ସାଇକୋ କିଲର ସନ୍ଦେହରେ ଜଣେ ସନ୍ଦିଗ୍ଧ ଅଟକ: କଟକ ଡିସିପି କହିଲେ, ଗଂଜାମରୁ ନାରାୟଣ ସାହୁଙ୍କୁ ଅଟକ ରଖି କରାଯାଉଛି ପଚରାଉଚରା
କନକ ବ୍ୟୁରୋ: ସାଇକୋକିଲର ଆତଙ୍କ ଭିତରେ ଜଣେ ସନ୍ଦିଗ୍ଧକୁ ଅଟକ ରଖିଛି ପୋଲିସ । ଏନେଇ ସୂଚନା ଦେଇଛନ୍ତି କଟକ ଡିସିପି ଅଖିଳେଶ୍ୱର ସିଂହ । ସେ କହିଛନ୍ତି ଜଣେ ସନ୍ଦିଗ୍ଧକୁ ଅଟକ ରଖି ପଚରାଉଚରା କରାଯାଉଛି । ସନ୍ଦିଗ୍ଧର ଘର ଗଞ୍ଜାମ ଜିଲ୍ଳାରେ ଓ ତାର ନାଁ ନାରାୟଣ ସାହୁ । ତେବେ ସେହି ବ୍ୟକ୍ତି ସାଇକୋକିଲର କି ନାହିଁ ତାହା ସ୍ପଷ୍ଟ ହୋଇନାହିଁ । ଅଧିକ ତଦନ୍ତ ହେଲେ ସେହି ବ୍ୟକ୍ତି ସାଇକୋକିଲର କି ନାହିଁ ତାହା ସ୍ପଷ୍ଟ ହେବ । ୫ଟି ଟିମ୍ କରି ରାଜ୍ୟର ବିଭିନ୍ନ ସ୍ଥାନରେ ଛାନଭିନ୍ ଜାରି ରଖିଥିଲା ପୋଲିସ୍ ।
Kanak News is now on WhatsApp
Join and get latest news updates delivered to you via WhatsApp
ସିଲଭର୍ ସିଟିରେ ତିନି ତିନି ଜଣଙ୍କୁ ହତ୍ୟା କରି ସାରା ରାଜ୍ୟରେ ଚାଂଚଲ୍ୟ ସୃଷ୍ଟି କରିଥିବା ଷ୍ଟୋନମ୍ୟାନକୁ ଗତ ୨୪ ତାରିଖରୁ ଖୋଜୁଛି ପୋଲିସ୍ । ଧରିବା ପାଇଁ ଦିନ ରାତି ପାଟ୍ରୋଲିଙ୍ଗ କରିବା ସହ ସ୍ୱତନ୍ତ୍ର ଟିମ କରି ତଦନ୍ତ ଚଳାଇଛି । ଏପରିକି ଫୋରେନସିକ୍ ମେଡିସିନ୍ ସ୍ପେଶାଲିଷ୍ଟଙ୍କ ସହ ଆଲୋଚନା କରିଛି । ଏବଂ ଏହି ହତ୍ୟାକାଣ୍ଡର ପାରିପାଶ୍ୱର୍କ ସ୍ଥିତିରୁ ଏହା ଜଣେ ମାନସିକ ବିକାରଗ୍ରସ୍ତର କାର୍ଯ୍ୟ ବୋଲି ବାରମ୍ବାର କହି ଆସୁଛନ୍ତି ପୋଲିସ୍ କମିଶନର ।
ସାଇକୋ କିଲର ଜଣକ କିଛି ଦିନ ତଳେ କଟକରେ ତିନି ଜଣଙ୍କୁ ଏକ ଧାରୁଆ ଅସ୍ତ୍ରରେ ହାଣି ହତ୍ୟା କରିଥିଲା । ପ୍ରଥମେ ଗତ ୨୩ତାରିଖ ଦିନ ମଙ୍ଗଳାବାଗ ଥାନା ରାଣୀହାଟ କେନାଲ ରୋଡ ନିକଟରେ ଥିବା ଏକ ଚାଦୋକାନ ନିକଟରୁ ଜଣଙ୍କ ମୃତ ଦେହ ମିଳିିଥିଲା । ଏହାର ୨୪ଘଂଟା ମଧ୍ୟରେ ସମାନ ଢ଼ଙ୍ଗରେ ଆଉ ଦୁଇ ଜଣ ନିରାଶ୍ରୟଙ୍କୁ ଓଏମପି ଓଭରବ୍ରିଜ୍ ତଳେ ଏବଂ ପାରଳା ମହାରାଜା ଉଦ୍ୟାନରେ ହତ୍ୟା କରାଯାଇଥିଲା । ୨୪ତାରିଖ ସକାଳୁ ମୃତଦେହ ଜବତ କରିଥିଲା ପୋଲିସ୍ । ଦୁଇ ଦିନରେ ତିନୋଟି ହତ୍ୟାକାଣ୍ଡ ଘଟିବାରୁ ଏହା ସାରା ରାଜ୍ୟରେ ତୀବ୍ର ଆଲୋଡନ ସୃଷ୍ଟି କରିଥିଲା ।
ସେପଟେ କଟକ ସହରରେ ଷ୍ଟୋନମ୍ୟାନ ଆତଙ୍କକୁ ନେଇ ଚର୍ଚ୍ଚା ଥମି ନଥିବାବେଳେ ଯୋବ୍ରାରେ କେହି ଅଜଣା ଦୁବୃର୍ତ୍ତ ଜଣେ ମହିଳାଙ୍କ ବେକ କାଟି ଦେଇଛି । ତାଙ୍କ ନାମ ସନ୍ଧ୍ୟାରାଣୀ ବୋଲି ଜଣାପଡିଛି । ଗଲା ପାଂଚ ଦିନ ହେବ ସହରରେ ରହସ୍ୟମୟ ଷ୍ଟୋନମ୍ୟାନଙ୍କୁ ନେଇ ସହରବାସୀ ଆତଙ୍କିତ ଥିବାବେଳେ ଏହି ଘଟଣା ଭୟକୁ ବହୁଗୁଣିତ କରିଛି । ଗତକାଲି ରାତି ପ୍ରାୟ ୯ଟାବେଳେ ସନ୍ଧ୍ୟାରାଣୀ ଘର ଝରକା ପାଖରେ ବସିଥିଲେ । ସେହି ସମୟରେ ଜଣେ ଅଜଣା ଦୁବୃର୍ତ ଝରକା ଫାଙ୍କରେ ହାତ ପୂରାଇ ଧାରୁଆ ଅସ୍ତ୍ରରେ ତାଙ୍କ ବେକ କାଟି ଦେଇଥିଲା । ପରିବାର ଲୋକ ବାହାରକୁ ଆସି ଦେଖିବାବେଳକୁ ଦୁବୃର୍ତ ଫେରାର ହୋଇଯାଇଛି । ମାଲଗୋଦାମ ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଛି । ତେବେ କେହି ଚେନ ଲୁଟେରା ଏଭଳି କରିଥାଇ ପାରନ୍ତି ବୋଲି ସୂଚନା ଦେଇଛି ପୋଲିସ୍ ।