କାହାକୁ ମିଳିବ କେତେ ସିଟ୍, କ’ଣ ହେବ ବିଜେଡିର ଆଭିମୁଖ୍ୟ? ଗଣତି ପୂର୍ବରୁ ଆରମ୍ଭ ହେଲା ଚର୍ଚ୍ଚା
ସୂର୍ଯ୍ୟ ପାତ୍ର କହିଲେ, ପ୍ରଧାନମନ୍ତ୍ରୀ ହେବା ପାଇଁ ଯୋଗ୍ୟ ନବୀନ; ନିରଂଜନଙ୍କ ମତ, ୟୁପିଏ ସରକାର ଗଢ଼ିଲେ ନବୀନ ଦେଇପାରନ୍ତି ସମର୍ଥନ
କନକ ବ୍ୟୁରୋ: ଦେଶରେ ଅନ୍ତିମ ପର୍ଯ୍ୟାୟ ନିର୍ବାଚନ ବାକି ଥିବା ବେଳେ କିଏ ହେବ ଭାରତବର୍ଷର ପରବର୍ତି ପ୍ରଧାନମନ୍ତ୍ରୀ ତାକୁ ନେଇ ଚାଲିଛି ଅଙ୍କକଷା । ଏହାରି ଭିତରେ ୟୁପିଏ, ଏନଡିଏ ଓ ଫେଡରାଲ ଫ୍ରଂଟ ମଧ୍ୟ ବିଭିନ୍ନ ଆକଳନ କରିବା ସହ ନୂଆ ନୂଆ ସମୀକରଣ ସାମ୍ନାକୁ ଆସୁଛି । କିନ୍ତୁ ଜାତୀୟ ରାଜନିତିରେ ବିଜେଡି ଉପରେ ସମସ୍ତେ ଫୋକସ ରହିଛି । ନବୀନ କାହା ଆଡକୁ ଢଳିବେ ଆଉ କାହାକୁ ସମର୍ଥନ କରିବେ ତାକୁ ନେଇ ତର୍ଜମା ଚାଲିଥିବା ବେଳେ ବିଜେଡିର ଉପସଭାପତି ସୂର୍ଯ୍ୟ ନାରାୟଣ ପାତ୍ର ସିଧା ସିଧା କହିଛନ୍ତି ନବୀନ ହେଉଛନ୍ତି ଭାରତବର୍ଷର ପ୍ରଧାନମନ୍ତ୍ରୀ ହେବା ପାଇଁ ଯୋଗ୍ୟ ପ୍ରାର୍ଥୀ ।
Kanak News is now on WhatsApp
Join and get latest news updates delivered to you via WhatsApp
ଦିଲ୍ଲୀ ସିଂହାସନରେ କିଏ ବସିବ, ସରକାର ଗଠନରେ ଆଂଚଳିକ ଦଳର ଭୂମିକା କ’ଣ ହେବ, ଏହି ଆକଳନ ଚାଲିଥିବା ବେଳେ ବିଜେଡି ଉପସଭାପତି ସୂର୍ଯ୍ୟ ପାତ୍ର କହିଛନ୍ତି, ପ୍ରଧାନମନ୍ତ୍ରୀ ପଦ ପାଇଁ ନବୀନ ଯୋଗ୍ୟ ନେତା । ସେ କହିଛନ୍ତି, ଦଳ ଏବେ ସମଦୂରତ୍ୱ ନୁହେଁ, ଓଡ଼ିଶାର ସ୍ୱାର୍ଥକୁ ପ୍ରାଥମିକତା ଦେବ । ତେବେ କଂଗ୍ରେସ ସମର୍ଥନରେ ପ୍ରଧାନମନ୍ତ୍ରୀ ହେବା ଠିକ୍ ନୁହେଁ ବୋଲି କହିଛନ୍ତି ସୂର୍ଯ୍ୟ ପାତ୍ର । ସେପଟେ ପିସିସି ସଭାପତି ନିରଂଜନ ପଟ୍ଟନାୟକ କହିଛନ୍ତି, ୟୁପିଏ ସରକାର ଗଢ଼ିଲେ ନବୀନ ଆମ ସହ ରହିବେ । କେନ୍ଦ୍ରରେ ସରକାର ଗଢ଼ୁଥିବା ଦଳକୁ ନବୀନ ସମର୍ଥନ ଦେବେ ବୋଲି ନବୀନ ଇସାରା ଦେଇଥିବା କହିଛନ୍ତି ନିରଂଜନ ।
ସେହିପରି ବିଜେଡି ନେତା ଅମର ଶତପଥୀ କହିଛନ୍ତି, କେନ୍ଦ୍ରରେ କେହି ସଂଖ୍ୟା ଗରିଷ୍ଠତା ପାଇବେ ନାହିଁ । ତେଣୁ ବିଜେଡିର ସହଯୋଗ ନେବାକୁ ଉଭୟ ଏନଡିଏ ଓ ୟୁପିଏ ପ୍ରୟାସ କରିବେ । ତେବେ ବିଜେପି ନେତା ପୃଥ୍ୱୀରାଜ ହରିଚନ୍ଦନଙ୍କ ମତ ଅଲଗା । ସେ କହିଛନ୍ତି ପୂର୍ଣ୍ଣ ବହୁମତରେ ସରକାର ଗଢ଼ିବ ଏନଡିଏ । ସେହିପରି ବିଜେଡି ମୁଖପାତ୍ର ସସ୍ମିତ ପାତ୍ରଙ୍କ ଆକଳନ, କେନ୍ଦ୍ରରେ ସରକାର ଗଠନରେ ବିଜେଡିର ବଳିଷ୍ଠ ଭୂମିକା ରହିବ । ମେ’ ୨୩ ଭୋଟ ଗଣତି ପରେ ଦଳର ଆଭିମୁଖ୍ୟ କ’ଣ ରହିବ ନିଷ୍ପତି ନିଆଯିବ ।
ତେବେ ପୂର୍ବତନ ଅର୍ଥମନ୍ତ୍ରୀ ତଥା କଂଗ୍ରେସ ନେତା ପଂଚାନନ କାନୁନଗୋଙ୍କ ମତରେ ମୋଦୀ ସରକାର ଯେତେବେଳେ ସମସ୍ୟାରେ ପଡ଼ିଛନ୍ତି, ସହଯୋଗ ଦେଇ ଆସିଛନ୍ତି ନବୀନ । ରବିବାର ଦେଶରେ ହେବ ଶେଷ ପର୍ଯ୍ୟାୟ ନିର୍ବାଚନ । ଆଉ ସେହି ସଂଧ୍ୟାରେ ଆରମ୍ଭ ହୋଇଯିବ ବୁଥ ବାହୁଡ଼ା ମତ ଉପରେ ଚର୍ଚ୍ଚା । ତେବେ ଏହା ପୂର୍ବରୁ କିଏ କେତେ ଆସନ ପାଇବ, କିଏ ସରକାର ଗଢ଼ିବ, କିଏ ପ୍ରଧାନମନ୍ତ୍ରୀ ହେବ, ଏ ନେଇ ଆଲୋଚନା ସରଗରମ ହେବାରେ ଲାଗିଛି ।