ପଞ୍ଚାୟତର ଅଜବ ଦଣ୍ଡ ! ବାହା ହେଲା ପୁଅ, ପଞ୍ଚାୟତ ଦେଲା ବାପାଙ୍କୁ ଛେପ ଚାଟିବାର ଦଣ୍ଡାଦେଶ
ବାହା ହେଲା ପୁଅ , ବାପାକୁ ପଞ୍ଚାୟତ ଦେଲା ଛେପ ଚାଟିବାର ଦଣ୍ଡାଦେଶ । ଏଭଳି କିଛି ଘଟଣା ଘଟିଛି ଉତ୍ତର ପ୍ରଦେଶର ବୁଲନ୍ଦସହର ଠାରେ । ସୁଚନା ମୁତାବକ ହବିବପୁର ଗାଁର ଶ୍ରୀକ୍ରୀଷ୍ଣା ନାମକ ୨୧ ବର୍ଷର ଦଳିତ ଯୁବକ ଜଣେ ମୁସଲମାନ ଝିଅକୁ ବିବାହ କରିବାରୁ ପଞ୍ଚାୟତ ଏଭଳି ଦଣ୍ଡାଦେଶ ଶୁଣାଇଛି । ବିବାହ କରିଥିବା ଦଳିତ ଯୁବକର ବାପାକୁ ସର୍ବ ସମ୍ମୁଖରେ ଛେପ ଚାଟିବା ପାଇଁ ପଞ୍ଚାୟତ ବାଧ୍ୟ କରିଥିବା ଅଭିଯୋଗ କରିଛନ୍ତି ଦଳିତ ଯୁବକଙ୍କ ବାପା । ଏନେଇ ଖୁର୍ଜା ନଗର ଥାନାରେ ଲିଖିତ ଅଭିଯୋଗ କରିଛନ୍ତି ଦଣ୍ଡାଦେଶ ଭୋଗିଥିବା ଦଳିତ ଯୁବକର ବାପା ।
Kanak News is now on WhatsApp
Join and get latest news updates delivered to you via WhatsApp
ଦଳିତ ଯୁବକ ବାପାଙ୍କ କହିବା ମୁତାବକ ମୁସଲମାନ ଝିଅ ପରିବାର ତରଫରୁ ବିବାହକୁ ନେଇ ମାମଲା ଦାୟର କରାଯାଇଥିଲା । କିନ୍ତୁ କୋର୍ଟ ମୁସଲମାନ ଝିଅ ପରିବାର ଲୋକଙ୍କ ଏତଲାକୁ ଖାରଜ କରି ଉଭୟଙ୍କୁ ବିବାହ କରିବା ପାଇଁ ଅନୁମତି ପ୍ରଦାନ କରିଥିଲେ । ଏହାପରେ ମଧ୍ୟ ଝିଅର ପରିବାର ଲୋକ ବିରୋଧ କରିବାରୁ ଉଭୟ ଗାଁ ଛାଡି ବିବାହ କରିଥିବା କହିଛନ୍ତି କ୍ରୀଷ୍ଣାଙ୍କ ବାପା । ଯାହାକୁ ନେଇ ଝିଅର ପରିବାର ଲୋକ ପଞ୍ଚାୟତକୁ ଏହି ଘଟଣାରେ ହସ୍ତକ୍ଷେପ କରିବା ପାଇଁ ଅନୁରୋଧ କରିଥିଲେ । ଯାହାଫଳରେ ପଞ୍ଚାୟତ ତରଫରୁ ଏକ ମିଟିଙ୍ଗ ଡକାଯାଇଥିଲା । ଯେଉଁଥିରେ ପଞ୍ଚାୟତର ଶହେରୁ ଉଦ୍ଧ୍ୱର୍ ଉଚ୍ଚ ଶ୍ରେଣୀର ଲୋକମାନେ ଉପସ୍ଥିତଥିଲେ । ମୁସଲମାନ ଝିଅକୁ ତାଙ୍କ ପୁଅ ବାହା ହେବା ଘଟଣା ଜାଣି ଦଳିତ ଯୁବକର ପରିବାରକୁ ଧମକ ଦେବାସହ ଯୁବକର ବାପାଙ୍କୁ ସର୍ବସମ୍ମୁଖରେ ଛେପ ଚାଟିବାକୁ ବାଧ୍ୟ କରିଥିବା ଅଭିଯୋଗ ହୋଇଛି । ଏନେଇ ଦଳିତ ଯୁବକଙ୍କ ବାପା ନିକଟସ୍ଥ ଥାନାରେ ଅଭିଯୋଗ କରିବା ପରେ ଖୁର୍ଜା ନଗର ଥାନା ଅଧିକାରୀ ଧାରା ୧୪୭, ୩୨୩ ଏବଂ ୫୦୬ ଅନୁଯାୟୀ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ପୋଲିସ କହିଛି ।