ଜିରୋ ନାଇଟରେ ସରୁଛି ସୁପ୍ରିମକୋର୍ଟଙ୍କ ଖଣି ଜରିମାନା ଅବଧି : ଡିସେମ୍ବର ୩୧ରେ ବଡ ବଡ ଖଣି ମାଲିକଙ୍କ ହେବ ଭାଗ୍ୟ ନିର୍ଦ୍ଧାରଣ
କନକ ବ୍ୟୁରୋ : ଡିସେମ୍ବର ୩୧ ତାରିଖ ମଧ୍ୟରାତ୍ରି । ସରିଆସୁଛି ଖଣି ଫାଇନ ଦେବାର ଡେଡଲାଇନ୍ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ, ଜୋରିମାନା ନଦେଲେ ଚାଲୁଥିବା ଖଣିକୁ ବନ୍ଦ କରିଦିଆଯିବ । ତେବେ ଶନିବାର ଅପରାହ୍ନ ୫ଟା ସୁଦ୍ଧା ଫାଇନ୍ ଅବଦାୟ ହୋଇଛି ୮୦୬୨.୩ କୋଟି । ରାଜ୍ୟରେ ଫାଇନ ଆଦାୟ ହେବାକୁ ଥିବା 
୧୫୨ଟି ଖଣିରୁ ୫୪ଟି ଖଣି ଏବେ କାର୍ଯ୍ୟକ୍ଷମ ଅଛି । ଚାଲୁଥିବା ଖଣିଗୁଡ଼ିକ ଜୋରିମାନା ଦେବା ଜାରି ରଖିଛନ୍ତି । ବର୍ତମାନ ସୁଦ୍ଧା ଓଏମ୍ସି ୧୯୯୩ କୋଟି, ଟାଟା, ରୁଙ୍ଗଟା ୧୦୦୦ କୋଟିରୁ ଅଧିକ ଟଙ୍କା, ଆର୍ଯ୍ୟ ମାଇନିଂ ଓ ଟ୍ରେଡିଂ ୧୪୬ କୋଟି ଟଙ୍କା ଜୋରିମାନା ଦେଇଛନ୍ତି । ତେବେ ବଡ କଥା ହେଉଛି ଚାଲୁ ରହିଥିବା କିଛି ବଡ ଖଣି ଲିଜଧାରୀ ଏଯାଏଁ ଅର୍ଥ ପ୍ରଦାନ କରିନାହାନ୍ତି । ତାଲିକାରେ ଅଛନ୍ତି ମେସ୍କୋ, ସିରାଜୁଦ୍ଦିନ ଭଳି ଲିଜଧାରୀ ।
Kanak News is now on WhatsApp
Join and get latest news updates delivered to you via WhatsApp
ବଡ କଥା ହେଉଛି, ନିର୍ଦ୍ଧାରିତ ସମୟରେ ଯେଉଁ ଲିଜଧାରୀ ଫାଇନ ବାବଦ ଅର୍ଥ ପ୍ରଦାନ କରିବେ ନାହିଁ, ସେମାନଙ୍କ ବାବଦରେ କେନ୍ଦ୍ରୀୟ କ୍ଷମତା ସଂପନ୍ନ କମିଟିକୁ ରାଜ୍ୟ ସରକାର ଜଣାଇଦେବେ । ଏହାପରେ ସୁପ୍ରିମକୋର୍ଟ ଯେଉଁ ଆଭିମୁଖ୍ୟ ରଖିବେ,ରାଜ୍ୟ ସେହି ଅନୁସାରେ କାର୍ଯ୍ୟ କରିବ ବୋଲି ଜଣାପଡିଛି । ଅର୍ଥାତ୍ ଫାଇନ୍ କିଭଳି ଆଦାୟ ହେବ, ସୁପ୍ରିମକୋର୍ଟ ଏନେଇ ପୁନର୍ବାର ନିର୍ଦ୍ଦେଶ ଦେଇପାରନ୍ତି । ତେବେ ବଡ ପ୍ରଶ୍ନ ଉଠୁଛି, ଯେଉଁମାନଙ୍କ ଖଣି କିଛି ବର୍ଷ ହେଲା ବନ୍ଦ ହୋଇଯାଇଛି, ସେମାନଙ୍କ ଠାରୁ କିଭଳି ଜୋରିମାନା ଆଦାୟ ହେବ? ବେଆଇନ ଭାବେ ଖଣି ଖୋଳିବା ପରେ ଅର୍ଥ କୁଆଡେ ଗଲା ତାହା ପ୍ରଶ୍ନଚିହ୍ନ ସୃଷ୍ଟି କରିଛି ।