କଂଗ୍ରେସ ଧରିବ ମାୟାବତୀଙ୍କ ହାତ ! କର୍ଣ୍ଣାଟକ ପରେ ଅନ୍ୟ ରାଜ୍ୟରେ ମୋଦିଙ୍କୁ ରୋକିବା ପାଇଁ କଂଗ୍ରେସର ରଣନୀତି ।
ଚଳିତ ବର୍ଷ ଶେଷ ଆଡକୁ ମଧ୍ୟପ୍ରଦେଶ ସମେତ ରାଜସ୍ଥାନ, ଛତିଶଗଡ ଓ ମିଜୋରାମ ଭଳି ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବାବେଳେ ବିଜେପି ପାଇଁ ଦିନକୁ ଦିନ ଅଡୁଆ ବଢ଼ିବାରେ ଲାଗିଛି । କାରଣ ମଧ୍ୟପ୍ରଦେଶର ନବ ନିଯୁକ୍ତ କଂଗ୍ରେସ ମୁଖ୍ୟ କମଳ ନାଥ ସୂଚନା ଦେଇଛନ୍ତି ଯେ, କଂଗ୍ରେସ ସହ ବିଏସପି ମୁଖ୍ୟ ମାୟାବତୀ ଯୋଡି ହେବେ ବୋଲି ଏକ ପ୍ରକାର ସ୍ପଷ୍ଟ ହୋଇଛି । ତେବେ ଏହି ମେଣ୍ଟ ଦ୍ୱାରା ବିଜେପିକୁ ବାକି ଥିବା ୪ଟି ରାଜ୍ୟର ଫଳାଫଳ ମହଙ୍ଗା ପଡିବ ବୋଲି କଂଗ୍ରେସ କହିଛି । ମଧ୍ୟପ୍ରଦେଶ, ରାଜସ୍ଥାନ ଓ ଛତିଶଗଡରେ ବିଜେପିର ସରକାର ଥିବାବେଳେ କଂଗ୍ରେସ ଏହି ଦୁର୍ଗକୁ ଭାଙ୍ଗିବା ପାଇଁ ପ୍ରୟାସ ଆରମ୍ଭ କରିଛି । କିନ୍ତୁ ମଧ୍ୟ ପ୍ରଦେଶରେ ବିଜେପିକୁ ଗାଦିଚ୍ୟୁତ କରିବା ପାଇଁ କଂଗ୍ରେସ ଉଦ୍ୟମ ଜାରି ରଖିଛି । ଏନେଇ ମେଣ୍ଟ କରିବା ପାଇଁ ଦଳ ଯେ କୌଣସି ସ୍ତରକୁ ଯାଇପାରେ ବୋଲି ପ୍ରମାଣିତ ହୋଇଛି । ଯେଉଁଭଳି ଭାବେ କର୍ଣ୍ଣାଟକରେ ଜେଡିଏସ ସହିତ ମେଣ୍ଟ କରି ମୋଦି ମ୍ୟାଜିକକୁ ଫିକା କରିଥିଲା କଂଗ୍ରେସ ସେହିଭଳି ବାକି ଥିବା ରାଜ୍ୟର ବିଧାନସଭା ନିର୍ବାଚନରେ ବିଜେପିକୁ ବାଜିମାତ୍ କରିବା ଲକ୍ଷ୍ୟରେ ରହିଛି କଂଗ୍ରେସ । ଏହାକୁ ନେଇ କମଳ ନାଥ କହିଛନ୍ତି ଯେ, ଆମ୍ଭେମାନେ ଏକତ୍ରିତ ହୋଇ ଲଢ଼ିଲେ ବିଜେପିକୁ ଚେକ ମେଟ୍ ଦେବାରେ ସମର୍ଥ ହେବୁ ।
Kanak News is now on WhatsApp
Join and get latest news updates delivered to you via WhatsApp
ମଧ୍ୟପ୍ରଦେଶରେ କେବଳ ବିଏସପି ନୁହେଁ ବରଂ ଗୋଣ୍ଡୱାନା ଗଣତନ୍ତ୍ର ପାର୍ଟି ସହିତ କଂଗ୍ରେସ ମେଣ୍ଟ କରିବ ବୋଲି ଜଣାପଡିଛି । କାରଣ ଗୋଣ୍ଡୱାନା ପାର୍ଟି ଆଦିବାସୀ ମାନଙ୍କର ସମର୍ଥନ ଥିବାବେଳେ, ମଣ୍ଡେଲା, ଡିଣ୍ଡୋରୀ, ଜବଲପୁର ଓ ଛିନ୍ଦୱାଡା ପ୍ରମୁଖ ଅଞ୍ଚଳରେ ବିଜେପିକୁ ଚିତ୍ କରିବା ପାଇଁ କଂଗ୍ରେସ ଓ ଅନ୍ୟ ବିରୋଧୀ ଦଳଙ୍କୁ ସମର୍ଥନ ରହିଥିବା ଜଣାପଡିଛି । କର୍ଣ୍ଣାଟକ ପରେ ଏବେ ମଧ୍ୟପ୍ରଦେଶରେ କଂଗ୍ରେସ ପାଇଁ ଅଗ୍ନି ପରୀକ୍ଷା ହେବାକୁ ଯାଉଛି । ଯଦି କଂଗ୍ରେସ ଏଠାରେ ବିଜୟ ହୁଏ ତେବେ ୨୦୧୯ ନିର୍ବାଚନରେ କେନ୍ଦ୍ରରେ କ୍ଷମତାକୁ ଆସିବା ପାଇଁ ଆଉ ଏକ ପାହାଚ ପୂରଣ କରିବ ।
କଣ କହୁଛି ଭୋଟ ଅଙ୍କ ?
ଯଦି ପୂର୍ବ ନିର୍ବାଚନ ଅଙ୍କ ଦେଖିବା ତେବେ ବିଜେପିକୁ ୪୮ ପ୍ରତିଶତ ଭୋଟ ମିଳିଥିଲା । ସେପଟେ କଂଗ୍ରେସକୁ ମଧ୍ୟ ୩୬ ପ୍ରତିଶତ ଭୋଟ ମିଳିଥିବାବେଳେ ବିଏସପିକୁ ୬ ପ୍ରତିଶତ ଭୋଟ ମିଳିଥିଲା । ଯଦି କଂଗ୍ରେସ ଓ ବିଏସପି ଭୋଟକୁ ଗତବର୍ଷ ତୁଳନାରେ ଆକଳନ କରାଯାଏ ତେବେ ମୋଟ ୪୨ ପ୍ରତିଶତ ଭୋଟ କଂଗ୍ରେସ ପାଖରେ ରହୁଛି । ତେବେ ଦୁଇ ଦଳଙ୍କ ମଧ୍ୟରେ ମାତ୍ର ୨ ପ୍ରତିଶତ ଭୋଟ ବ୍ୟାଙ୍କ ତାରତମ୍ୟ ରହୁଥିବା ରାଜନୈତିକ ବିଶେଷଜ୍ଞମାନେ କହୁଛନ୍ତି । ଅନ୍ୟପଟେ ମଧ୍ୟପ୍ରଦେଶରେ ୬୦ଟି ଆସନ ଉପରେ ବିଏସପିର ଦବଦବା ରହିଛି । ତେଣୁ କଂଗ୍ରେସ ପାଇଁ ବିଏସପି କିଙ୍ଗ୍ ମେକର ସାଜିବ ବୋଲି ରାଜନୈତିକ ମହଲରେ ଏବେଠୁ ଚର୍ଚ୍ଚା ଆରମ୍ଭ ହେଲାଣି ।