ଜଙ୍ଗଲରେ ବି ସୁରକ୍ଷିତ ନୁହେଁ ବାଘ, ଦେବ୍ରିଗଡ଼ରେ ମହାବଳର ଶିକାର, ମିଳିଲା ବାଘର ଗଳିତ ମୃତଦେହ ! ଚମଡ଼ା, ନଖ, ଦାନ୍ତ କାଟି ନେଲେ ଶିକାରୀ ।
କନକ ବ୍ୟୁରୋ : ହୀରାକୁଦର ଦେବ୍ରିଗଡ ଅଭୟାରଣ୍ୟରେ ଦେଢ ମାସ ତଳେ ଠାବ ହୋଇଥିବା ମହାବଳ ବାଘକୁ ମାରିଦେଇଛନ୍ତି ଶିକାରୀ । ବାଘକୁ ମାରି ଶିକାରୀ ତାର ଦାନ୍ତ, ନଖ ଓ ଚମଡା ନେଇଯାଇଛନ୍ତି । ପରେ ମହାବଳକୁ ମାଟିରେ ପୋତି ଦିଆଯାଇଛି । ପ୍ରାୟ ଏକ ସପ୍ତାହ ତଳେ ମହାବଳକୁ ଶୀକାର କରାଯାଇଥିବା ନେଇ ସୂଚନା ମିଳିଥିବା ବେଳେ , ଆଜି ଘଟଣାସ୍ଥଳରେ ପହଞ୍ଚିଛନ୍ତି ବନ୍ୟପ୍ରାଣୀ ବିଶେଷଜ୍ଞ ଓ ବନ ବିଭାଗର ଟିମ୍ ।
Kanak News is now on WhatsApp
Join and get latest news updates delivered to you via WhatsApp
ପ୍ରାୟ ଦେଢ ମାସ ଆଗରୁ ଦେବ୍ରୀଗଡ ଅଭୟାରଣ୍ୟରେ ଏହି ମହାବଳର ଫଟୋ ଜଙ୍ଗଲ ବିଭାଗର ଟ୍ରାପ କ୍ୟାମେରାରେ ଆସିବା ପରେ ଏହି ଅଭୟାରଣ୍ୟରେ ମହାବଳ ଥିବା ନେଇ ସ୍ପଷ୍ଟ ପ୍ରମାଣ ମିଳିଲା । ଏତେବର୍ଷ ଭିତରେ ମହାବଳର ଏହି ଫଟୋ ପ୍ରଥମ ଥର ପାଇଁ ସାମ୍ନାକୁ ଆସିଥିଲା । ବିଭିନ୍ନ ମହଲରେ ଖୁସି ବି ଖେଳିଗଲା ଯେ, ଦେବ୍ରିଗଡ ଅଭୟାରଣ୍ୟରେ ମହାବଳ ଅଛି ।
୨୮ ଅକ୍ଟୋବର ୨୦୧୮, ହଠାତ୍ ଖବର ଆସିଲା ଦେବ୍ରିଗଡ ଅଭୟାରଣ୍ୟରେ ମହାବଳକୁ ମାରି ପକାଇଛନ୍ତି ଶିକାରୀ । ଖୋଜି ଖୋଜି କିଛି ବନ୍ୟପ୍ରାଣୀ ବିଶେଷଜ୍ଞ ଓ କନକ ନ୍ୟୁଜ୍ କ୍ୟାମେରା ଟିମ୍ ଏହି ସ୍ଥାନରେ ପହଁଚିଥିଲେ । ଜଣାପଡିଗଲା, ବାଘକୁ ମାରି ମାଟି ତଳେ ପୋତିଦିଆଯାଇଛି । ବାଘର ମୁଣ୍ଡକୁ ଶରୀରରୁ ଅଲଗା କରିଦିଆଯାଇଛି, ଗୋଡରେ ନଖ ନାହିଁ ଏବଂ ମୁହଁରୁ ଦାନ୍ତ ବି କାଢି ନିଆଯାଇଛି । କେବଳ ମୁଣ୍ଡରେ ଅଳ୍ପ ଟିକିଏ ଚମଡା ଲାଗିଛି, ବାକି ଶରୀରରୁ ଚମଡା କାଢି ନିଆଯାଇଛି ।
ଏସବୁ ସ୍ପଷ୍ଟ କରିଦେଉଥିଲା ଯେ, ପ୍ରାୟ ଏକ ସପ୍ତାହ ମଧ୍ୟରେ ଦେବ୍ରିଗଡର ମହାବଳକୁ ଶିକାର କରିଦିଆଯାଇଛି । ଏହା ଏକ ଏମିତି ଶିକାର ଯାହା ଦେବ୍ରିଗଡର ବାଘବଂଶର ସମ୍ଭାବନାକୁ ଲୋପ କରିଦେଇଛି କହିଲେ ଭୁଲ ହେବନି । ମିଳିଥିବା ସୂଚନା ଅନୁସାରେ ସ୍ଥାନୀୟ ଶିକାରୀ ମାନେ ହିଁ ମହାବଳର ଶୀକାର କରିଛନ୍ତି । ବାରହା ଜାଲରେ ମହାବଳକୁ ଫସାଯାଇଛି ଏବଂ ପରେ ତାକୁ ମାରିଦିଆଯାଇ, ଶରୀରର ଅଙ୍ଗପ୍ରତ୍ୟଙ୍ଗକୁ ବିକ୍ରି କରିଦିଆଯାଇଛି । ପ୍ରାୟ ଦେଢମାସ ତଳେ ମହାବଳର ଫଟୋ ଆସିବା ପରେ ଓଡିଶାର ଜଙ୍ଗଲରେ ବାଘର ଉପସ୍ଥିତି ଏକ ନୂଆ ଆଶା ସଂଚାର କରିଥିଲା । ଆଉ ଏହି ଶିକାର ସହ ଏକ ନୂଆ ସମ୍ଭାବନା ମଉଳିଯାଇଛି ।