କନକ ବ୍ୟୁରୋ : ପୁଣି ଦିଲ୍ଲୀର ଏମ୍ସ ହସ୍ପିଟାଲରୁ ଆସିଲା ଭଲ ଖବର । ମା କୋଳକୁ ଗଲା ଜଗା । ନର୍ମାଲ ୱାର୍ଡରେ ମା କୋଳରେ ଜଗା ଥିବା ନେଇ ସ୍ୱାସ୍ଥ୍ୟ ମନ୍ତ୍ରୀ ପ୍ରତାପ ଜେନା ସୂଚନା ଦେଇଛନ୍ତି । ଜଗାର ଆଖି ମଧ୍ୟ ପରୀକ୍ଷା କରାଯାଇଛି । ଆଖି ଠିକ ଥିବା ନେଇ ଏମ୍ସ ଡାକ୍ତର କହିଛନ୍ତି । ସେପଟେ ବଳିଆର ସ୍ୱାସ୍ଥ୍ୟବସ୍ଥାକୁ ନେଇ ଚିନ୍ତା ଲାଗିରହିଥିବା ବେଳେ ଆଜି ବଳିଆକୁ ନେଇ ମଧ୍ୟଭଲ ଖବର ଆସିଛି । ବଳିଆ ଧିରେଧିରେ ସଙ୍କଟଜନକ ସ୍ଥିତିକୁ ଅତିକ୍ରମ କରିବାରେ ଲାଗିଛି।
Kanak News is now on WhatsApp
Join and get latest news updates delivered to you via WhatsApp
ଅପରେସନ ପରେ ଜଗାର ସ୍ୱାସ୍ଥ୍ୟରେ ଶୀଘ୍ର ଉନ୍ନତି ଆସିଥିଲେ ମଧ୍ୟ ବଳିଆ କ୍ଷେତ୍ରରେ ଏହା ଦେଖାଯାଇନଥିଲା । ତେଣୁ ବଳିଆ ଉପରେ ଏମ୍ସର ଡାକ୍ତରମାନେ ମଧ୍ୟ ସନ୍ଦିହାନ ହୋଇପଡିଥିଲେ । କିନ୍ତୁ ଧିରେ ଧିରେ ବଳିଆ ସ୍ୱାସ୍ଥ୍ୟବସ୍ଥାରେ ଉନ୍ନତି ଆସିଲା । ଆଜି ବଳିଆକୁ ଆଇସିୟୁରୁ ନର୍ମାଲ ୱାର୍ଡକୁ ସ୍ଥାନାନ୍ତର କରାଯାଇଛି ।
ଅକ୍ଟୋବର ୨୫ରେ ଦିଲ୍ଲୀ ଏମ୍ସରେ ଯୋଡା ମୁଣ୍ଡ ଶିଶୁ ଜଗା ବଳିଆଙ୍କ ଦ୍ୱିତୀୟ ପର୍ଯ୍ୟାୟ ଅପରେସନ ହୋଇଥିଲା । ଏହି ଅପରେସନଟି ଥିଲା ବେଶ ଜଟିଳ । କାରଣ ଏଥିରେ ଲାଗିରହିଥିବା ଉଭୟଙ୍କ ମୁଣ୍ଡକୁ ଅଲଗା କରାଯାଇଥିଲା । ଏହି ବିରଳ ଅସ୍ତ୍ରୋପଚାର ପାଇଁ ଏକ ବିଶାଳ ଡାକ୍ତର ଟିମ୍ ଗଠନ କରାଯାଇଥିଲା । ଏଥିରେ ନିଶ୍ଚେତକ, ହୃଦବିଭାଗ, ଶିଶୁ ଚିକିତ୍ସା ବିଭାଗ, ନ୍ୟୁରୋଲଜି ଆଦି ବିଭିନ୍ନ ବିଭାଗର ଡାକ୍ତର ରହିଥିଲେ ।
ଅପରେସନରେ ୨୦ ସର୍ଜନ ଓ ୧୦ ଆନାସଥେସିଆ ସ୍ପେଶାଲିଷ୍ଟ ଥିଲେ । ଅକ୍ଟୋବର ୨୫ତାରିଖ ସକାଳ ୬ଟା ୩୦ରେ ବିଶ୍ୱର ଏକ ବିରଳ ଅପରେସନ ପାଇଁ ଜଗା-ବଳିଆଙ୍କୁ ନିଆଗଲା । ଶିଶୁଙ୍କ ମୁଣ୍ଡ ଅଲଗା କରିବାର ପ୍ରଥମ ତଥା ଜଟିଳ ପ୍ରକ୍ରିୟା ଥିଲା ନିଶ୍ଚେତକ ପ୍ରକ୍ରିୟା । ୨୫ ଘଂଟାର ମାରାଥନ୍ ଅପରେସନ୍ ପାଇଁ ସବୁଠୁ ଗୁରୁତ୍ୱପୂର୍ଣ୍ଣ ଥିଲା ଶିଶୁଙ୍କୁ ସଠିକ୍ ନିଶ୍ଚେତକ ଦେବା । ନିଶ୍ଚେତକ ଦେବା ପରେ ପ୍ରାୟ ସାଢେ ୯ଟାରେ ୨୦ ଜଣିଆ ଡାକ୍ତରୀ ଟିମ୍ ଆରମ୍ଭ କଲେ ଅପରେସନ୍ । ସାମ୍ନାରେ ଚ୍ୟାଲେଂଜ ଥିଲା ଅସମ୍ଭବକୁ ସମ୍ଭବ କରିବାର, ଇତିହାସ ରଚିବାର । ଧିରେ ଧିରେ ନିଶ୍ଚେତକ କାମ କରୁଥିଲା । ଆଉ ଏପଟେ ଚାଲିଥିଲା ବିଭିନ୍ନ ପରୀକ୍ଷା । ଦୁଇ ଶିଶୁଙ୍କ ରକ୍ତ ଜମାଟ, ହାର୍ଟବିଟ୍, ଇନଫେକ୍ସନ, ରକ୍ତଚାପ, ହାର୍ଟକୁ ରକ୍ତ ସଂଚାଳନ, ଅମ୍ଲଜାନ ସବୁର ପରୀକ୍ଷା କରାଯାଉଥିଲା । ରାତି ପ୍ରାୟ ୮ଟାରେ ଅଲଗା ହେଲା ଜଗା ବଳିଆଙ୍କ ଯୋଡା ମୁଣ୍ଡ । ମୁଣ୍ଡ ଅଲଗା ହେବା ପରେ ଖପୁରୀ କି ଚର୍ମ ନଥିଲା । ସେସବୁକୁ ଅଲଗା ପାଇଁ ପ୍ଲାଷ୍ଟିକ ସର୍ଜନକୁ ୪ରୁ ୫ଘଂଟା ଲାଗିଥିଲା । ସକାଳ ପ୍ରାୟ ସାଢେ ୩ଟାରେ ସରିଲା ପ୍ଲାଷ୍ଟିକ ସର୍ଜନଙ୍କ କାମ । ପ୍ରତି ୨୫ ଲକ୍ଷରେ ଜଣେ ଏଭଳି ଶିଶୁ ଜନ୍ମ ନେଇଥାନ୍ତି ଏବଂ ୮୦ରୁ ୯୦ ପ୍ରତିଶତ ମୃତ୍ୟୁର ଶିକାର ହୋଇଥାନ୍ତି । ତେବେ ଜଗା ବଳିଆଙ୍କ ଅପରେସନ ଅସମ୍ଭବ ଲାଗୁଥିଲା ହେଲେ ଚ୍ୟାଲେଂଜ ଥିଲା ଇତିହାସ ରଚିବାର ।
ଏହା ପୂର୍ବରୁ ଅଗଷ୍ଟ ୨୮ତାରିଖରେ ଦିଲ୍ଲୀ ଏମ୍ସରେ ଜଗା ବଳିଆଙ୍କ ପ୍ରଥମ ପର୍ଯ୍ୟାୟ ଅପରେସନ ହୋଇଥିଲା । ୪୦ ଜଣିଆ ଡାକ୍ତରୀ ଦଳ ୨୦ଘଂଟାରୁ ଅଧିକ ସମୟ ଧରି ଏହି ଅପରେସନ କରିଥିଲେ । ଏଥିରେ ଜାପାନରୁ ଆସିଥିବା ବିଶେଷଜ୍ଞ ବି ସାମିଲ ହୋଇଥିଲେ । ଯୋଡା ମୁଣ୍ଡ ଶିଶୁ ଜଗା ବଳିଆଙ୍କ ମଧ୍ୟରୁ ବଳିଆର ରକ୍ତ ସଂଚାଳନ ଜଗାକୁ ହେଉଥିଲା । ବଳିଆର ମସ୍ତିଷ୍କ ଯୋଡ଼ି ହୋଇଥିଲା ଜଗାର ମସ୍ତିଷ୍କ ସହ । ବଳିଆକୁ ଦିଆଯାଉଥିବା ତରଳ ଖାଦ୍ୟ ଜଗା ଦେହକୁ ଯାଉଥିଲା ଫଳରେ ଜଗାର ଅଧିକ ପରିସ୍ରା ହେଉଥିଲା । ତେବେ ପ୍ରଥମ ପର୍ଯ୍ୟାୟ ଅପରେସନରେ ବଳିଆର ରକ୍ତ ସଂଚାଳନକୁ ଜଗାଠାରୁ ଅଲଗା କରାଯାଇଥିଲା । ଏଥିପାଇଁ କୃତ୍ରିମ ଶିରାପ୍ରଶିରା ରୋପଣ କରାଯାଇଥିଲା । କୃତ୍ରିମ ଶିରାପ୍ରଶିରାର ଢ଼ାଂଚା ତିଆରି କରିବା ଏବଂ ଏହାକୁ ବଳିଆ ଦେହରେ ରୋପଣ କରିବା ପାଇଁ ସ୍ୱତନ୍ତ୍ର ଭାବେ ଜାପାନରୁ ଜଣେ ଡାକ୍ତରଙ୍କୁ ଡକାଯାଇଥିଲା । ଏବଂ ଜାପାନର ସେହି ଡାକ୍ତର ପ୍ରଥମ ପର୍ଯ୍ୟାୟର ୨୦ ଘଂଟାର ଅପରେସନରେ ନିଜେ ନେଇଥିଲେ ୧୫ ଘଂଟା ।