କନକ ବ୍ୟୁରୋ : ଲଗାଣ ବର୍ଷା ଏବଂ ବନ୍ୟା ଧୋଇ ନେଲା ଚାଷୀର ଆଶା । ଉଜୁଡିଗଲା ଫସଲ । ବନ୍ୟା ପାଣି ପଶି ଯିବାରୁ କେନ୍ଦ୍ରାପଡା ଜିଲ୍ଲାର ମାର୍ଶାଘାଇ ଓ ଗରଦପୁରରେ ନଷ୍ଟ ହୋଇଯାଇଛି ହେକ୍ଟର ହେକ୍ଟର ଜମିରେ ପନି ପରିବା ଫସଲ । ଚାଷ ଉଜୁଡି ଯିବା ପରେ ଶସ୍ତାରେ ବିକିଥିବା ପରିବାକୁ ଏବେ ବଜାରରୁ ଅଧିକ ଟଙ୍କା ଦେଇ କିଣୁଛି ଚାଷୀ ।

ମୁଣ୍ଡ ଝାଳ ତୁଣ୍ଡରେ ମାରି ଧାର କରଜ କରି ଚାଷି ନଦୀ ପଠାରେ ଚାଷ କରିଥିବା ପନିପରିବା ପାଣିରେ ବୁଡି ରହି ପଚି ନଷ୍ଟ ହେବା ସଙ୍ଗେ ସଙ୍ଗେ ଚାଷିର ଆର୍ଥିକ ମେରୁଦଣ୍ଡ ଦୋହଲାଇ ଦେଇଛି । ସେପଟେ ସ୍ଥାନୀୟ ଅଂଚଳରେ ଉତ୍ପାଦନ ବନ୍ଦ ହେବା ଫଳରେ ପନି ପରିବା ଦର ଏବେ ଆକାଶ ଛୁଆଁ । ପରିବା ବିକି ଦୁଇ ପଇସା ରୋଜଗାର କରିବ କଣ, ଅଧିକ ଦର ଦେଇ ଚାଷୀ କିଣୁଛି ପରିବା । କାରଣ ଲଗାଣ ବର୍ଷା ଏବଂ ବନ୍ୟା ଧୋଇ ନେଇଛି ତାର ପରିବା ଚାଷକୁ । ଜମିରେ ଫସଲ ନଷ୍ଟକୁ ଦେଖି ଭାଙ୍ଗି ପଡିଥିବା କେନ୍ଦ୍ରାପଡା ଜିଲ୍ଲା ମାର୍ଶାଘାଇ ଏବଂ ଗରଦପୁର ବ୍ଲକର ଚାଷୀ ଅଦର ଦରରେ ବଜାରରୁ ପରିବା କିଣୁଛନ୍ତି ।

ପନିପରିବା ଚାଷର ପେଣ୍ଠ ସ୍ଥଳ କୁହାଯାଉଥିବା ମାର୍ଶାଘାଇ ଏବଂ ଗରଦପୁର ବ୍ଲକରେ ଖରା ଏବଂ ବର୍ଷାଦିନିଆ ଚାଷ କରାଯାଇଥାଏ । ଏଠାରୁ ଉତ୍ପାଦିତ ପରିବା ଜିଲ୍ଲା ସମେତ ପଡୋଶୀ ଜିଲ୍ଲା ଜଗତସିଂପୁରର ପାରାଦ୍ୱୀପ, କଟକ ଏବଂ ଯାଜପୁର ଅଂଚଳକୁ ରପ୍ତାନି କରାଯାଇଥାଏ । କିନ୍ତୁ ବିଡମ୍ବନାର ବିଷୟ ଲଗାଣ ବର୍ଷା ଯୋଗୁଁ ଲୁଣା, କରାଣ୍ଡିଆ, ପାଇକା ଏବଂ ମହାନଦୀରେ ବନ୍ୟା ଆସିବାରୁ ନଦୀ ପଠାରେ ଚାଷ କରାଯାଇଥିବା ପୋଟଳ, ଭେଣ୍ଡି, କଲରା, ବାଇଗଣ , ଝୁଡଙ୍ଗ ଇତ୍ୟାଦି ଫସଲ ପଚିସଢ଼ି ନଷ୍ଟ ହୋଇଯାଇଛି ।

ମର୍ଶାଘାଇ ଏବଂ ଗରଦପୁରର ଚାଷୀ ଦିନେ ଯେଉଁ ପରିବାକୁ ବେପାରୀଙ୍କୁ ବିକ୍ରି କରୁଥିଲେ । ଆଜି ତାହାକୁ ଚଢ଼ା ଦରରେ କିଣି ଖାଉଛନ୍ତି । ପୂର୍ବରୁ ପୋଟଳ କିଲୋ ପ୍ରତି ୨୦ ଟଙ୍କା ଥିବା ବେଳେ ଏବେ ୬୦ ଟଙ୍କାରେ ପହଂଚିଛି । କେବଳ ପୋଟଳ ନୁହେଁ ଅନ୍ୟ ସବୁ ପରିବା ଦର ୩୦ ଟଙ୍କା ଉପରେ ରହିଛି । ଯାହାକୁ ନେଇ ଗ୍ରାହକ ଚିନ୍ତାରେ ପଡିଥିବା ବେଳେ ଚାଷୀକୂଳର ମେରୁଦଣ୍ଡ ଭାଙ୍ଗି ଯାଇଛି । କେନ୍ଦ୍ରାପଡା ଜିଲ୍ଲା ପ୍ରଶାସନ ବନ୍ୟା ଏବଂ ବର୍ଷା ଦ୍ୱାରା କ୍ଷତିଗ୍ରସ୍ତ ପରିବା ଚାଷୀଙ୍କୁ ଚିହ୍ନଟ କରି ସାହାଯ୍ୟ ସହୋଯୋଗ ଯୋଗାଇ ଦେବାକୁ ଦାବି ହେଉଛି ।