କେଉଁ ଦେଶ ପାଖରେ ରହିଛି କେତେ ସଂଖ୍ୟାରେ ପରମାଣୁ ବୋମା ! ଋଷ ପ୍ରସ୍ତୁତ କରୁଛି ପାୱାରଫୁଲ ନ୍ୟୁକ୍ଲିୟର ବମ,ଶତ୍ରୁପକ୍ଷକୁ ଦେବ ଚକମା
ବିଶ୍ୱର ଅଧିକାଂଶ ଦେଶ ମଧ୍ୟରେ ଏବେ ତିକ୍ତତା ବଢ଼ିବାରେ ଲାଗିଛି । ଏପରିକି ଅନେକ ସମୟରେ ଦେଶ ଗୁଡ଼ିକ ମଧ୍ୟରେ ଯୁଦ୍ଧ ପରିସ୍ଥିତି ମଧ୍ୟ ଦେଖାଦେଉଛି । ଏପରିକି କିଛି ଦେଶ ଗୁଡ଼ିକ ପରମାଣୁ ଆକ୍ରମଣ କରିବାକୁ ମଧ୍ୟ ଧମକ ଦେବାକୁ ପଛାଉ ନାହାନ୍ତି । ପରମାଣୁ ଆକ୍ରମଣର ବିଭୀଷିକା ପୂରା ବିଶ୍ୱ ଦେଖିଥିଲେ ମଧ୍ୟ ଏଭଳି ଧମକ ଦେବାକୁ ଆଦୌ ପଛଘୁଞ୍ଚା ଦେଉନାହାନ୍ତି କିଛି ଦେଶ । ପରମାଣୁ ଆକ୍ରମଣ ହେଲେ ତାର ଭୟାବହ କଣ ରହିବ ତାହା ପୂରା ବିଶ୍ୱ ଜାଣିଛି । କିନ୍ତୁ କିଛି ଦେଶ ଏବେ ବିଶ୍ୱରେ ଯେଉଁଭଳି ଭାବେ ପରମାଣୁ ବମ ଧରି ଅସ୍ଥିରତା ସୃଷ୍ଟି କରୁଛନ୍ତି ତାହା ଏବେ ପୂରା ବିଶ୍ୱବାସୀଙ୍କ ପାଇଁ ଚିନ୍ତାର କାରଣ ପାଲଟିଛି । ଆଉ ଏସବୁ ଭିତରେ କେଉଁ ଦେଶ ପାଖରେ କେତେ ପରମାଣୁ ବୋମା ରହିଛି ତାହାର ଏକ ରିପୋର୍ଟ ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଷ୍ଟକହୋମର ଇଣ୍ଟରନ୍ୟାସନାଲ ପିସ୍ ରିସର୍ଚ୍ଚ ଇନଷ୍ଟିଚ୍ୟୁଟ ମୁତାବିକ, କେଉଁ ଦେଶ ପାଖରେ କେତେ ପରମାଣୁ ବୋମା ରହିଛି ତାହାର ଏକ ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟ ଅନୁଯାୟୀ, ପରମାଣୁ ଅସ୍ତ୍ର ସଂପନ୍ନ ଦେଶ ତାଲିକା ସୂଚୀରେ ଋଷ ଶୀର୍ଷ ସ୍ଥାନରେ ରହିଛି । ଋଷ ପାଖରେ ମୋଟ ୬୮୫୦ଟି ନ୍ୟୁକ୍ଲିୟର ବମ ରହିଛି । ଆମେରିକା ଏହି ତାଲିକାର ଦ୍ୱିତୀୟ ସ୍ଥାନରେ ରହିଛି । ଋଷ ଠାରୁ ୪୫୦ଟି କମ ନ୍ୟୁକ୍ଲିୟର ବମ ଆମେରିକା ପାଖରେ ରହିଛି । ଆମେରିକା ପାଖରେ ମୋଟ ୬୪୫୦ଟି ନ୍ୟୁକ୍ଲିୟର ବମ ରହିଛି । ଏହା ପଛକୁ ଫ୍ରାନ୍ସ ଓ ଚୀନ୍ ରହିଛନ୍ତି । ଫ୍ରାନ୍ସ ପାଖରେ ୩୦୦ଟି ପରମାଣୁ ବୋମା ରହିଥିବା ବେଳେ ଚୀନ ପାଖରେ ୨୮୦ଟି ପରମାଣୁ ବୋମା ରହିଛି । ତେବେ ଚୀନ ପାଖରେ ବାସ୍ତବରେ କେତୋଟି ପରମାଣୁ ବମ ରହିଛି ତାହା ଅସ୍ପଷ୍ଟ ରହିଛି ।
ସେହିଭଳି ଭାରତ ପାଖରେ ୧୪୦ଟି ଓ ପାକିସ୍ତାନ ପାଖରେ ୧୫୦-୧୬୦ଟି ପରମାଣୁ ବମ ଥିବା ଆଶଙ୍କା କରାଯାଉଛି । ଇଂଲଣ୍ଡ ପାଖରେ ୨୧୫ଟି ନ୍ୟୁକ୍ଲିୟର ବମ ରହିଥିବା ବେଳେ ଇସ୍ରାଏଲ ପାଖରେ ୮୦ଟି ଓ ପରମାଣୁ ପରୀକ୍ଷଣ ପାଇଁ ବିବାଦ ଘେରକୁ ଆସିଥିବା ଉତ୍ତର କୋରିଆ ପାଖରେ ୧୦ରୁ ୨୦ଟି ନ୍ୟୁକ୍ଲିୟର ବମ ଥିବା ଏହି ରିପୋର୍ଟରେ ଉଲ୍ଲେଖ ରହିଛି । ଏସବୁ ଭିତରେ ଋଷ ଦୁନିଆର ସବୁଠାରୁ ଶକ୍ତିଶାଳୀ ପରମାଣୁ ବମ ପ୍ରସ୍ତୁତ କରିଛି । ଋଷ ରାଷ୍ଟ୍ରପତି ଭ୍ଲାଦିମିର ପୁଟିନ ନିଜେ କହିଛନ୍ତି ଯେ, ଋଷ ଏଭଳି ଏକ ପରମାଣୁ ବମ ପରୀକ୍ଷଣ କରିଛି ଯାହା ବିଷୟରେ ଶତ୍ରୁପକ୍ଷର ମିସାଇଲ ଡିଫେନ୍ସ ସିଷ୍ଟମ ମଧ୍ୟ ଟିକିଏ ସୂଚନା ପାଇପାରିବ ନାହିଁ । ଅଥାର୍ତ ଋଷ ଯଦି କେଉଁ ଦେଶ ଉପରେ ପରମାଣୁ ଆକ୍ରମଣ କରେ ତେବେ ଏହା ବାବଦରେ ଟିକଏ ସୂଚନା ପାଇପାରିବେ ନାହିଁ ଶ୍ରତୁପକ୍ଷ ।
ପରମାଣୁ ବୋମାର ଲକ୍ଷ୍ୟଭେଦ ଉପରେ ନଜର ପକାଇବା ତେବେ, ଭାରତ ପାଖରେ ୫୦୦୦ କିଲୋମିଟର ଟାର୍ଗେଟକୁ ଲକ୍ଷ୍ୟଭେଦ କରି ପାରୁଥିବା ଅଗ୍ନି-୫ ମିସାଇଲ ରହିଛି । ଅଗ୍ନି-୫ ମିସାଇଲ ପରମାଣୁ ଅସ୍ତ୍ର ବହନ କରି ୫୦୦୦ କିମି ଟାର୍ଗେଟକୁ ବେଶ ସହଜରେ ଲକ୍ଷ୍ୟଭେଦ କରିପାରିବ । ଅଗ୍ନି-୫ ରାଡ଼ାରରେ ପୂରା ପାକିସ୍ତାନ ଆସୁଥିବା ବେଳେ ଚୀନର ପ୍ରମୁଖ ସହର ମଧ୍ୟ ରହୁଛି । ସେହି ତୁଳନାରେ ପାକିସ୍ତାନ ନିକଟରେ ୨୭୫୦ କିଲୋମିଟର ଲକ୍ଷ୍ୟଭେଦ କରି ପାରୁଥିବା ଶାହିନ-୩ ମିସାଇଲ ରହିଛି । କିନ୍ତୁ ଭାରତ ଓ ପାକିସ୍ତାନ ତୁଳନାରେ ଅଧିକ ଶକ୍ତିଶାଳୀ ରହିଛି ଚୀନ । ଚୀନ ନିକଟରେ ୧୪,୫୦୦ କିଲୋମିଟର ପର୍ଯ୍ୟନ୍ତ ଲକ୍ଷ୍ୟଭେଦ କରି ପାରୁଥିବା ଡ଼ୋଙ୍ଗଫେଙ୍ଗ-୪୧ ମିସାଇଲ ରହିଛି ।