ଟିମ୍ ଇଣ୍ଡିଆର ଗେରୁଆ ଜର୍ସିକୁ ନେଇ ଜୋର ଧରିଲା ରାଜନୀତି । ବିରୋଧ କଲେ କଂଗ୍ରେସ ଓ ସମାଜବାଦୀ ପାର୍ଟି, ସ୍ପଷ୍ଟୀକରଣ ଦେଲା ଆଇସିସି
ବିଶ୍ୱକପ ୨୦୧୯ରେ ଟିମ୍ ଇଣ୍ଡିଆ ଜବରଦସ୍ତ ପ୍ରଦର୍ଶନ କରୁଥିବା ବେଳେ ଏବେ ଏହାର ଜର୍ସିକୁ ନେଇ ରାଜନୀତି ଆରମ୍ଭ ହୋଇଛି । ଇଂଲଣ୍ଡ ବିପକ୍ଷରେ ବିରାଟ ବାହିନୀ ଯେଉଁ ଜର୍ସି ପିନ୍ଧି ମୈଦାନକୁ ଓହ୍ଲାଇବ ତାହାକୁ କଂଗ୍ରେସ ଓ ସମାଜବାଦୀ ପାର୍ଟି ବିରୋଧ କରିବା ଆରମ୍ଭ କରିଛନ୍ତି । କାରଣ ଇଂଲଣ୍ଡ ବିପକ୍ଷରେ ଟିମ୍ ଇଣ୍ଡିଆ ବ୍ଲୁ ସହ ଗେରୁଆ ରଙ୍ଗର ଜର୍ସି ପିନ୍ଧି ମୈଦାନକୁ ଓହ୍ଲାଇବ । ଆଉ ଭାରତର ଏହି ଜର୍ସି ପଛରେ ମୋଦି ସରକାରର ହାତ ଥିବା କହିଛି କଂଗ୍ରେସ ଓ ସମାଜବାଦୀ ପାର୍ଟି । ଏପରିକି କ୍ରିକେଟରେ ମଧ୍ୟ କେନ୍ଦ୍ର ସରକାର ଗେରୁଆ ରଙ୍ଗ ରାଜନୀତିକୁ ପୁରାଉଥିବା ଅଭିଯୋଗ କରିଛନ୍ତି ଉଭୟ ଦଳ ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ନେତା ନସୀମ ଖାନ କହିଛନ୍ତି, ମୋଦି ସରକାର ଯେବେଠୁ ଶାସନ କ୍ଷମତାକୁ ଆସିଛନ୍ତି ସେବେଠାରୁ ଗେରୁଆ ରଙ୍ଗକୁ ନେଇ ରାଜନୀତି ଆରମ୍ଭ ହୋଇଛି । ସେହିଭଳି ମହାରାଷ୍ଟ୍ରର କଂଗ୍ରେସ ବିଧାୟକ ଏମଏ ଖାନ କହିଛନ୍ତି, ଏହି ସରକାର ପ୍ରତ୍ୟେକ ଜିନିଷକୁ ଅଲଗା ନଜରରେ ଦେଖିବା ସହ ଅନ୍ୟମାନଙ୍କୁ ମଧ୍ୟ ଦେଖାଇବାକୁ ପ୍ରୟାସ କରୁଛି । ସେହିଭଳି ସପା ନେତା ଅବୁ ଆସିମ ଆଜମୀ କହିଛନ୍ତି, ପ୍ରଧାନମନ୍ତ୍ରୀ ପୂରା ଦେଶକୁ ଗେରୁଆ ରଙ୍ଗରେ ରଙ୍ଗୀନ କରିବାକୁ ଚାହୁଁଛନ୍ତି । ତ୍ରିରଙ୍ଗାରେ ଅନ୍ୟ ରଙ୍ଗ ମଧ୍ୟ ରହିଛି, କିନ୍ତୁ ଗେରୁଆ ରଙ୍ଗକୁ କାହିଁକି ବଛାଗଲା । ଟିମ୍ ଇଣ୍ଡିଆର ଜର୍ସି ଯଦି ତ୍ରିରଙ୍ଗା ରଙ୍ଗ ଭଳି ହୋଇଥାନ୍ତା ତେବେ ବେଶ ଭଲ ହୋଇଥାନ୍ତା ।
ତେବେ ଭାରତର ଏହି ଜର୍ସିକୁ ବିଜେପି ସମର୍ଥନ କରିଛି । ବିଜେପି ନେତା ରାମ କଦମ କହିଛନ୍ତି, ଗେରୁଆ ରଙ୍ଗକୁ ନେଇ ବିରୋଧୀ କାହିଁକି ସବୁବେଳେ ଆପତ୍ତି କରୁଛନ୍ତି । ଟିମ୍ ଇଣ୍ଡିଆର ଜର୍ସିକୁ ନେଇ ରାଜନୀତି ନ କରାଯାଉ । ଏହି ରଙ୍ଗ ରାଜନୀତିରୁ ଖେଳକୁ ଦୂରେଇ ରଖାଯାଉ ବୋଲି କହିଛନ୍ତି ବିଜେପି ନେତା ।
ଏସବୁ ଭିତରେ ଏହି ମାମଲାରେ ଆଇସିସି ସ୍ପଷ୍ଟୀକରଣ ଦେଇଛି । ବସିସିଆଇକୁ ଜର୍ସି ପାଇଁ ବିଭିନ୍ନ ରଙ୍ଗର ବିକଳ୍ପ ଦିଆଯାଇଥିଲା । କିନ୍ତୁ ଭାରତର ଜର୍ସି ସହ ଗେରୁଆ ରଙ୍ଗ ମ୍ୟାଚ କରୁଥିବାରୁ ଏହି ବିକଳ୍ପକୁ ବାଛିଥିଲା ବିସିସିଆଇ । ଏହି ନୂଆ ଜର୍ସିର ଡିଜାଇନ ଭାରତର ପୁରୁଣା ଟି-୨୦ ଜର୍ସି ସହ ମେଳ ଖାଉଛି । ଏଥିରେ ମଧ୍ୟ ସେତେବେଳେ ନାରଙ୍ଗୀ ରଙ୍ଗ ରହିଥିଲା । ଆଇସିସି କହିଛି ଏହି ଜର୍ସିକୁ ଡିଜାଇନ କରିଥିବା ଡିଜାଇନର ଏବେ ଆମେରିକାରେ । ନୂଆ ଜର୍ସିରେ ନୂଆ ରଙ୍ଗର ବ୍ୟବହାର କରାଯାଇନାହିଁ । ତେବେ ଇଂଲଣ୍ଡ ଖେଳାଳିଙ୍କ ଠାରୁ ଭିନ୍ନ ଦେଖାଯିବା ପାଇଁ ଜର୍ସିକୁ ଡିଜାଇନ କରାଯାଇଛି ।