ବୁମରାହଙ୍କ ଜେଜେବାପାଙ୍କ ରହସ୍ୟଜନକ ମୃତ୍ୟୁ ! ନାତିକୁ ଭେଟିବାକୁ ଆସି ନିଖୋଜ ହୋଇଥିଲେ, ନଦୀରୁ ଉଦ୍ଧାର ହେଲା ମୃତଦେହ
ଗୋଟିଏ ପଟେ ଶ୍ରୀଲଙ୍କା ବିପକ୍ଷରେ ନାତି ଖେଳୁଥିଲେ ମ୍ୟାଚ ଅନ୍ୟପଟେ ଜୀବନ ସହ ଳଢେଇ କରି ହାରି ଯାଇଥିଲେ ଜେଜେବାପା । ଭାରତର କ୍ରିକେଟ ଟିମର ଯୁବ ତଥା ଷ୍ଟାର ବୋଲର ଯଶପ୍ରୀତ ବୁମରାହଙ୍କ ଜେଜେବାପାଙ୍କ ମୃତଦେହ ଅହମ୍ମଦାବାଦରୁ ଉଦ୍ଧାର କରାଯାଇଛି । ପୁଲିସ ସୂଚନା ଅନୁଯାୟୀ, ସାବରବତୀ ନଦୀର ଗାନ୍ଧି ବ୍ରିଜ ଓ ଦଧିଚୀ ବ୍ରିଜ ତଳୁ ବୃଦ୍ଧ ସନ୍ତୋଷ ସିଂହ ବୁମରାହଙ୍କ ଶବ ଉଦ୍ଧାର କରାଯାଇଛି । ତେବେ ମୃତ୍ୟୁର କାରଣ ଜଣା ପଡିନାହିଁ ବୋଲି କହିଛି ପୋଲିସ । ଗତ ୮ ତାରିଖରେ ସନ୍ତୋଖ ସିଂହ ନିଖୋଜ ହେବା ପରେ ଏନେଇ ପରିବାର ପକ୍ଷରୁ ଥାନାରେ ଏତାଲା ଦାୟର କରାଯାଇଥିଲା । ଏହାପରେ ପୋଲିସ ସନ୍ତୋଖଙ୍କୁ ଖୋଜିବା ଆରମ୍ଭ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସନ୍ତୋଖ ସିଂହଙ୍କ ଝିଅ ତଥା ବୁମରାହଙ୍କ ପିଉସୀ ରବିନ୍ଦର କୌରଙ୍କ କହିବା ଅନୁଯାୟୀ, ୮୪ ବର୍ଷିୟ ବୃଦ୍ଧ ଜେଜେବାପା ସନ୍ତୋଖ ତାଙ୍କ ନାତି ବୁମରାହଙ୍କୁ ଦେଖା କରିବାକୁ ଉତ୍ତରାଖଣ୍ଡରୁ ଅହମ୍ମଦାବାଦ ଆସିଥିଲେ । କିନ୍ତୁ ବୁମରାହଙ୍କ ମା’ ତାଙ୍କୁ ସେ ସୁଯୋଗ ଦେଇନଥିଲେ । କାରଣ ଦୀର୍ଘବର୍ଷ ଧରି ଯଶପ୍ରୀତଙ୍କ ମା’ ଓ ସନ୍ତୋଖ ସିଂହଙ୍କ ଭିତରେ କୌଣସି କାରଣବଶତଃ ଝଗଡା ହୋଇଥିଲା । ଯାହା ପାଇଁ ବୁମରାହଙ୍କୁ ସନ୍ତୋଖ ଓ ପୂରା ପରିବାର ଠାରୁ ଦୂରେଇ ରଖୁଥିଲେ ତାଙ୍କ ମା’ । ବୁମରାହ ନିଜ ମା ଓ ପରିବାର ସହ ଅହମ୍ମଦାବାଦରେ ରହନ୍ତି । ୭ ବର୍ଷ ବୟସରେ ପିତାଙ୍କ ନିଧନ ପରେ ମା’ଙ୍କ ସହ ଅହମ୍ମଦାବାଦରେ ବାସ କରୁଥିଲେ ବୁମରାହ ।
ତେବେ ସବୁ ରାଗ ଅଭିମାନ ଭୁଲି ପରିଣତ ବୟସରେ ସନ୍ତୋଖ ନିଜ ନାତିକୁ ଦେଖା କରିବାକୁ ଅହମ୍ମଦାବାଦ ଆସିଥିଲେ । ପିଉସୀଙ୍କ କହିବା ଅନୁଯାୟୀ, ଯଶପ୍ରୀତଙ୍କ ମା’ ଦେଖା କରିବାକୁ ସିଧାସଳଖ ମନା କରିଦେଇଥିଲେ । ଏପରିକି ବୁମରାହଙ୍କ ସହ ଯେପରି ପରିବାରର କୌଣସି ବ୍ୟକ୍ତି ଯୋଗାଯୋଗ କରି ନ ପାରିବେ ସେଥିପାଇଁ ଫୋନ ନମ୍ବର ଦେବାକୁ ମଧ୍ୟ ମନା କରି ଦେଇଥିଲେ ।
ଏହାପରେ ଗତ ୮ ତାରିଖରୁ ନିଖୋଜ ହୋଇଥିଲେ ସନ୍ତୋଖ ସିଂ ବୁମରାହ । ଆଉ ଆଜି ତାଙ୍କ ମୃତଦେହ ଉଦ୍ଧାର କରାଯାଇଛି । ଯେଉଁ ସମୟରେ ସନ୍ତୋଷଙ୍କ ମୃତଦେହ ଉଦ୍ଧାର କରାଯାଇଥିଲା ସେତେବେଳେ ଧର୍ମଶାଳାରେ ଶ୍ରୀଲଙ୍କା ବିପକ୍ଷରେ ମ୍ୟାଚ ଖେଳୁଥିଲେ ବୁମରାହ ।