ଏନଡିଏକୁ ଚେକ୍ ଦେବା ପାଇଁ କଂଗ୍ରେସର ଫର୍ମୁଲା ! ଜାତୀୟ ଗଣମାଧ୍ୟମରେ ଚର୍ଚ୍ଚା, ପ୍ରସନ୍ନ ଆଚାର୍ଯ୍ୟଙ୍କୁ ରାଜ୍ୟସଭା ଉପାଧ୍ୟକ୍ଷ ପ୍ରାର୍ଥୀ ପାଇଁ କଂଗ୍ରେସ ଦେଇପାରେ ପ୍ରସ୍ତାବ
କନକ ବ୍ୟୁରୋ : ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟଙ୍କୁ ରାଜ୍ୟସଭା ଉପାଧ୍ୟକ୍ଷ ପ୍ରାର୍ଥୀ ଭାବେ ପ୍ରସ୍ତାବ ଦେଇପାରେ କଂଗ୍ରେସ । ଜାତୀୟ ଗଣମାଧ୍ୟମରେ ଏ ନେଇ ଜୋରଦାର ଚର୍ଚ୍ଚା ଆରମ୍ଭ ହୋଇଯାଇଛି । ନିକଟରେ ଶେଷ ହେବାକୁ ଯାଉଛି ରାଜ୍ୟସଭା ଉପାଧ୍ୟକ୍ଷ ପି. ଜେ କୋରିୟନଙ୍କ କାର୍ଯ୍ୟକାଳ । ଉପନିର୍ବାଚନରେ ବିଜେପିକୁ ରୋକିବାର ବିରୋଧୀ ସଫଳ ହୋଇଥିବା ବେଳେ ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଏହି ଫର୍ମୁଲା ଆପଣାଇବାକୁ ଯାଉଛି କଂଗ୍ରେସ । ନିଜେ ପ୍ରାର୍ଥୀ ନଦେଇ ବିଜେଡି କିମ୍ବା ତୃଣମୂଳ କଂଗ୍ରେସ ସାଂସଦଙ୍କୁ ପ୍ରାର୍ଥୀ କରିବାକୁ ଚାହୁଁଛି କଂଗ୍ରେସ । ତେବେ ଏପରି ପ୍ରସ୍ତାବ ପାଇଲେ କି ଫଇସଲା କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ, ଏହା ଉପରେ ସମସ୍ତଙ୍କ ନଜର ।
Kanak News is now on WhatsApp
Join and get latest news updates delivered to you via WhatsApp
ଉପନିର୍ବାଚନରେ ବିଜେପିକୁ ମାତ୍ ଦେବାରେ ବିରୋଧୀଙ୍କୁ ସଫଳତା ମିଳିବା ପରେ ଏବେ ନଜର ରାଜ୍ୟସଭା ଉପାଧ୍ୟକ୍ଷ ପଦକୁ ନେଇ । ଉପନିର୍ବାଚନ ଫର୍ମୁଲାରେ ବିଜେପିକୁ ଏହି ପଦବୀ ନଦେବା ପାଇଁ ରଣନୀତି ଆରମ୍ଭ କରିଦେଇଛି କଂଗ୍ରେସ । ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟଙ୍କୁ ରାଜ୍ୟସଭା ଉପାଧ୍ୟକ୍ଷ ପ୍ରାର୍ଥୀ କରିବା ପାଇଁ ପ୍ରସ୍ତାବ ଦେଇପାରେ କଂଗ୍ରେସ ।
ନିଜ ଦଳରୁ ପ୍ରାର୍ଥୀ ନ ଦେଇ ବିଜେଡି କିମ୍ବା ତୃଣମୂଳ କଂଗ୍ରେସରୁ ଜଣକୁ ପ୍ରାର୍ଥୀ କରିବା ପାଇଁ ଯୋଜନା କରୁଛି କଂଗ୍ରେସ । ଏପରି ହେଲେ ବିରୋଧୀ ଦଳକୁ ପୁଣି ଥରେ ଏକାଠି କରିବାରେ ସମର୍ଥ ହେବ କଂଗ୍ରେସ । କୌଣସି ପରିସ୍ଥିତିରେ ବିଜେପି ହାତକୁ ଏହି ପଦବି ଟେକି ଦେବାକୁ ଚାହୁଁନାହିଁ ଦଳ । ଏବେ ସ୍ୱାଭାବିକ ଭାବେ ପ୍ରଶ୍ନ ଉଠୁଛି, ଏପରି ସ୍ଥିତି ଉପୁଜିଲେ କ’ଣ ଫଇସଲା କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । କାରଣ ଉଭୟ ବିଜେପି ଓ କଂଗ୍ରେସ ଠାରୁ ସମଦୂରତ୍ୱ କଥା କହିଆସୁଛନ୍ତି ନବୀନ ।
ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟଙ୍କୁ ରାଜ୍ୟସଭା ଉପାଧ୍ୟକ୍ଷ ପ୍ରାର୍ଥୀ କରିବାର ପ୍ରସ୍ତାବ ଦେବା ପଛରେ କଂଗ୍ରେସର ବଡ଼ ଉଦ୍ଦେଶ୍ୟ ରହିଛି । ପ୍ରଥମେ ବିଜେପିକୁ ଅଟକାଇବା ଏବଂ ଦ୍ୱିତୀୟରେ ବିଜେଡି, ତୃଣମୂଳ କଂଗ୍ରେସ ଭଳି ଦଳର ନିକଟବର୍ତି ହେବା । ଏ ସବୁ ହେଉଛି ୨୦୧୯ ରଣନୀତିର ଗୋଟିଏ ଗୋଟିଏ ଅଂଶ ।
ଦୈନିକ ଇଂରାଜୀ ଖବରକାଗଜ ହିନ୍ଦୁସ୍ତାନ ଟାଇମ୍ସର ରିପୋର୍ଟ ଅନୁସାରେ ଜଣେ ବରିଷ୍ଠ ବିଜେଡି ନେତା କହିଛନ୍ତି, ଅଣକଂଗ୍ରେସ ପ୍ରାର୍ଥୀଙ୍କୁ ସମର୍ଥନ ଦେବ ବିଜେଡି । ତୃଳମୂଳ କଂଗ୍ରେସ ନେତା ଡାରେକ୍ ଓ ବ୍ରିଏନଙ୍କ ସହ ଆଲୋଚନା କରିଛି ବିଜେଡି ସାଂସଦ ଭର୍ତ୍ତୃହରି ମହତାବ । ହିନ୍ଦୁସ୍ତାନ ଟାଇମ୍ସରେ ପ୍ରକାଶିତ ରିପୋର୍ଟରେ କୁହାଯାଇଛି, ଏ ନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଲୋଚନା କରିଛନ୍ତି ଭର୍ତ୍ତୃହରି । ଗୋଟିଏ ପଟେ ବିରୋଧୀ ରଣନୀତି ପ୍ରସ୍ତୁତ କଲାବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ରାଜ୍ୟସଭା ଉପାଧ୍ୟକ୍ଷ ପଦ ପାଇଁ ପ୍ରାର୍ଥୀ ଦେବ ବିଜେପି ।
ନିକଟରେ ଶେଷ ହେବ ରାଜ୍ୟସଭା ଉପାଧ୍ୟକ୍ଷ ପି. ଜେ. କୋରିୟନଙ୍କ କାର୍ଯ୍ୟକାଳ । ରାଜ୍ୟସଭାରେ ବିଜେପି ନେତୃତ୍ୱାଧିନ ଏନଡିଏରେ ଅଛନ୍ତି ୮୮ ଜଣ ସଦସ୍ୟ । ସେହିପରି କଂଗ୍ରେସ ନେତୃତ୍ୱରେ ୟୁପିଏରେ ଅଛନ୍ତି ୫୮ ଜଣ ସଦସ୍ୟ । ତୃଣମୂଳ କଂଗ୍ରେସ, ଏଆଇଏଡ଼ିଏମକେ, ସମାଜବାଦୀ ପାର୍ଟିର ୧୩ ଜଣ ଲେଖାଏଁ ସାଂସଦ ଅଛନ୍ତି । ଏହା ତଳକୁ ରହିଛି ବିଜେଡିର ୯ ଜଣ ସାଂସଦ । ତେଣୁ ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ବିଜେଡି ଏକ ନିର୍ଣ୍ଣାୟକ ଭୂମିକା ତୁଲାଇବାକୁ ଯାଉଛି ।