ସାଂସଦ ଭର୍ତୃହରିଙ୍କ ସ୍ତମ୍ଭକୁ ନେଇ ଦେବାଶିଷ ସାମନ୍ତରାୟଙ୍କ ପ୍ରତିକ୍ରିୟା : କହିଲେ ଦେଶକୁ ୧୦ ବର୍ଷ ପଛକୁ ନେଇଛି ଧର୍ମେନ୍ଦ୍ରଙ୍କ କାମ
କନକ ବ୍ୟୁରୋ : କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ବିଜେଡି ସାଂସଦ ଭର୍ତୃହରି ମହତାବଙ୍କ ପ୍ରଶଂସା ନେଇ ରାଜନୀତି ଜୋର ଧରିଛି । ଏ ନେଇ ବିଜେଡି ବିଧାୟକ ଦେବାଶିଷ ସାମନ୍ତରାୟ କଡା ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ସାଂସଦ ବ୍ୟକ୍ତିଗତ ଭାବେ ବୋଧହୁଏ ଧର୍ମେନ୍ଦ୍ରଙ୍କୁ ଭଲପାଉଛନ୍ତି । ସେଥିପାଇଁ ବୋଧହୁଏ ଧର୍ମେନ୍ଦ୍ରଙ୍କୁ ନେଇ ସ୍ତମ୍ଭ ଲେଖିଛନ୍ତି । ଧର୍ମେନ୍ଦ୍ରଙ୍କ କାର୍ଯ୍ୟ ଦେଶକୁ ୧୦ ବର୍ଷ ପଛକୁ ନେଇଯାଇଛି ।
Kanak News is now on WhatsApp
Join and get latest news updates delivered to you via WhatsApp
ନିଜ ଖବରକାଗଜରେ ପ୍ରକାଶିତ ସ୍ତମ୍ଭରେ ଧର୍ମେନ୍ଦ୍ର ପ୍ରଧାନଙ୍କୁ ପୁଣି ପ୍ରଶଂସାରେ ପୋତି ପକାଇଥିଲେ ବିଜେଡି ସଂସଦୀୟ ଦଳ ନେତା ଭର୍ତୃହରି ମହତାବ । ସେ ଲେଖିଥିଲେ କେନ୍ଦ୍ରମନ୍ତ୍ରୀ ନିଜ ଦକ୍ଷତା ଯୋଗୁଁ କ୍ୟାବିନେଟ ମନ୍ତ୍ରୀର ଦାବୀଦାର ଥିଲେ । ଏବଂ କ୍ୟାବିନେଟ ପାହ୍ୟା ହାତେଇଲେ ମଧ୍ୟ । ଉଜ୍ଜ୍ୱଳା ଯୋଜନାରେ ଧର୍ମେନ୍ଦ୍ରଙ୍କ କାର୍ଯ୍ୟକାରିତା ଯୋଗୁଁ ତାଙ୍କୁ ପୁରସ୍କାର ମିଳିଛି ।
ଏପରିକି କେନ୍ଦ୍ରମନ୍ତ୍ରୀ ୩ ବର୍ଷରେ ଯାହା କରିଛନ୍ତି ତାହା ପୂରଣ କରିବାକୁ ସାଧାରଣ ବ୍ୟବସ୍ଥାରେ ୧୦ ବର୍ଷ ଲାଗିବ ବୋଲି ଯୁକ୍ତି ରଖିଥିଲେ ଭର୍ତୃହରି । ଏହାପରେ ଆରମ୍ଭ ହୋଇଥିଲା ରାଜନୈତିକ ଝଡ । ବାରମ୍ବାର ନିଜ ଭାଷଣରେ ବିଜେଡିକୁ ହଇରାଣରେ ପକାଉଥିବା ଧର୍ମେନ୍ଦ୍ରଙ୍କୁ ଭର୍ତ୍ତୃହରି ପ୍ରଂଶସା କରିବା ବିଜେଡିର ସହଜରେ ହଜମ ହେଉନାହିଁ । ବିଜେଡି ଏବେ ଧର୍ମେନ୍ଦ୍ରଙ୍କୁ ସିଧାସଳଖ ନିଜ ନିଶାନାରେ ରଖିଥିବା ବେଳେ ଦଳୀୟ ସାଂସଦଙ୍କ ଏମିତି ଲେଖାକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି ।