ଚୀନର ଚିନ୍ତା : ଭାରତ ହୋଇଯିବ ବାଦଶାହ
ସାମଗ୍ରୀ ଏବଂ ସେବା ଟିକସ (ଜିଏସଟି)କୁ ଚୀନ୍ ଗଣମାଧ୍ୟମରେ ପ୍ରଶଂସା କରାଯାଇଛି । ଭାରତକୁ ଗୋଟିଏ ବଜାରରେ ପରିଣତ କରିବା ଦିଗରେ ଏହା ଏକ ବଡ଼ ପଦକ୍ଷେପ । ଏହା ଦ୍ୱାରା ସରକାରଙ୍କ ‘ମେକ୍ ଇନ୍ ଇଣ୍ଡିଆ’କୁ ଅଧିକ ଶକ୍ତି ମିଳିବ ବୋଲି ଚୀନର ସମ୍ବାଦପତ୍ର ଗ୍ଲୋବାଲ୍ ଟାଇମସ୍ ଏକ ଲେଖାରେ ଉଲ୍ଲେଖ କରିଛି ।ଏଥିରେ ଲେଖାଯାଇଛି ଯେ ବିଦେଶୀ ସଂସ୍ଥାଗୁଡ଼ିକ ପାଇଁ ଭାରତ ଅଧିକ ଆକର୍ଷଣୀୟ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ମାତ୍ର ଜିଏସଟି ସମେତ ଭାରତ ଅନ୍ୟ ଯେଉଁ ସବୁ ସଂସ୍କାରମୂଳକ ପଦକ୍ଷେପ ଗ୍ରହଣ କରିଛି ତାହା କାର୍ୟ୍ୟକାରୀ କରିବା ସହଜ ନୁହେଁ ବୋଲି ଗ୍ଲୋବାଲ୍ ଟାଇମସ୍ ଜଣାଇଛି । ସୁଲଭ ଉତ୍ପାଦନ ହବ୍ ମାନ୍ୟତା ଚୀନ୍ ହାତରୁ ଖସି ଯାଉଛି । ତେବେ ସେହି ମାନ୍ୟତାକୁ ହାସଲ କରିବା ଭାରତ କିମ୍ବା ବିଶ୍ୱ ପାଇଁ କଷ୍ଟକର ହେବ ବୋଲି ଗ୍ଲୋବାଲ୍ ଟାଇମସ୍ ଜଣାଇଛି ।
ତେବେ ଏହି ଲେଖା ଜରିଆରେ ଚୀନର ଚିନ୍ତା ସ୍ପଷ୍ଟ ବାରି ହୋଇପଡ଼ୁଛି । ଭାରତ ଉତ୍ପାଦନ ଜଗତର ବାଦଶାହ ହୋଇଯିବାର ସମ୍ଭାବନା ଥିବାରୁ ଚୀନ୍ ବେଶ୍ ଚିନ୍ତିତ ହୋଇପଡ଼ିଛି । ଦେଶକୁ ଗୋଟିଏ ବଜାରରେ ପରିଣତ କରିବା ପାଇଁ ଭାରତ ଆକ୍ରମକ ସଂସ୍କାର ଆଣିଛି ଯାହା ଦ୍ୱାରା ବିଦେଶୀ ନିବେଶକଙ୍କ ପାଇଁ ଭାରତ ବେଶ୍ ଆକର୍ଷଣୀୟ ହୋଇପାରିଛି । ମାତ୍ର ଦୁର୍ବଳ ଭିତ୍ତିଭୂମି, ରାଜ୍ୟଗୁଡ଼ିକରେ ନୀତି ନିୟମ ପ୍ରଣୟନରେ ସମସ୍ୟା ଭଳି ଆହ୍ଵାନ ଭାରତରେ ରହିଛି ।
ଜିଏସଟି ଲାଗୁ କରିଥିବାରୁ ଫକ୍ସକନ୍ ଏବଂ ମିଡିଆ ଭଳି ସଂସ୍ଥା ଭାରତରେ ନିବେଶ କରିବାକୁ ପ୍ରତିଶ୍ରୁତି ପ୍ରଦାନ କରିଛନ୍ତି ବୋଲି ଗ୍ଲୋବାଲ୍ ଟାଇମ୍ସ ଜଣାଇଛି । ଭାରତର ୩୦ଟି ରାଜ୍ୟରେ ସଂସ୍କାରଗୁଡ଼ିକୁ କାର୍ୟ୍ୟକାରୀ କରିବା ସହଜ ହେବ ନାହିଁ । ଦୁର୍ବଳ ଭିତ୍ତିଭୂମି ଏବଂ ସାଂସ୍କୃତିକ ଜଟିଳତା ଥିବାରୁ ଭାରତ ପାଖରେ ଶସ୍ତା ଶ୍ରମ ଶକ୍ତିର ଯେଉଁ ଲାଭ ରହିଛି ତାହାର ସୁଫଳ ସହଜରେ ହାସଲ କରିହେବ ନାହିଁ ବୋଲି ଏହି ସମ୍ବାଦପତ୍ର ଜଣାଇଛି । ଉଲ୍ଲେଖଯୋଗ୍ୟ, ଅଭିବୃଦ୍ଧି କ୍ଷେତ୍ରରେ ଚୀନକୁ ଭାରତ ପଛରେ ପକାଇ ଦେଇଛି ।