କପା ପାଇଁ ଖପ୍ପା ! ଧାନ ପରେ କପା ବିକ୍ରି ନେଇ ଅସନ୍ତୋଷ । ମୂଲ୍ୟବୃଦ୍ଧି ଦାବିରେ ରାସ୍ତାକୁ ଓହ୍ଲାଇଲେ ଚାଷୀ, ବିଧାନସଭାରେ ତାତି ।
କନକ ବ୍ୟୁରୋ: ଧାନ ପରେ ଚିନ୍ତା ବଢ଼ାଇଲା କପା । ମୂଲ୍ୟବୃଦ୍ଧି ପାଇଁ ରାସ୍ତାରେ ଚାଷୀ, ଗୃହରେ ତାତି । କପାର ମୂଲ୍ୟବୃଦ୍ଧି ଦାବିରେ ରାଜରାସ୍ତାକୁ ଓହ୍ଲାଇଛନ୍ତି ଚାଷୀ । ୧୦ ଦଫା ଦାବି ନେଇ ଭାରତ କୃଷକ ମହାସଭା ପକ୍ଷରୁ ହୋଇଛି ବଡ଼ ପ୍ରତିବାଦ । କପା କ୍ୱିଂଟାଲ ପିଛା ୮ ହଜାର ଟଙ୍କା ଧାର୍ଯ୍ୟ କରିବାକୁ ଦାବି କରିବା ସହ ଦଲାଲଙ୍କ ଉପରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଚାଷୀ । ଏକ ବିଶାଳ ଶୋଭାଯାତ୍ରାରେ ଶହ ଶହ ଚାଷୀ ବାହାରି ସହର ପରିକ୍ରମା କରିବା ସହ ବିକ୍ଷୋଭ ପ୍ରଦର୍ଶନ କରିଛନ୍ତି
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ପଟେ କପା ପାଇଁ ଚାଷୀ ରାସ୍ତାକୁ ଓହ୍ଲାଇଥିବା ବେଳେ ବିଧାନସଭାରେ କପା ଚାଷୀଙ୍କ କଥା ଉଠାଇଛନ୍ତି ଖଣ୍ଡପଡ଼ା ବିଧାୟକ । କପା ଚାଷୀଙ୍କ ସମସ୍ୟା ଉତଥାପନ କରି ଖଣ୍ଡପଡା ବିଧାୟକ ସୌମ୍ୟରଞ୍ଜନ ପଟ୍ଟନାୟକ କହିଛନ୍ତି ଲାଭଜନକ ଫସଲକୁ ପ୍ରୋତ୍ସାହିତ କରାଯିବା ଉଚିତ । ସୁବର୍ଣ୍ଣପୁର ଜିଲ୍ଲାର ଉଦାହରଣ ରଖି ସୌମ୍ୟରଞ୍ଜନ କହିଛନ୍ତି କି ଜିଲ୍ଲାରେ ୬୦ ଭାଗ ଧାନ ଚାଷ ହେଉଥିବା ବେଳେ ୪୦ ଭାଗ କପା ଚାଷ ହେଉଛି । କପାର ସର୍ବନିମ୍ନ ସହାୟକ ମୂଲ୍ୟ ୫ ହଜାର ୫ ଶହ ଟଙ୍କା ରହିଛି । କିନ୍ତୁ ଚାଷୀ କେମିତି କପା ବିକ୍ରି କରିବେ ସେନେଇ କେହି ଆଗ୍ରହ କିମ୍ବା ଉଦବେଗ ପ୍ରକାଶ କରୁନାହାନ୍ତି । ଗତ ୨୦ ତାରିଖରୁ କପା ମଣ୍ଡି ଖୋଲିବାକୁ ଘୋଷଣା ହୋଇଥିଲେ ମଧ୍ୟ ତାହା ବର୍ତ୍ତମାନ ଯାଏଁ ଖୋଲିନି । ଫଳରେ କପା ଚାଷୀ ଅଭାବୀ ବିକ୍ରିର ଶିକାର ହେଉଛନ୍ତି ।
ଆଗକୁ ଥଣ୍ଡା ବଢ଼ିଲେ ଆଦ୍ରତା ବୃଦ୍ଧି ପାଇବା ସହ କପାର ମାନ କମିବାର ଆଶଙ୍କା ରହିଛି । ତେଣୁ ତୁରନ୍ତ ଏ ଦିଗରେ ସରକାର ଧ୍ୟାନ ଦେବାକୁ ଦାବି କରିଛନ୍ତି ବିଧାୟକ ସୌମ୍ୟରଞ୍ଜନ ପଟ୍ଟନାୟକ ।