କନକ ବ୍ୟୁରୋ : ବର୍ତ୍ତମାନ ବିଧାୟକ ଥିବା ସମସ୍ତ ପ୍ରାର୍ଥୀଙ୍କୁ ଟିକେଟ୍ ଦେବ କଂଗ୍ରେସ । ହେଲେ ଗତ ନିର୍ବାଚନରେ ଅମାନତ୍ ହରାଇଥିବା ପ୍ରାର୍ଥୀଙ୍କୁ ୨୦୧୯ ନିର୍ବାଚନ ଲଢିବାକୁ ଟିକେଟ୍ ମିଳିବ ନାହିଁ । କଂଗ୍ରେସର ନିର୍ବାଚନ କମିଟି ବୈଠକରେ ଏଭଳି ନିଷ୍ପତି ନିଆଯାଇଛି । ପ୍ରାର୍ଥୀ ଚୟନ ପାଇଁ ଗାଇଡଲାଇନ ପ୍ରସ୍ତୁତି ଚାଲିଥିବା ବେଳେ ଏଥର ମହିଳା ଓ ଯୁବ ପ୍ରାର୍ଥୀଙ୍କୁ ଗୁରୁତ୍ୱ ଦିଆଯିବ କହିଛନ୍ତି ପିସିସି ସଭାପତି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ତୃତୀୟ ସ୍ଥାନକୁ ଚାଲି ଯାଇଥିବା କଂଗ୍ରେସ, ପୁଣି ଥରେ ପୂର୍ବ ଗୌରବ ଫେରାଇ ଆଣିବାକୁ ଆରମ୍ଭ କରି ଦେଇଛି ଜୋରଦାର ଉଦ୍ୟମ । ଉଭୟ ବିଜେଡି ଓ ବିଜେପିକୁ ପଛରେ ପକାଇ ୨୦୧୯ ପ୍ରସ୍ତୁତିକୁ ତ୍ୱରାନ୍ୱିତ କରିଛି ନିରଂଜନଙ୍କ ବାହିନୀ । ଦଳ ପକ୍ଷରୁ କେଉଁମାନେ ଏଥର ନିର୍ବାଚନ ମଇଦାନକୁ ଓହ୍ଲାଇବେ ବେଶ ଆଗୁଆ ତାଲିକା ପ୍ରସ୍ତୁତ କରୁଛି । ଏଥର କିନ୍ତୁ ଦାନପାତ୍ରରେ ଦାନ ଦେବା ଭଳି ଟିକେଟ୍ ବାଂଟିବ ନାହିଁ କଂଗ୍ରେସ । ଯେଉଁ ପ୍ରାର୍ଥୀମାନେ ୨୦୧୪ ନିର୍ବାଚନରେ ଅମାନତ ହରାଇଛନ୍ତି, ତାଙ୍କୁ ମିଳିବନାହିଁ ଟିକେଟ୍ । ତେବେ ଯେଉଁମାନେ ବିଜେଡିର ଜବରଦସ୍ତ ହାୱା ସତ୍ୱେ ଗତ ନିର୍ବାଚନରେ ବିଜୟର ଟିକା ପିନ୍ଧିଥିଲେ ସେମାନେ ପୁଣି ଥରେ ଦଳର ପ୍ରାର୍ଥୀ ହେବା ପକ୍କା । ଅର୍ଥାତ ୧୫ ଜଣ ଯାକ କଂଗ୍ରେସ ବିଧାୟକ ୨୦୧୯ ନିର୍ବାଚନରେ ପ୍ରାର୍ଥୀ ହେବେ ।
୨୦୧୪ ନିର୍ବାଚନରେ କଂଗ୍ରେସର ୪୦ ଜଣ ପ୍ରାର୍ଥୀ ଅମାନତ ହରାଇଥିଲେ । ସେମାନଙ୍କୁ ଆଉ ଥରେ ଟିକେଟ୍ ଦେବାକୁ ନାରାଜ କଂଗ୍ରେସ ନିର୍ବାଚନ କମିଟି । ୨୦୦୯ ତୁଳନାରେ ୨୦୧୪ରେ ଦଳର ପ୍ରଦର୍ଶନ ନୈରାଶ୍ୟଜନକ ଥିଲା । ପାଖାପାଖି ୬ ପ୍ରତିଶତ ଭୋଟ କମିଥିବା ବେଳେ ୧୧ଟି ଆସନ ହରାଇଥିଲା ଦଳ ।
୨୦୧୯ ପ୍ରାର୍ଥୀ ଚୟନରେ ମହିଳା ଓ ଯୁବ ପ୍ରାର୍ଥୀଙ୍କୁ ଗୁରୁତ୍ୱ ଦେବାକୁ ସ୍ଥିର କରିଛି କଂଗ୍ରେସ । ଯେଉଁ ପ୍ରାର୍ଥୀଙ୍କ ବିଜୟ ସମ୍ଭାବନା ଅଧିକ ଥିବ ସେମାନଙ୍କୁ ଟିକେଟ ଦିଆଯିବ । ଲୋକଙ୍କ ସହ ଯୋଡି ହୋଇ ରହିଥିବା ଓ ଦୃଢ ସଂଗଠନ ଥିବା ପ୍ରାର୍ଥୀଙ୍କୁୁ ୨୦୧୯ ନିର୍ବାଚନ ମଇଦାନରେ ଦେଖିବାକୁ ମିଳିବ ବୋଲି କହିଛି କଂଗ୍ରେସ ନିର୍ବାଚନ କମିଟି ।
ପିସିସି ସଭାପତି ନିରଂଜନ ପଟ୍ଟନାୟକଙ୍କ ନେତୃତ୍ୱରେ ୨୧ ଜଣିଆ କଂଗ୍ରେସର ନିର୍ବାଚନ କମିଟି ବୈଠକରେ ପ୍ରାର୍ଥୀ ଚୟନ ପାଇଁ ଗାଇଡଲାଇନ ପ୍ରସ୍ତୁତ ହୋଇଛି । ଆଉ ଏହା ସହ ୨୦୧୯ ନିର୍ବାଚନ ପାଇଁ ରଣନୀତି ମଧ୍ୟ ପ୍ରସ୍ତୁତ କରିଛି ଦଳ । ଦଳୀୟ ଟିକେଟ ନେଇ ବୈଠକରେ ପ୍ରସ୍ତାବ ପାରିତ ହୋଇଛି, ଦଳର ଅଧ୍ୟକ୍ଷ ରାହୁଲ ଗାନ୍ଦୀଙ୍କ ଅନୁମୋଦନ ପରେ ଆସନ୍ତା ୧୫ ଦିନ ମଧ୍ୟରେ ପ୍ରଥମ ପର୍ଯ୍ୟାୟରେ ୫୦ ଜଣ ପ୍ରାର୍ଥୀଙ୍କ ନାଁ ଘୋଷଣା କରାଯିବ । କଂଗ୍ରେସ ଏଭଳି ଆଗୁଆ ପ୍ରସ୍ତୁତିକୁ ନେଇ ରାଜ୍ୟ ରାଜନୀତି ସରଗରମ ହୋଇଛି ।