ବିଶ୍ୱକପ ୨୦୧୯: ଆଜି ଖେଳାଯିବ ଦୁଇଟି ମ୍ୟାଚ୍ । ଆୟୋଜକ ଇଂଲଣ୍ଡକୁ ସାମ୍ନା କରିବ ବାଂଲାଦେଶ, ସେପଟେ ନ୍ୟୁଜିଲାଣ୍ଡ-ଆଫଗାନିସ୍ତାନ ମଧ୍ୟରେ ଟକ୍କର ।
କନକ ବ୍ରୁରୋ: କ୍ରିକେଟ୍ ବିଶ୍ୱକପ୍ ୨୦୧୯ ଆଜି ଖେଳାଯିବ ଦୁଇଟି ମ୍ୟାଚ୍ । ଅପରାହ୍ନ ୩ ଟାରେ ଆୟୋଜକ ଇଂଲଣ୍ଡକୁ ଭେଟିବ ବାଂଲାଦେଶ । ସେପଟେ ସନ୍ଧ୍ୟା ୬ଟାରେ ପଏଣ୍ଟ ଟେବୁଲ ଟପର ନ୍ୟୁଜିଲାଣ୍ଡକୁ ସାମ୍ନା କରିବ ଆଫଗାନିସ୍ତାନ । ତେବେ ଲଣ୍ଡନର ସୋଫିଆ ଗ୍ରାଉଣ୍ଡରେ ମ୍ୟାଚ ନମ୍ବର ୧୨ରେ ମୁହଁମୁହିଁ ହେବେ ଇଂଲଣ୍ଡ ଏବଂ ବାଂଲାଦେଶ । ଏହି ପଡ଼ିଆ ବ୍ୟାଟିଂ ପିଚ୍ ହୋଇଥିଲେ ମଧ୍ୟ ଦୁଇ ପ୍ରତିଦ୍ୱନ୍ଦିଙ୍କ ମଧ୍ୟରେ କଡ଼ା ମୁକାବିଲା ହେବ ବୋଲି ଆଶା କରାଯାଉଛି । କାରଣ ବର୍ତ୍ତମାନ ବାଂଲାଦେଶର ବ୍ୟାଟିଂ ଅର୍ଡର ମଜବୁତ ରହିଛି । ତେଣୁ ଆୟୋଜକ ଇଂଲଣ୍ଡ ବାଂଲାଦେଶକୁ ହାଲକାରେ ନେବ ନାହିଁ ବୋଲି କ୍ରୀଡ଼ା ସମୀକ୍ଷକମାନେ ମତ ରଖୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ସନ୍ଧ୍ୟାରେ ମ୍ୟାଚ୍ ନମ୍ବର ୧୩ରେ ପଏଣ୍ଟ ଟେବୁଲ ଶୀର୍ଷ ସ୍ଥାନରେ ଥିବା ଶକ୍ତିଶାଳୀ ନ୍ୟୁଜିଲାଣ୍ଡକୁ ଭେଟିବ ପଏଣ୍ଟ ଟେବୁଲର ଶେଷ ସ୍ଥାନରେ ଥିବା ଆଫଗାନିସ୍ତାନ ଦଳ । ତେବେ ଶାନଦାର ଶନିବାରରେ ଏହି ମ୍ୟାଚ୍ ନମ୍ବର ୧୨ ଏବଂ ୧୩କୁ ଦେଖିବା ପାଇଁ କ୍ରିକେଟ୍ ପ୍ରେମୀଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି । କାରଣ ଗତକାଲି ପାକିସ୍ତାନ ଏବଂ ଶ୍ରୀଲଙ୍କା ମଧ୍ୟରେ ହେବାକୁଥିବା ମ୍ୟାଚ୍ ବର୍ଷା ଯୋଗୁଁ ବାତିଲ୍ ହୋଇଥିଲା । ତେଣୁ ଆଜିର ଦୁଇଟି ମ୍ୟାଚକୁ ଉପଭୋଗ କରିବା ପାଇଁ ଅପେକ୍ଷାରେ ରହିଛନ୍ତି କ୍ରୀଡ଼ା ପ୍ରେମୀ ।