‘ବଂଚି ଥାଉଁ ଥାଉଁ ମାରିଦେଲେ’ । ସୋସିଆଲ ମିଡିଆରେ ପପୁପପଙ୍କ ମୃତ୍ୟୁର ଅପପ୍ରଚାର । ଦିଲ୍ଲୀ ଏମ୍ସରୁ ଫେରିବା ପରେ କମେଡି କିଙ୍ଗଙ୍କ ପ୍ରତିକ୍ରିୟା
କନକ ବ୍ୟୁରୋ: ସିଏ ଯିଏ ହୁଅନ୍ତୁ ନା’ କାହିଁକି, ଯଦି ବଂଚି ଥାଉଁ ଥାଉଁ ଜଣକୁ ମାରି ଦେବାର ଅପପ୍ରଚାର ହୁଏ, ତାହା ନିଶ୍ଚିତ ଭାବେ ଆଘାତ ଦେବ । ଆଉ ଏହି ବ୍ୟକ୍ତି ଯଦି ଲୋକପ୍ରିୟ ତାରକା ହୁଅନ୍ତି ତାହା, ତାଙ୍କ କୋଟି କୋଟି ଫଲୋଅର୍ସଙ୍କୁ ପ୍ରଭାବିତ କରିବ । ସୋସିଆଲ ମିଡ଼ିଆରେ ଘୁରି ବୁଲୁ ଥିବା ଏହି ଫଟୋ ସବୁ ଲକ୍ଷ୍ୟ କରନ୍ତୁ- କେଉଁଥିରେ ଲେଖା ରହିଛି ‘ଆଉ ନାହାଁନ୍ତି ପପୁ’ । ଆଉ କେଉଁ ଥିରେ ଲେଖା ରହିଛି ‘ପର ପାରିରେ ପପୁ’ । କିଛି ନବୁଝି ଯେଉଁମାନେ ବି ସୋସିଆଲ ମିଡିଆରେ ଏଭଳି ଅପପ୍ରଚାର କରୁଛନ୍ତି, ସେମାନେ ଜାଣି ରଖିବା ଉଚିତ ଯେ, ଏହାଠୁ ଭଳି ହୀନ କାର୍ଯ୍ୟ ଆଉ କିଛି ହୋଇନପାରେ ।
Kanak News is now on WhatsApp
Join and get latest news updates delivered to you via WhatsApp
ଏଭଳି ଅପପ୍ରଚାର ପଛରେ ଯାହା ବି ଉଦ୍ଦେଶ୍ୟ ଥାଉ ନା କାହିଁକି, ଜଣେ ସୁସ୍ଥ ମଣିଷକୁ ଆଉ ନାହାନ୍ତି କହି ପ୍ରଚାର କରିବା, ଜଣେ ବ୍ୟକ୍ତି ପ୍ରତି ଏହା ହେଉଛି ସବୁଠୁ ବଡ ଅପମାନ । ଆଉ ଏଭଳି ଅପପ୍ରଚାର ସଂପର୍କରେ ମୁହଁ ଖୋଲିଛନ୍ତି ଖୋଦ୍ ପପୁ ପମ୍ ପମ୍ ।
ଗତ ମେ’ ମାସରେ ଏକ ସୁଟିଂ ସେଟ୍ରେ ଅଚାନକ୍ ଅସୁସ୍ଥ ହୋଇପଡିଥିଲେ । ତାଙ୍କୁ ପ୍ରଥମେ ଖଣ୍ଡଗିରି ନିକଟସ୍ଥ ଏକ ହସ୍ପିଟାଲରେ ପ୍ରାରମ୍ଭିକ ଚିକିତ୍ସା ପରେ ଦିଲ୍ଲୀ ଏମ୍ସକୁ ସ୍ଥାନାନ୍ତର କରାଯାଇଥିଲା । ଗ୍ୟାଷ୍ଟ୍ରୋଏଂଟ୍ରୋଲୋଜି ବିଭାଗ ଆଇସିୟୁରେ ଚିକିତ୍ସିତ ହେବା ପରେ ଗତ ଜୁଲାଇ ୧୦ ତାରିଖରେ ସୁସ୍ଥ ହୋଇ ଓଡ଼ିଶା ଫେରିଥିଲେ । ତେବେ ଦୁଇ ଦିନ ତଳେ ପପୁ ରୁଟିନ୍ ଚେକ୍ଅପ୍ ପାଇଁ ଦିଲ୍ଲୀ ଯାଇଥିବାବେଳେ କିଛି ଲୋକ ପପୁଙ୍କୁ ନେଇ ଏଭଳି କିଛି ସୋସିଆଲ ମିଡ଼ିଆରେ ପୋଷ୍ଟ କରିଥିଲେ, ଯାହା ଫଳରେ ପପୁଙ୍କୁ ସ୍ପଷ୍ଟୀକରଣ ଦେବାକୁ ପଡ଼ିଛି ।
ପ୍ରଶ୍ନ ଉଠୁଛି-
-ଜଣେ ଲୋକପ୍ରିୟ ଅଭିନେତାଙ୍କୁ ନେଇ କାହିଁକି ଏଭଳି ଅପପ୍ରଚାର କରଯାଉଛି?
– ଏଭଳି ଅପପ୍ରଚାର ଫଳରେ କାହାର କେଉଁ ସ୍ୱାର୍ଥ ହାସଲ ହେବ?
-ସୋସିଆଲ ମିଡିଆରେ ମିଛ ଖବର ପୋଷ୍ଟ କରି କାହିଁକି ପ୍ରସଂଶକଙ୍କୁ ଭ୍ରମିତ କରାଯାଉଛି?
ଲୋକପ୍ରିୟ କଳାକାରଙ୍କ ସଂପର୍କରେ ଏଭଳି ମିଛ ଖବର ବା ଅପପ୍ରଚାର ଓଡ଼ିଶାରେ ପ୍ରଥମ ଥର ପାଇଁ ଘଟୁଛି ତାହା ବି ନୁହେଁ । ପୂର୍ବରୁ ବର୍ଷିୟାନ୍ ଅଭିନେତା ଜୟୀରାମ ସାମଲଙ୍କୁ ନେଇ ମଧ୍ୟ ଏଭଳି ମିଛ ଖବର ପ୍ରଚାର କରାଯାଇଥିଲା ।