ରାତି ଅଧରେ ତାଲିକା ଘୋଷଣା କଲା କଂଗ୍ରେସ: ୬ ଲୋକସଭା ଓ ୩୬ ବିଧାନସଭା ଆସନରେ ମୋହର, ଜାଣନ୍ତୁ କିଏ ଲଢିବେ କେଉଁଠି?

1,244

କନକ ବ୍ୟୁରୋ: ୨୦୧୯ ସାଧାରଣ ନିର୍ବାଚନ ପାଇଁ ଗତକାଲି ବିଳମ୍ବିତ ରାତିରେ ପ୍ରଥମ ପର୍ଯ୍ୟାୟ କଂଗ୍ରେସ ପ୍ରାର୍ଥୀ ତାଲିକା ପ୍ରକାଶ ପାଇଛି। ଲୋକସଭାର ୬ ଓ ବିଧାନସଭାର ୩୬ ଆସନ ଲାଗି ଅଖିଳ ଭାରତ କ˚ଗ୍ରେସ କମିଟିର ସାଧାରଣ ସ˚ପାଦକ ମୁକୁଲ ୱାସନିକ୍‌ଙ୍କ ଦସ୍ତଖତରେ ପ୍ରାର୍ଥୀ ତାଲିକା ଜାରି କରାଯାଇଛି।

ବରଗଡ ଲୋକସଭା ଆସନ ଲାଗି ପ୍ରଦୀପ କୁମାର ଦେବତାଙ୍କୁ ଦଳ ପ୍ରାର୍ଥୀ କରିଛି। ସେହିଭଳି ଜେଏମ୍‌ଏମ୍‌ରୁ କ˚ଗ୍ରେସକୁ ଆସିଥିବା ବିଧାୟକ ଜର୍ଜ ତିର୍କୀଙ୍କୁ ସୁନ୍ଦରଗଡ, ଭକ୍ତ ଚରଣ ଦାସ କଳାହାଣ୍ତିରୁ, ପ୍ରଦୀପ ମାଝୀଙ୍କୁ ନବରଙ୍ଗପୁର, ମନୋଜ କୁମାର ଆଚାର‌୍ୟ୍ୟ କନ୍ଧମାଳ ଓ ବି ଚନ୍ଦ୍ରଶେଖର ନାଇଡୁଙ୍କୁ ବ୍ରହ୍ମପୁର ଲୋକସଭା ଆସନରୁ ପ୍ରାର୍ଥୀ ଘୋଷଣା କରାଯାଇଛି। ତେବେ ପ୍ରଥମ ପର‌୍ୟ୍ୟାୟରେ ନିର୍ବାଚନ ହେବାକୁ ଅନ୍ୟତମ ଗୁରୁତ୍ବପୂର୍ଣ୍ଣ ଆସନ କୋରାପୁଟ ପାଇଁ ପ୍ରାର୍ଥୀ ଚୟନ ସମ୍ଭବତଃ ଚୂଡାନ୍ତ ହୋଇପାରିନାହିଁ।

ତେବେ ବିଧାନସଭା ପ୍ରାର୍ଥୀ ତାଲିକାରେ ଜଣେ ମାତ୍ର ମହିଳା ଭାବେ ଚିତ୍ରକୋଣ୍ତା ଆସନରୁ ଲକ୍ଷ୍ମୀପ୍ରିୟା ନାୟକଙ୍କୁ ଦଳ ପାର୍ଥୀ କରିଛି।

ଅନ୍ୟପକ୍ଷରେ ୩୬ ବିଧାନସଭା ଆସନ ମଧୢରେ ବିରୋଧୀ ଦଳ ନେତା ନରସି˚ହ ମିଶ୍ରଙ୍କ ସମେତ ୩ଜଣ ବିଧାୟକଙ୍କ ନାମ ରହିଛି। ଶ୍ରୀ ମିଶ୍ର ପୂର୍ବଭଳି ବଲାଙ୍ଗୀର ଆସନରୁ ପ୍ରାର୍ଥୀ ହେବେ। ବିଧାୟକ ଭୂଜବଳ ମାଝୀଙ୍କୁ ଡାବୁଗାଁ ଓ ଜୟପୁରରୁ ତାରା ପ୍ରସାଦ ବାହିନୀପତିଙ୍କୁ ପ୍ରାର୍ଥୀ କରାଯାଇଛି।

ପୂର୍ବତନ ବିରୋଧୀ ଦଳ ମୁଖ୍ୟ ସଚେତକ ସତ୍ୟଭୂଷଣ ସାହୁ ଏଥର ପୁଣି ପଦ୍ମପୁର ଆସନରୁ ପ୍ରାର୍ଥୀ ହେବେ। ନିପନ ଦାସଙ୍କୁ ବରଗଡ, ପୂର୍ବତନ ବିଧାୟକ ନିହାର ମହାନନ୍ଦ ଅତାବିରା, ରୋହିତ ଯୋଶେଫ ତିର୍କି ବୀରମିତ୍ରପୁର, ଡାକ୍ତର ସିଆର‌୍‌ ରାଜନ ରାଜଗାଙ୍ଗପୁର ଆସନରୁ କ˚ଗ୍ରେସ ପ୍ରାର୍ଥୀ ଭାବେ ଏଥର ନିର୍ବାଚନ ଲଢିବାକୁ ଦଳ ସ୍ବୀକୃତି ଦେଇଛି।

ପୂର୍ବତନ ବିଧାୟକ ବିନୋଦ ପାତ୍ର ବୀର ମହାରାଜପୁର ଆସନରୁ ପ୍ରାର୍ଥୀ ହୋଇଛନ୍ତି। ସେହିଭଳି ଘାସିରାମ ମାଝୀ ନୂଆପଡା, ଅଧିରାଜ ପାଣିଗ୍ରାହୀ ଖରିଆର, ଉଇଧର ମାଝୀ ଝରିଗାଁ, ପୂର୍ବତନ ବିଧାୟକ ସଦନ ନାୟକ ନବରଙ୍ଗପୁର, ପୂର୍ବତନ ବିଧାୟକ ଶିବାଜୀ ମାଝୀ ଲାଞ୍ଜିଗଡରୁ କ˚ଗ୍ରେସ ପ୍ରାର୍ଥୀ ଭାବେ ଲଢିବେ। ପୂର୍ବତନ ବିଧାୟକ ରମେଶ ଚନ୍ଦ୍ର ଜେନା ଏଥର ନିର୍ବାଚନ ମଇଦାନକୁ ଓହ୍ଲାଇବେ। ଦଳ ତାଙ୍କୁ ସାନଖେମୁଣ୍ତି ଆସନରେ ପ୍ରାର୍ଥୀ କରିଛି। ମୋହନାରୁ ଦାଶରଥୀ ଗମାଙ୍ଗୋ, ପଟ୍ଟାଙ୍ଗିରୁ ପୂର୍ବତନ ବିଧାୟକ ରାମଚନ୍ଦ୍ର କାଡାମ କ˚ଗ୍ରେସ ଟିକେଟ ପାଇଛନ୍ତି। ଆଜି ମାଲକାନଗିରି ଆସନରୁ ପ୍ରାର୍ଥିପତ୍ର ଦାଖଲ କରିଥିବା ମାଲା ମାଢୀଙ୍କୁ ଦଳ ଟିକେଟ୍‌ ଦେଇଛି। ସେ ଆଜି ସ୍ବାଧୀନ ପ୍ରାର୍ଥୀ ଭାବେ ପ୍ରାର୍ଥିପତ୍ର ଦାଖଲ କରିଛନ୍ତି।

Comments are closed.