କନକ ବ୍ୟୁରୋ: କଂଗ୍ରେସ ନେତା ବିଜେଡିରେ ମିଶିବା ପ୍ରସଙ୍ଗରେ ଦୁଇଦଳ ମୁହାଁମୁହିଁ ହୋଇଛନ୍ତି । ବିଜେଡିର ବରିଷ୍ଠ ନେତା ସୂର୍ଯ୍ୟ ପାତ୍ରଙ୍କ ମନ୍ତବ୍ୟର ଜବାବ ରଖିଛି କଂଗ୍ରେସ । କଂଗ୍ରେସ କହିଛି ସୂର୍ଯ୍ୟଙ୍କ ମନ୍ତବ୍ୟ ଅବାସ୍ତବ । ବିଜୁବାବୁ ମଧ୍ୟ ପୂର୍ବରୁ କଂଗ୍ରେସରେ ଥିଲେ । କଂଗ୍ରେସରେ ଅନ୍ୟ ଦଳର ନେତା ମିଶିବେ । ଦଳର ଘର ସଜଡା ପରେ ଏହି ମିଶ୍ରଣ ପ୍ରକ୍ରିୟା ଆରମ୍ଭ ହେବ ।
Kanak News is now on WhatsApp
Join and get latest news updates delivered to you via WhatsApp
ଏଠାରେ ଆମେ କହି ରଖୁଛୁ କି, କିଛି ଦିନ ତଳେ ସୂର୍ଯ୍ୟ ପାତ୍ର କଂଗ୍ରେସ ଉପରେ ଖୁବ ବର୍ଷିଥିଲେ । କଂଗ୍ରେସର ଅବସ୍ଥା ପୂରା ଦେଶରେ ଭଲ ନାହିଁ । ଓଡିଶାର ଗ୍ରାମାଞ୍ଚଳରେ କିଛି ମାତ୍ରାରେ କର୍ମୀ ଥିଲେ ମଧ୍ୟ ଦଳର ଉପର ମହଲରେ ଗୋଷ୍ଠୀକନ୍ଦଳ ଲାଗି ରହିଛି । ଏପରିକି ସଭାପତି ପଦ ପାଇଁ ନେତୃବୃନ୍ଦଙ୍କ ମଧ୍ୟରେ ଗୋଡ ଟଣାଟଣି ନୀତି ସବୁବେଳେ ଚାଲିଛି । ଏଭଳି ପରିସ୍ଥିତି ଦେଖିଲେ କଂଗ୍ରେସ ଦଳ ଆଉ ବେଶି ଦିନ ତିଷ୍ଠି ରହିବନି ବୋଲି ମତ ଦେଇଥିଲେ ସୂର୍ଯ୍ୟ ।
ଅନ୍ୟପଟେ, ଏହାକୁ କେନ୍ଦ୍ରକରି ମଧ୍ୟ ବିଜେଡି ଭିତରେ ଲଢେଇ ଆରମ୍ଭ ହୋଇଯାଇଛି । ବିଜେଡି ବନାମ ବିଜେଡି । ଆଉ ଲଢେଇରେ ସାମିଲ ହୋଇଛନ୍ତି ଦୁଇ ବରିଷ୍ଠ ନେତା । ଜଣେ କଂଗ୍ରେସର ସପକ୍ଷରେ ମତ ରଖୁଥିବା ବେଳେ ଅନ୍ୟ ଜଣେ ଖୋଲାଖୋଲି ବିରୋଧ କରୁଛନ୍ତି । ସମବାୟ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ରଙ୍କ ମନ୍ତବ୍ୟକୁ ନେଇ ପ୍ରଶ୍ନ ଉଠାଇଛନ୍ତି ମନ୍ତ୍ରୀ ଦାମୋଦର ରାଉତ ।
ସୂର୍ଯ୍ୟ କହିବା ଅନୁଯାୟୀ, ଓଡିଶାରୁ କଂଗ୍ରେସ ଲୋପ ପାଇଯିବ ତାହା ସମ୍ପୂର୍ଣ୍ଣ ଭୁଲ୍ ବୋଲି କହିଛନ୍ତି ଦାମ । ଏହାସହ ସୂର୍ଯ୍ୟଙ୍କୁ କଟାକ୍ଷ କରି ପ୍ରଶ୍ନ କରିଛନ୍ତି ସେ କଣ ଚାହୁଁଛନ୍ତି ଦେଶରେ ସାମ୍ପ୍ରଦାୟିକ ଦଳ କାୟା ବିସ୍ତାର କରୁ । ବିଜେଡି ଓ କଂଗ୍ରେସ ୨ଟି ଧର୍ମ ନିରପେକ୍ଷ ଦଳ । ତେଣୁ କଂଗ୍ରେସ ଲୋପ ପାଇଯିବ ଏଭଳି କହିବା ଉଚିତ୍ ନୁହେଁ । ଏହା ସହିତ ସୂର୍ଯ୍ୟ କହିଥିବା ସମସ୍ତ କଂଗ୍ରେସ କର୍ମୀ ବିଜେଡିରେ ମିଶିଯିବେ, ପ୍ରସଙ୍ଗରେ ଏହା କଣ ସମ୍ଭବ ବୋଲି ଓଲଟା ପ୍ରଶ୍ନ କରିଥିଲେ ଦାମ ।