ପୁଣି ସକ୍ରିୟ ହେଲା ‘ଡି ଗ୍ୟାଙ୍ଗ’ ! ବ୍ୟବସାୟୀଙ୍କୁ ମିଳିଲା ହତ୍ୟା ଧମକ, ଦୁଇ ଅଭିଯୁକ୍ତଙ୍କୁ ଗିରଫ କଲା କମିଶନରେଟ ପୋଲିସ
କନକ ବ୍ୟୁରୋ : ଜେଲରେ ଡି ବ୍ରଦର୍ସ କିନ୍ତୁ ବାହାରେ ଖୁଲମଖୁଲା ତାଙ୍କ ନାମରେ ଚାଲିଛି ଦାଦାବଟି ଆଦାୟ । ଡି ବ୍ରଦର୍ସ ଓ ତାଙ୍କ ସହଯୋଗୀଙ୍କୁ ଗିରଫ ପରେ ମଧ୍ୟ ଏବେ ବି ସହରରେ ଡି ଲିଙ୍କ ସକ୍ରିୟ । ଗତକାଲି କଟକ ଜଗତପୁର ଅଂଚଳରୁ ଡି ବ୍ରଦର୍ସଙ୍କ ଆଉ ଦୁଇ ସହଯୋଗୀ କୁନ ଓ ଅଜୟକୁ ପୋଲିସ ଗିରଫ କରିବା ପରେ ସହରରେ ଏବେ ମଧ୍ୟ ଡି ଲିଙ୍କ ସକ୍ରିୟ ଥିବା କଥା ଅନୁମାନ କରାଯାଉଛି । ଯାହା କଟକବାସୀଙ୍କ ମନରେ ପୁଣିଥରେ ଛନକା ପୂରାଇଛି ।
Kanak News is now on WhatsApp
Join and get latest news updates delivered to you via WhatsApp
ବ୍ୟବସାୟୀଙ୍କୁ ହତ୍ୟା ଧମକ ପାଇଁ ଗତକାଲି ଦୁର୍ଦ୍ଦାନ୍ତ ଅପରାଧୀ କୁନ ଓରଫ କୁନା ଚନ୍ଦ୍ର ସ୍ୱାଇଁ ଏବଂ ଛୋଟୁ ଓରଫ ଅଜୟ ସିଂଙ୍କୁ ଗିରଫ କରିଛି ପୋଲିସ । କମିଶନରେଟ ପୋଲିସ ଠାରୁ ମିଳିଥିବା ସୂଚନା ଅନୁଯାୟୀ ଦୁଇ ଜଣଙ୍କ ନାମରେ ପୂର୍ବରୁ ସହରର ବିଭିନ୍ନ ଥାନାରେ ଦାଦାବଟି ଆଦାୟ ବେଆଇନ ଅସ୍ତ୍ରଶସ୍ତ୍ର କାରବାର ଭଳି ଏକାଧିକ ମାମଲା ରହିଛି । ସହରରେ ଡି ବ୍ରଦର୍ସଙ୍କ ଦ୍ୱାରା ଅନେକ ଅପରାଧିକ ଘଟଣାରେ ଏମାନଙ୍କର ପୂର୍ବରୁ ଲିଙ୍କ ଥିବା କଥା ମଧ୍ୟ ପୋଲିସକୁ ପ୍ରମାଣ ମିଳିଛି ।
କଟକ ଜଗତପୁର ଅଂଚଳରେ ଏକ ମଦ ଦୋକାନ ଖୋଲିବାକୁ ନେଇ ଜଣେ ବ୍ୟବସାୟୀଙ୍କୁ ହତ୍ୟା ଧମକ ଦେଇଥିଲେ କୁନ ଏବଂ ଛୋଟୁ । ପରେ ଏ ନେଇ ଥାନାରେ ଅଭିଯୋଗ ପରେ ପୋଲିସ ଏହି ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ସହରରେ ଡି ବ୍ରଦର୍ସଙ୍କ କିଛି ସହେଯାଗୀ ଏବେ ମଧ୍ୟ ସହରରେ ସକ୍ରିୟ ଥିବାରୁ ଛୋଟ ବଡ ଅପରାଧ ଏବେ ପୋଲିସ ପାଇଁ ମୁଣ୍ଡବିନ୍ଧା ର କାରଣ ପାଲଟିଛି ।