ସୁକମାରେ ମାଓ ହମଲା ପରେ ବଡ କମ୍ବିଂ ଅପରେସନ ଆରମ୍ଭ ! ୯ ସହିଦଙ୍କୁ ଦିଆଯିବ ଗାର୍ଡ ଅଫ୍ ଅନର, ସନ୍ଧ୍ୟାରେ ଓଡିଶା ଆସିପାରେ ସହିଦ ମନୋରଞ୍ଜନଙ୍କ ମରଶରୀର
କନକ ବ୍ୟୁରୋ : ମାଲକାନଗିରି ସୀମାନ୍ତ ଛତିଶଗଡ ସୁକମାରେ ମାଓ ଆକ୍ରମଣ ପରେ କମ୍ବିଂ ଅପରେସନ ଜାରି ରହିଛି । କିସ୍ତରାମା ଥାନା ଅନ୍ତର୍ଗତ ପଲୋଦି ଅଂଚଳରେ ସୁରକ୍ଷାକର୍ମୀମାନେ କମ୍ବିଂ ଅପରେସନକୁ ଜୋରଦାର କରିଛନ୍ତି । ମାଓ ଅଧୁଷିତ ଅଂଚଳ ହୋଇଥିବାରୁ ସୁରକ୍ଷାକର୍ମୀଙ୍କ କଡା ନଜର ଭିତରେ ଥିବା ଏହି ଅଂଚଳରେ ମାଓ ଆକ୍ରମଣ ପରେ କମ୍ବିଂ କରାଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଗତକାଲି ପୂଜାରୀକାଙ୍କେର ଜଙ୍ଗଲରେ ମାଓବାଦୀମାନେ ଭୟଙ୍କର ବିସ୍ଫୋରଣ କରି ସିଆରପିଏଫ ଯବାନଙ୍କ ଲ୍ୟାଣ୍ଡମାଇନ ନିରୋଧି ଗାଡିକୁ ଉଡାଇ ଦେଇଛନ୍ତି । ଯେଉଁଥିରେ ସିଆରପିଏଫ ୨୧୨ ବାଟାଲିୟନର ୯ ଯବାନ ସହିଦ ହୋଇଥିବାବେଳେ ୨ଜଣ ଗୁରୁତର ଆହତ ହୋଇଛନ୍ତି । ମାଓ ହମଲା ପରେ ପୂଜାରୀକାଙ୍କେର ଜଙ୍ଗଲ ଓ ଏହାର ଆଖାପଖ ଅଂଚଳରେ ଜୋରଦାର କମ୍ବି ଅପରେସନ୍ ଜାରି ରହିଛି ।
ମାଓ ଆକ୍ରମଣରେ ସହିଦଙ୍କୁ ଗାର୍ଡ ଅଫ ଅନର ଦେବା ବେଳେ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହଙ୍କ ସହ ଛତିଶଗଡ ମୁଖ୍ୟମନ୍ତ୍ରୀ ଓ ଅନ୍ୟ ମନ୍ତ୍ରୀମାନେ ମଧ୍ୟ ଉପସ୍ଥିତ ରହିବା କାର୍ଯ୍ୟକ୍ରମ ରହିଛି । ସୁକମା ମାଓ ଆକ୍ରମଣରେ ସହିଦ ଯବାନଙ୍କ ପରିବାରକୁ ସମବେଦନା ଜଣାଇଛନ୍ତି କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ । ଆହତ ଯବାନଙ୍କ ଆଶୁ ଆରୋଗ୍ୟ କାମନା କରିଛନ୍ତି ରାଜନାଥ । ଏହାସହ ସିଆରପିଏଫ ଡିଜିଙ୍କ ସହ ଘଟଣା ସଂପର୍କରେ ସବିଶେଷ ଆଲୋଚନା କରିବା ସହ ଘଟଣାସ୍ଥଳକୁ ଯିବା ପାଇଁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ଗୃହମନ୍ତ୍ରୀ ।
ସୁକମାରେ ମାଓବାଦୀଙ୍କ ଲ୍ୟାଣ୍ଡମାଇନ ବିସ୍ଫୋରଣ ଘଟଣାରେ ସହିଦ ହୋଇଥିବା ୯ ଜଣ ସିଆରପିଏଫ୍ ଯବାନଙ୍କ ମଧ୍ୟରେ ଜଣେ ଓଡ଼ିଆ ଯବାନ ମଧ୍ୟ ସହିଦ ହୋଇଛନ୍ତି । ପୁରୀ ଜିଲ୍ଲା ରେବଣା ନୂଆଗାଁର ମନୋରଂଜନ ଲେଙ୍କା ଏହି ମାଓ ବର୍ବରତାରେ ସହିଦ ହୋଇଛନ୍ତି । ମନୋରଂଜନ ଲେଙ୍କା ହେଉଛନ୍ତି ଦୁର୍ଯ୍ୟାଧନ ଲେଙ୍କାଙ୍କ ପୁଅ । ଦୁଃଖର କଥା ହେଉଛି-ମନୋରଂଜନ ୧୫ ଦିନ ପୂର୍ବରୁ ମୃତ ବାପାଙ୍କ ଶୁଦ୍ଧିକ୍ରିୟା ସାରି କାର୍ଯ୍ୟରେ ଯୋଗଦେଇଥିଲେ । ମନୋରଂଜନ ଅବିବାହିତ ଥିବା ବେଳେ ତାଙ୍କ ଉପରେ ପରିବାର ନିର୍ଭରଶୀଳ ଥିଲା । ତାଙ୍କ ସହିଦ ହେବା ଖବର ଆସିବା ପରେ ପରିବାରରେ ଦୁଃଖର ବାଦଲ ଖେଳି ଯାଇଛି । କାନ୍ଦବୋବାଳିରେ ଫାଟି ପଡୁଛି ପୁରା ଗାଁ ।