କନକ ବ୍ୟୁରୋ : ନୂଆ ଦଳ ଗଢିବେ କି ଦାମ ? ରାଜ୍ୟ ରାଜନୀତିରେ ଏଭଳି ଚର୍ଚ୍ଚା ଜୋର ଧରିଥିବା ବେଳେ ଏହା ଉପରୁ ପରଦା ଉଠାଇଛନ୍ତି ଦାମ । ଏପରିକି ନୂଆ ଦଳ ଗଢିବାର ଫର୍ମୁଲା ମଧ୍ୟ ଗଣମାଧ୍ୟମ ଆଗରେ କହିଛନ୍ତି ଦାମ । କଂଗ୍ରେସ ଭବନରେ ବସି ଏଭଳି ବୟାନ ଦେଇଛନ୍ତି ସଜ ସଜ ବିଜେଡିରୁ ବହିଷ୍କୃତ ହୋଇଥିବା ଦାମ ରାଉତ । ଯାହା ରାଜ୍ୟ ରାଜନୀତିରେ ଚହଳ ସୃଷ୍ଟି କରିଛି । ଏପରିକି ନୂଆ ଦଳ ପାଇଁ କିଛି ବିଜୁ ଅନୁଗତଙ୍କ ସହ ଯୋଗାଯୋଗ କରିଥିବା କଥା କହିଛନ୍ତି ଦାମ । କିନ୍ତୁ ଏହି ନୂଆ ଦଳ ଗଠନରେ ମଧ୍ୟ ତାଙ୍କୁ କେଉଁଭଳି ଅସୁବିଧାର ସମ୍ମୁଖୀନ ହେବାକୁ ପଡୁଛି ତାହା କ୍ୟାମେରା ଆଗରେ କହିଛନ୍ତି ଦାମ ।
Kanak News is now on WhatsApp
Join and get latest news updates delivered to you via WhatsApp
ଗାନ୍ଧିଜୀଙ୍କ ଜୟନ୍ତୀ ଅବସରରେ କଂଗ୍ରେସ ଭବନରେ ଆୟୋଜିତ ସମ୍ବିଧାନ ବଞ୍ଚାଅ ସମାବେଶରେ ଯୋଗ ଦେବା ଅବସରରେ ସେ ଏହି କଥା ଗଣମାଧ୍ୟମ ପ୍ରତିନିଧିଙ୍କୁ କହିଛନ୍ତି । ଏହି ପ୍ରସଙ୍ଗରେ ଦାମ ରାଉତ କହିଛନ୍ତି, ନୂଆ ଦଳ ଗଢିବା ପାଇଁ ବିଜେଡିରୁ ବିଦା ହୋଇଥିବା ବୈଜୟନ୍ତ ତାଙ୍କୁ ସାଥ୍ ଦେଉଛନ୍ତି । ଏପରିକି ବୈଜୟନ୍ତ ପଣ୍ଡା ନୂଆ ଦଳ ଗଢିବାକୁ ରାଜି ମଧ୍ୟ ଅଛନ୍ତି । କିନ୍ତୁ ଅନ୍ୟ ବିଜୁ ଅନୁଗାମୀ ଯେପରିକି ବିଜୟ ମହାପାତ୍ର ଏଯାଏଁ ଧରାଛୁଆଁ ଦେଉନାହାନ୍ତି । ତେବେ ଦିଲ୍ଲୀପ ରାୟଙ୍କ ସହ ତାଙ୍କର ଦେଖା ହୋଇନାହିଁ ବୋଲି ସେ କହିଛନ୍ତି ।
ଏହାଛଡା ଅନ୍ୟ କିଛି ବିଜୁ ପ୍ରେମୀ ଯେଉଁମାନେ ବିଭିନ୍ନ ଦଳରେ ରହିଥିଲେ ମଧ୍ୟ ଉପେକ୍ଷିତ ହେଉଛନ୍ତି ସେମାନଙ୍କ ସହ ଯୋଗାଯୋଗରେ ଅଛି ବୋଲି ଦାମ କହିଛନ୍ତି । ଏପରିକି ବର୍ତମାନ ପରିସ୍ଥିତିରେ ଆଉ ଏକ ନୂଆ ଦଳ ଗଠନ ହେବା ଆବଶ୍ୟକ ବୋଲି ସେ କହିଛନ୍ତି । ଏନେଇ କିଛି ମାଲଦାର ଲୋକ କଥା ହେଉଥିଲେ ବି ଧରାଛୁଆଁ ଦେଉନାହାନ୍ତି ବୋଲି କହିଛନ୍ତି ଦାମବାବୁ । ମାଲ ଥିଲେ ସିନା ଦଳ ଗଢିବି ନହେଲେ କେମିତି ଦଳ ଗଢିବି ବୋଲି ଦାମ କହିଛନ୍ତି । କିନ୍ତୁ ଯେପର୍ଯ୍ୟନ୍ତ ବିଜୁ ପ୍ରେମୀ ଏକାଠି ହୋଇନାହାନ୍ତି ସେତେବେଳ ଯାଏଁ ଦଳ ଗଢିବା କଥା ସମ୍ଭବ ନୁହେଁ ବୋଲି ସେ କହିଛନ୍ତି । ଆଉ ଦାମଙ୍କ ଏହି ବୟାନ ପରେ ପୁଣିଥରେ ଏକ ନୂଆ ଆଞ୍ଚଳିକ ଦଳ ଗଠନର ସଂକେତ ଦେଉଛି ।
ଆଜି ସଂଧ୍ୟାରେ କଂଗ୍ରେସ ଭବନରେ ପହଂଚିଥିଲେ ବିଜେଡିରୁ ବହିଷ୍କୃତ ନେତା ଦାମ । ଏପରିକି ଓଡିଶା କଂଗ୍ରେସ ପ୍ରଭାରୀ ଜିତେନ୍ଦ୍ର ସିଂଙ୍କ ପାଖରେ ବସି ବେଶ କିଛି ସମୟ କଥା ହୋଇଥିଲେ ଦାମ । ଏସବୁ ବାଦ୍ କଂଗ୍ରେସ ସଭା ମଧ୍ୟରେ ବିଜେପିକୁ ଟାର୍ଗେଟ କରିବାକୁ ଭୁଲିନଥିଲେ ଦାମ । କେନ୍ଦ୍ର ସରକାର ପ୍ରଚାର ସର୍ବସ୍ୱ ରାଜନୀତି କରୁଛନ୍ତି ବୋଲି କହିଛନ୍ତି ଦାମ । କେନ୍ଦ୍ରରେ ଏବେ ଗଣତନ୍ତ୍ର ନୁହେଁ ବରଂ ଦଳତନ୍ତ୍ର ଚାଲିଛି । ଆଉ ଏସବୁ ଭିତରେ ବିଜେଡିରୁ ବହିଷ୍କୃତ ହେବା ପରେ ଦାମ ରାଉତଙ୍କ କଂଗ୍ରେସ ଭବନ ଗସ୍ତକୁ ନେଇ ଏବେ ଆରମ୍ଭ ହୋଇଛି ଚର୍ଚ୍ଚା । ସର୍ବଦଳୀୟ କାର୍ଯ୍ୟକ୍ରମ ହୋଇଥିଲେ ମଧ୍ୟ କଂଗ୍ରେସ ଭବନକୁ ଦାମଙ୍କ ଗସ୍ତକୁ ସହଜରେ ଗ୍ରହଣ କରିପାରୁ ନାହାନ୍ତି ରାଜନୈତିକ ସମୀକ୍ଷକ । ଦାମଙ୍କ ଏହି ଗସ୍ତ ଏକ ନୂଆ ସମୀକରଣର ଚର୍ଚା ପାଇଁ ଖୋରାକ ଯୋଗାଇଛି ।