି । ଆଞ୍ଚଲଙ୍କ କହିବାନୁସାରେ , ସେ ପାଖାପାଖି ୧ ଲକ୍ଷ ପିଲାଙ୍କୁ ଖାଦ୍ୟ ଖୁଆଇଛନ୍ତି । କିଛି ଦିନ ଭିତରେ ଆଞ୍ଚଲ୍ ଙ୍କ ଏହି କାମ ଏତେ ଲୋକପ୍ରିୟତା ହାସଲ କଲା ଯେ “ମିଲ୍ ଅଫ୍ ହାପିନେସ୍” ନାମକ ଏକ ଏନଜିଓ ମଧ୍ୟ ଖୋଲାଗଲା ଏବଂ ଆଞ୍ଚଲଙ୍କୁ ଏହି ପୁଣ୍ୟ କାମ ପାଇଁ ଡୋନେସନ୍ ମଧ୍ୟ ମିଳିବାକୁ ଲାଗିଲା । 