ଦାଉଦ ଇବ୍ରାହିମ କରାଚିରେ ଥାଇପାରେ, କିନ୍ତୁ ‘ଆମେ କାହିଁ ଭାରତକୁ ସାହାଯ୍ୟ କରିବୁ’! କହିଲେ, ମୁଶାରଫ
କନକ ବ୍ୟୁରୋ : ଦୁଇ ଦିନ ପୂର୍ବରୁ କେନ୍ଦ୍ର ଗୃହସଚିବ ରାଜୀବ ମେହରିଶି କହିଥିଲେ ଯେ, ଦାଉଦ ଇବ୍ରାହିମ ପାକିସ୍ତାନରେ ଅଛି । କିନ୍ତୁ ତାକୁ ଭାରତ ଆଣିବାରେ ପାକିସ୍ତାନ ବାଧା ସୃଷ୍ଟି କରୁଛି । ତେବେ ଗତକାଲି ଏ ସଂକ୍ରାନ୍ତରେ ପାକିସ୍ତାନର ପୂର୍ବତନ ରାଷ୍ଟ୍ରପତି ପରବେଜ ମୁସାରଫ କହିଛନ୍ତି ଯେ, ‘ଦାଉଦ କରାଚିରେ ଥାଇପାରେ କିନ୍ତୁ ଆମେ କାହିଁ ଏ ମାମଲାରେ ଭାରତକୁ ସହଯୋଗ କରିବୁ’ । ଏକ ପାକିସ୍ତାନ ନ୍ୟୁଜ୍ ଚ୍ୟାନେଲ ସହ କଥା ହେଉଥିବା ସମୟରେ ମୁଶାରଫ କହିଥିଲେ ଯେ, ଭାରତ ପାକିସ୍ତାନ ବିରୋଧରେ ଅନେକ ବର୍ଷ ଧରି ଦୋଷ ଲଦି ଆସିଛି । ତେଣୁ ଏବେ ଆମେ କେମିତି ଭଲ ହୋଇ ଭାରତକୁ ଏ ମାମଲାରେ ସାହାଯ୍ୟ କରିବୁ ।
Kanak News is now on WhatsApp
Join and get latest news updates delivered to you via WhatsApp
୧୯୯୩ ମୁମ୍ବାଇ ସିରିୟଲ ବୋମା ବିସ୍ଫୋରଣର ମୁଖ୍ୟ ଅଭିଯୁକ୍ତ ଦାଉଦ କେଉଁଠି ଅଛି ମୁଁ ଜାଣେନା କିନ୍ତୁ ସେ ଏଠି କେଉଁଠି ଥାଇପାରେ ବୋଲି ମୁଶାରଫ କହିଛନ୍ତି । ମୁଶାରଫଙ୍କ ଏମିତି କଥା ସ୍ପଷ୍ଟ କରିଦେଉଛି ଯେ, ଦାଉଦ କରାଚିରେ ହିଁ ରହିଛି । କରାଚିରେ ଦାଉଦ ରହିଥିବା କଥା ଭାରତ ଦାବି କରିଆସୁଥିଲେ ମଧ୍ୟ ପାକିସ୍ତାନ ବାରମ୍ବାର ଏହାକୁ ପ୍ରତ୍ୟାଖ୍ୟାନ କରିଆସିଛି । ଗତ ୧୦ ବର୍ଷ ଧରି ନୂଆଦିଲ୍ଲୀ ଅନେକ ଅଧିକାରୀଙ୍କୁ ଇସଲାମାବାଦ୍ ପଠାଇ ଜଣାଇଛି ଯେ, ଦାଉଦ ମୁମ୍ବାଇ ସିରିୟଲ ବୋମା ବିସ୍ଫୋରଣର ମୁଖ୍ୟ ଅଭିଯୁକ୍ତ । କିନ୍ତୁ ଏଥିରେ ଇସଲାମାବାଦ କୌଣସି ପ୍ରକାର ସହଯୋଗ କରିନାହିଁ ।
ଦୁଇ ଦିନ ପୂର୍ବରୁ ରାଜୀବ ମେହରିଶି କହିଥିଲେ ଯେ, ପାକିସ୍ତାନ ଦାଉଦକୁ ଆଶ୍ରୟ ଦେଇଛି ଏବଂ ତାକୁ ଭାରତ ଫେରାଇ ଆଣି ଆଇନକୁ ସାମ୍ନା କରିବାରେ ପାକିସ୍ତାନ ବାଧା ସୃଷ୍ଟି କରିଛି । ରାଜୀବ ଏହା ମଧ୍ୟ କହିଥିଲେ ଯେ, ପାକିସ୍ତାନର ବ୍ୟବହାର ଅନ୍ତରାଷ୍ଟ୍ରୀୟ ଆଇନର ଅନୁରୂପ ନୁହେଁ ଏବଂ ଏହା ଇବ୍ରାହିମ ମାମଲାରେ ଭାରତ ବିରୋଧରେ କାର୍ୟ୍ୟ କରିଛି । ୧୯୯୩ ମୁମ୍ବାଇ ସିରିୟଲ ବୋମା ବିସ୍ଫୋରଣରେ ୨୬୦ ଜଣଙ୍କର ମୃତ୍ୟୁ ହୋଇଥିଲା ଏବଂ ୭୦୦ରୁ ଊର୍ଦ୍ଧ୍ୱ ଆହତ ହୋଇଥିଲେ । ଗତ ଏପ୍ରିଲ ମାସରେ ଗୃହ ମନ୍ତ୍ରୀ ରାଜନାଥ ସିଂ କହିଥିଲେ ଯେ, ଦାଉଦ ପାକିସ୍ତାନରେ ଅଛି ଏବଂ ଏଥିରେ କୌଣସି ସନ୍ଦେହ ନାହିଁ । ୨୦୧୧ ମସିହାରେ ଉପା ସରକାରର ତତ୍କାଳୀନ ଗୃହମନ୍ତ୍ରୀ ପି ଚିଦାମ୍ବରମ ମଧ୍ୟ କହିଥିଲେ ଯେ, ଦାଉଦ ଇବ୍ରାହିମ କରାଚିରେ ରହିଛି । ପ୍ରାରମ୍ଭରେ ପାକିସ୍ତାନ ଅଲ-କାଏଦା ମୁଖ୍ୟ ଓସାମା ବିନ ଲାଡେନକୁ ଆଶ୍ରୟ ଦେଇଥିଲା ବୋଲି ଭାରତ ଅଭିଯୋଗ କରିଥିଲା ।