ବଙ୍ଗୋପସାଗରର ଲଘୁଚାପ ୨ଦିନରେ ନେଇପାରେ ଘୂର୍ଣ୍ଣିଝଡର ରୂପ : ବାତ୍ୟାର ନାଁ ରହିବ ‘ଭର୍ଦା’
କନକ ବ୍ୟୁରୋ : ଦକ୍ଷିଣ-ପୂର୍ବ ବଙ୍ଗୋପସାଗର ଏବଂ ଦକ୍ଷିଣ ଆଣ୍ଡାମାନ ସାଗରରେ ସୃଷ୍ଟ ଲଘୁଚାପ ଓଡିଶାର ଗୋପାଳପୁରଠାରୁ ଦକ୍ଷିଣ, ଦକ୍ଷିଣ-ପୂର୍ବ ଦିଗକୁ ୧୨ଶହ ୧୦ କିଲୋମିଟର ଦୂରରେ ରହିଛି । ସେହିପରି ଆନ୍ଧ୍ରପ୍ରଦେଶ ବିଶାଖାପଟନମଠାରୁ ୧୮୦ କିଲୋମିଟର ଦୂରରେ କେନ୍ଦ୍ରୀଭୂତ ହୋଇଛି । ବର୍ତମାନ ଏହା ଚେନ୍ନାଇର ପୋର୍ଟବ୍ଲେୟାରଠାରୁ ଦକ୍ଷିଣ, ଦକ୍ଷିଣ-ପଶ୍ଚିମକୁ ୩୧୦ କିଲୋମିଟର ଦୂରରେ ରହିଥିବା ଭାରତୀୟ ପାଣିପାଗ ବିଭାଗ କହିଛି ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୨୪ ଘଂଟା ମଧ୍ୟରେ ଏହା ଡିପ୍ ଡିପ୍ରେସନର ରୂପ ନେବା ସମ୍ଭାବନା ରହିଛି ଏବଂ ପରବର୍ତୀ ୨୪ ଘଂଟାରେ ଏହା ବାତ୍ୟାର ରୂପ ନେଇପାରେ ବୋଲି ପୂର୍ବାନୁମାନ କରିଛିି ଭାରତୀୟ ପାଣିପାଗ ବିଭାଗ । ବର୍ତମାନ ଏହି ଲଘୁଚାପ ଯୋଗୁଁ ଆଣ୍ଡାମାନ ନିକୋବର ଦ୍ୱୀପରେ ପ୍ରବଳ ବର୍ଷା ସହ ଜୋର ପବନ ବହୁଛି । ଆଗାମୀ ୪୮ ଘଂଟାରେ ଏହା ସାଇକ୍ଲୋନିକ ଷ୍ଟର୍ମର ରୂପ ନେଲେ ବର୍ଷାର ପରିମାଣ ଓ ପବନର ବେଗ ବଢିବା ଆଶଙ୍କା ରହିଛି ।
ଆଗାମୀ ଦିନରେ ସୃଷ୍ଟି ହେବାକୁ ଥିବା ବାତ୍ୟାର ଗତିପଥ ନେଇ ଆଇଏମଡି କୌଣସି ନିର୍ଦ୍ଧିଷ୍ଟ ଆକଳନ କରିନଥିବା ସୂଚନା ଦେଇଛନ୍ତି ପାଣିପାଗ ବିଜ୍ଞାନୀ ଡକ୍ଟର ମୃତ୍ୟୁଂଜୟ ମହାପାତ୍ର । ଆସନ୍ତା ୨ଦିନ ମଧ୍ୟରେ ଏହାର ପୂର୍ବାନୁମାନ କରାଯାଇପାରିବ ବୋଲି ସେ କହିଛନ୍ତି । କେଉଁ ଉପକୂଳ ଦେଇ ଏହି ବାତ୍ୟା ଗତି କରିବ ତାହା ବର୍ତମାନ କହିବା ସମ୍ଭବ ନୁହେଁ ବୋଲି ସେ ସୂଚନା ଦେଇଛନ୍ତି ।
ପାଣିପାର ସଂପର୍କରେ ପୂର୍ବାନୁମାନ କରୁଥିବା ଆଉଏକ ସଂସ୍ଥା ଆକ୍ୟୁ ୱେଦର କହିଛି, ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ବାତ୍ୟାର ରୂପ ନେଲେ ଏହାର ନାଁ ରହିବ ‘ଭର୍ଦା’ । ସଂସ୍ଥାର ପୂର୍ବାନୁମାନ ଅନୁଯାୟୀ ଏହା ଚଳିତ ସପ୍ତାହ ଶେଷ ଆଡକୁ ଭାରତ ଭୂଖଣ୍ଡ ଛୁଇଁବ । ଆଗାମୀ ଶନିବାର କିମ୍ବା ରବିବାର ସୁଦ୍ଧା ଏହା ଚେନ୍ନାଇରୁ ବିଶାଖାପାଟନମ ମଧ୍ୟରେ ସ୍ଥଳଭାଗକୁ ଛୁଇଁବା ଆଶଙ୍କା ରହିଛି ।
ଶନିବାର ରାତି ସୁଦ୍ଧା ଏହା ଉତର-ପଶ୍ଚିମ ଦିଗକୁ ଗତିକରି ଚେନ୍ନାଇ, ନେଲୋର, ଓଙ୍ଗଲୋ, କାକିନାଡା କିମ୍ବା ବିଶାଖପାଟନମର ଯେକୌଣସି ସ୍ଥାନରେ ସ୍ଥଳଭାଗକୁ ଛୁଇଁବା ଆଶଙ୍କା ରହିଛି । ଏହାର ପ୍ରଭାବରେ ଘଂଟାପ୍ରତି ସର୍ବାଧିକ ୧୩୦ କିଲୋମିଟର ବେଗରେ ପବନ ବହିବା ପୂର୍ବାନୁମାନ କରାଯାଉଛି । ସେହିପରି ବାତ୍ୟା କେନ୍ଦ୍ରସ୍ଥଳର ୧୦୦ କିଲୋମିଟର ପରିଧିରେ ପବନର ବେଗ ଅଧିକ ରହିବ ଓ ବ୍ୟାପକ କ୍ଷୟକ୍ଷତି କରିବ ବୋଲି ଆକ୍ୟୁୱେଦର କହିଛି ।
ଅନ୍ୟଏକ ଅନ୍ତର୍ଜାତୀୟ ପାଣିପାଗ ସଂସ୍ଥା ସ୍କାଏମେଟ କହିଛି ବଙ୍ଗୋପସାଗରରେ ସୃଷ୍ଟ ଲଘୁଚାପ ବାତ୍ୟା ‘ଭର୍ଦା’ର ରୂପ ନେଲେ ତାମିଲନାଡୁ ଉପକୂଳ ଛୁଇଁବାର ଯଥେଷ୍ଟ ସମ୍ଭାବନା ରହିଛି । ଯଦିଓ ଚେନ୍ନାଇର ପୋର୍ଟବ୍ଲେୟାରଠାରୁ ବର୍ତମାନ ଏହା ୩୧୦ କିଲୋମିଟର ଦକ୍ଷିଣ, ଦକ୍ଷିଣ-ପଶ୍ଚିମ ଦିଗକୁ ସ୍ଥିର ରହିଛି । କିନ୍ତୁ ଆଗାମୀ ଦିନରେ ଏହା ଉତର-ପଶ୍ଚିମକୁ ଗତି କରି ଚେନ୍ନାଇ ଉପକୂଳ ଛୁଇଁପାରେ ।
ଦେଖନ୍ତୁ ଏହି ଭିଡିଓ –