କନକ ବ୍ୟୁରୋ : କାହିଁକି ଚିଡିଲେ କୃଷିମନ୍ତ୍ରୀ । ରାସ୍ତାରେ ଧାନକେଣ୍ଡା ଦେଖି ଚିହିଁକି ଉଠିଲେ କାହିଁକି । ଅଦିନିଆ ବର୍ଷା ଚାଷ ଉଜାଡି ଦେଇଥିବା ଅଭିଯୋଗ ଚାଷୀ କରିବା ବେଳେ ରାଗି ନିଆଁବାଣ ହୋଇଗଲେ ଦାମ । ଧାନ କେଉଁଠି ଗଜା ହୋଇଛି କହି ଅଭିଯୋଗକାରୀଙ୍କୁ ପାଲଟା ଆକ୍ରମଣ କଲେ । ଯାହା ଦାମଙ୍କୁ ପୁଣିଥରେ ଚର୍ଚ୍ଚାର ପରିସରକୁ ଟାଣି ଆଣିଛି ।
Kanak News is now on WhatsApp
Join and get latest news updates delivered to you via WhatsApp
କୁଞ୍ଜଙ୍ଗ ଗସ୍ତବେଳେ କୃଷିମନ୍ତ୍ରୀ ଦାମୋଦର ରାଉତଙ୍କ ସହ ଘଟିଥିବା ଏକ ଘଟଣାକୁ ନେଇ ଆଜି ସାରାଦିନ ଚର୍ଚ୍ଚା ଲାଗିରହିଛି । କୁଞ୍ଜଙ୍ଗ କଲେଜରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ଫେରୁଥିବାବେଳେ କୃଷିମନ୍ତ୍ରୀଙ୍କୁ ଦେଖା କରିବାକୁ ଏହିଭଳି ଜଗି ରହିଥିଲେ କିଛି ଲୋକ । ହାତରେ ଓଦା ଧାନକେଣ୍ଡା ଧରି ଚାଷୀଙ୍କ ସମସ୍ୟା ଜଣାଇବାକୁ ଚାହୁଁଥିଲେ । କିନ୍ତୁ ଦାମ ରାଉତ ଏମାନଙ୍କୁ ଦେଖି ଚିଡି ଯାଇଥିଲେ । ଏପରିକି ରାସ୍ତାରେ ଛିଡାହୋଇ ରହିଥିବା ଜଣେ ବ୍ୟକ୍ତିଙ୍କୁ ସେ ଭଲଭାବେ ଜାଣନ୍ତି ଏବଂ ସେ ଚାଷୀ ନୁହନ୍ତି ବୋଲି ଦାମ କହିଥିଲେ । ଏପରିକି ଧାନ କେଉଁଠି ଗଜା ହୋଇଛି ବୋଲି ପାଲଟା ପ୍ରଶ୍ନ କରିଥିଲେ । ଯେଉଁ ଚାଷୀଙ୍କର କ୍ଷତି ହୋଇଛି ସେମାନେ ଜଣାଇବେ ତମେ ମାନେ ସବୁ କିଏ ବୋଲି କହି ଚିଡିଯାଇଥିଲେ ଦାମ । ସେ ନିଜେ ଜଣେ ଚାଷୀ ଏବଂ ଏବେ ମଧ୍ୟ ଚାଷ ଦେଖୁଛନ୍ତି ତେଣୁ ତାଙ୍କ ଆଗରେ ବେକାର କଥା ନ କହିବାକୁ କୃଷିମନ୍ତ୍ରୀ କହିଥିଲେ ।
ଅଭିଯୋଗକାରୀଙ୍କ ଉପରେ ଦାମଙ୍କ ଏଭଳି ଆକ୍ରୋଶମୂଳକ ବ୍ୟବହାର ନେଇ ଖବର ପ୍ରସାରଣ ପରେ ପୁଣି ଭୁବନେଶ୍ୱରରେ ପ୍ରତିକ୍ରିୟା ରଖିଥିଲେ ଦାମ । ଦାମ କହିଥିଲେ ଅଭିଯୋଗ କରିବାକୁ ଆସିଥିବା ବ୍ୟକ୍ତି ଚାଷୀ ନୁହଁନ୍ତି । ସେ ଖାଲିଟାରେ ସବୁବେଳେ ବୁଲୁଥାନ୍ତି । ତାଙ୍କୁ ସେ ଭଲ ଭାବେ ଚିହ୍ନିଛନ୍ତି । ତେବେ ଏସବୁ ଭିତରେ କୃଷିମନ୍ତ୍ରୀ ଦାମୋଦର ରାଉତ ଓ ଅଭିଯୋଗକାରୀଙ୍କ ଭିତରେ କଥାବାର୍ତାର ପୁରା ଚିତ୍ର କ୍ୟାମେରାରେ କଏଦ ହୋଇଥିବାବେଳେ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି ।
୧- ଅଭିଯୋଗକାରୀ ଯଦି ଚାଷୀ ନୁହନ୍ତି ତାହେଲେ ସେମାନଙ୍କ ଏଭଳି ପଦକ୍ଷେପ ପଛରେ ଉଦ୍ଦେଶ୍ୟ କ’ଣ?
୨- କୃଷିମନ୍ତ୍ରୀଙ୍କୁ ଅଡୁଆରେ ପକାଇବାକୁ ଏଭଳି ଯୋଜନା କରାଯାଇଥିଲା କି?
୩- ଏଭଳି କରିବା ପଛରେ କିଛି ରାଜନୈତିକ ଉଦ୍ଦେଶ୍ୟ ରହିଥିଲା କି?
୪- ସବୁଠାରୁ ବଡ ପ୍ରଶ୍ନ ହେଲା ଦାମ ବାବୁ ଏମାନଙ୍କ ସହ ଆଲୋଚନା ନକରି ହଠାତ ଚିଡିଗଲେ କାହିଁକି?