କନକ ବ୍ୟୁରୋ: ଜୟପୁରରେ କଂଗ୍ରେସ ସଙ୍କଳ୍ପ ସମାବେଶରେ ମୋଦିଙ୍କୁ ନିଶାନା କଲେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ । ଜନସମାବେଶରେ (ହାଲ୍) ପ୍ରସଙ୍ଗ ଉଠାଇ ରାହୁଲ କହିଛନ୍ତି ଯେ, ଦୀର୍ଘ ୭୦ ବର୍ଷ ହେବ ବାୟୁସେନାଙ୍କ ପାଇଁ (ହାଲ୍) ଠାରେ ବିମାନ ନିର୍ମାଣ କରାଯାଉଛି । ବିଶେଷ କରି କୋରାପୁଟ ଠାରେ ଥିବା ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ ବା (ହାଲ୍) ବାୟୁସେନା ବିମାନ ପ୍ରସ୍ତୁତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଆସୁଛି । ମିଗ୍ ଏବଂ ସୁଖୋଇ ଭଳି ଲଢୁଆ ବିମାନର ଇଂଜିନ୍ କୋରାପୁଟର (ହାଲ୍) ଠାରେ ନିର୍ମାଣ କରାଯାଉଛି । ଏହା ଦର୍ଶାଉଛି ଦେଶର ସୁରକ୍ଷା ପଛରେ ଓଡ଼ିଶାର ଯୁବକଙ୍କ ହାତ ଯଥେଷ୍ଟ ପରିମାଣରେ ରହିଛି । କିନ୍ତୁ ପ୍ରଧାନମନ୍ତ୍ରୀ ଦେଶକୁ ସୁରକ୍ଷା ଦେବାକୁ କହୁଥିବାବେଳେ ବାୟୁସେନାଙ୍କ ପଇସା ନେଇ ମୋଦି ତାଙ୍କ ବନ୍ଧୁ ଅନିଲ୍ ଅମ୍ବାନୀଙ୍କୁ ଦେଉଥିବା ଅଭିଯୋଗ କରିଛନ୍ତି ରାହୁଲ ।
Kanak News is now on WhatsApp
Join and get latest news updates delivered to you via WhatsApp
ଏପରିକି (ହାଲ୍) ୭୦ ବର୍ଷ ହେବ ବାୟୁସେନାଙ୍କ ପାଇଁ ବିମାନ ନିର୍ମାଣ କରୁଥିବାବେଳେ (ହାଲ) ଉପରେ ଏଯାବତ୍ କୌଣସି ଋଣ ଭାର ନାହିଁ । ପୂର୍ବରୁ କେବେ ବିମାନ ନିର୍ମାଣ କରି ନଥିବା ଅନିଲ ଅମ୍ବାନୀଙ୍କୁ ମୋଦି ଅନୁକମ୍ପା ଦେଖାଉଛନ୍ତି । କାରଣ ୟୁପିଏ ସରକାର ସମୟରେ ବାୟୁସେନା ପାଇଁ ୫୨୬ କୋଟି ଟଙ୍କା ହିସାବରେ ୧୨୬ଟି ରାଫେଲ୍ ବିମାନ (ହାଲ୍)ରେ ନିର୍ମାଣ କରିବାକୁ ନିଷ୍ପତି ନିଆଯାଇଥିଲା । କିନ୍ତୁ ଯେତେବେଳେ ନରେନ୍ଦ୍ର ମୋଦି ଦେଶର ପ୍ରଧାନମନ୍ତ୍ରୀ ହେଲେ ସେତେବେଳେ ଏହି ବିମାନ ଗୁଡ଼ିକ ନିର୍ମାଣ (ହାଲ୍)ରୁ ପ୍ରତ୍ୟାହାର କରି ଅନିଲ୍ ଅମ୍ବାନୀଙ୍କୁ କଣ୍ଟ୍ରାକ୍ଟ ଦିଆଯାଇଛି । ଏପରିକି ୪୫ ହଜାର କୋଟି ଋଣ ଭାରଥିବା ଅନିଲ ଅମ୍ବାନୀଙ୍କ ଠାରୁ ଏହି ବିମାନ ୫୨୬ କୋଟି ଟଙ୍କା ହିସାବରେ ୧୬୦୦ କୋଟି ଟଙ୍କା ଦେଇ ବିମାନ କିଣିବାକୁ ନିଷ୍ପତି ନେଇଛନ୍ତି ମୋଦି ।
ସେପଟେ ଫ୍ରାନ୍ସ ରାଷ୍ଟ୍ରପତିଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ, ଏହି ବିମାନ ଗୁଡ଼ିକ (ହାଲ)ରେ ନକରି ଫ୍ରାନ୍ସରେ ନିର୍ମାଣ କରାଯିବ । ଆଉ ଏହାର ଟେଣ୍ଡର ଅନିଲ ଅମ୍ବାନୀଙ୍କୁ ହିଁ ମିଳିବ । ମୋଦିଙ୍କ ଏଭଳି ନିଷ୍ପତି ଫ୍ରାନ୍ସ ସରକାର ଓ ଅନିଲ ଅମ୍ବାନୀଙ୍କୁ ମୁନାଫା ଦେବ କିନ୍ତୁ ଓଡ଼ିଶାର ଯୁବକ ବେକାରୀ ହୋଇ ରହିଯିବେ ସେମାନଙ୍କ ଭାଗ୍ୟ ସହିତ ଖେଳ ଖେଳୁଛନ୍ତି ମୋଦି ସରକାର ବୋଲି କହି ବର୍ଷିଛନ୍ତି ରାହୁଲ ।