କାଳିଆ ଆଗରେ ହାତ ଟେକିଦେଲେ ଜିଲ୍ଲାପାଳ ! ଚମତ୍କାର ହେଲା, ହଠାତ୍ ବନ୍ଦ ଲଫାପାରୁ ଚାବି ମିଳିଲା
କନକ ବ୍ୟୁରୋ : ହାତ ଟେକିଦେଲେ ଜିଲ୍ଲାପାଳ । ଗତକାଲି ରତ୍ନଭଣ୍ଡାର ଚାବି ମିଳିବା ନେଇ ଜିଲ୍ଲାପାଳ ପ୍ରେସମିଟ୍ କରି ଘୋଷଣା କରିଥିଲେ, ଆଜି ପୁଣି ଏକ ପ୍ରେସମିଟ୍ କରି ଜିଲ୍ଲାପାଳ, ଚାବି ମିଳିବା ଘଟଣା, ଜଗନ୍ନାଥଙ୍କ ଏକ ଚମକ୍ରାର ବୋଲି କହିଛନ୍ତି । ଜିଲ୍ଲାପାଳ କହିଛନ୍ତି, ତାଙ୍କୁ ଯାହା ମିଳିଛି, ସେ ତାହା ଗଣମାଧ୍ୟମରେ କହିଛନ୍ତି । ଏଥିପାଇଁ ଯେକୌଣସି ତଦନ୍ତ ପାଇଁ ସେ ପ୍ରସ୍ତୁତ । ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ଓ ମିଳିବା ବିବାଦ ଭିତରେ ଛନ୍ଦି ହୋଇଯାଇଛନ୍ତି ପୁରୀ ଜିଲ୍ଲାପାଳ ଅରବିନ୍ଦ ଅଗ୍ରୱାଲ । ଚାବି ହଜିବାଠାରୁ ଚାବି ମିଳିବା ଘଟଣା, ଅଧିକ ବିବାଦ ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିର ଭିତର ଭଣ୍ଡାର ଚାବି ହଜିଯିବା ଯେମିତି ବଡ ବିବାଦ ସୃଷ୍ଟିି କରିଥିଲା, ତାଠୁ ଅଧିକ ବିବାଦୀୟ ହୋଇପଡ଼ିଛି ଅଚାନକ୍ ଭଣ୍ଡାର ଚାବି ମିଳିବା ପ୍ରସଙ୍ଗ । ଟ୍ରେଜେରୀରେ ରହିବା ଚାବି ରେକର୍ଡ ରୁମକୁ କୁଆଡୁ ଆସିଲା ଏବଂ ପ୍ରକୃତ ଚାବି ବଦଳରେ ଡୁପ୍ଲିକେଟ୍ ଚାବି କେଉଁଠୁ ଆସିଲା, ତାକୁ ନେଇ ସନ୍ଦେହ ବଢୁଥିବା ବେଳେ ଆଜି ହାତ ଟେକି ଦେଇଛନ୍ତି ଜିଲ୍ଲାପାଳ । ଚାବି ହଜିବା ପ୍ରସଙ୍ଗରେ ତାଙ୍କୁ ଟାର୍ଗେଟ କରାଯାଉଥିବା ବେଳେ ସେ ଜଗନ୍ନାଥଙ୍କ ନିକଟରେ ହାତ ଟେକି ଦେଇଥିଲେ । ଆଉ ହଠାତ ରେକର୍ଡ଼ ରୁମରୁ ବନ୍ଦ ଥିବା ଲଫାପାରୁ ମିଳିଥିଲା ରତ୍ନଭଣ୍ଡାର ଚାବି ।
ଗୋଟିଏ ମାସରୁ ଅଧିକ ସମୟ ଧରି ଭଣ୍ଡାର ଚାବିକୁ ନେଇ ସାରା ରାଜ୍ୟରେ ତମ୍ବିତୋଫାନ୍ ଚାଲିଥିବା ବେଳେ ଅଚାନକ୍ ବୁଧବାର ଚାବି ମିଳିବା ଖବର ଆସିଲା । ହେଲେ ତାହା ସେହି ହଜିଥିବା ଚାବି ନଥିଲା । ଯାହାଫଳରେ ଏହି ବିବାଦରେ ଯୋଡି ହୋଇଗଲା ଏକ ନୂଆ ଫର୍ଦ୍ଦ । ଏବେ ରେକର୍ଡ ରୁମରୁ ମିଳିଥିବା ଚାବି ଏକ ଲଫାପା ଭିତରେ ରହିଛି । ଆଉ ଲଫାପା ଉପରେ ଲେଖା ରହିଛି ‘ଡୁପ୍ଲିକେଟ୍ ଭିତର ଭଣ୍ଡାର ଚାବି । ଯାହାକୁ ଜଉମୁଦ ଲାଗଇ ସିଲ୍ କରାଯାଇଛି । ଏହାକୁ ଭିତର ଭଣ୍ଡାର ତାଲାରେ ଖୋଲିବାକୁ ଚେଷ୍ଟା କଲେ ହିଁ ଜଣାପଡ଼ିବ ଯେ, ପ୍ରକୃତରେ ଏହା ଭିତର ଭଣ୍ଡାର ଚାବି କି ନୁହେଁ ।
ଚାବିକୁ ନେଇ ବିଭିନ୍ନ ସମୟରେ ଜିଲ୍ଲାପାଳ ରଖିଥିବା ମନ୍ତବ୍ୟ ହିଁ ତାଙ୍କୁ ଏବେ ଅଡୁଆ ପରିସ୍ଥିତିରେ ପକାଇ ଦେଇଛି । ହେଲେ ଜିଲ୍ଲାପାଳ ଯେକୌଣସି ତଦନ୍ତକୁ ସାମ୍ନା କରିବାକୁ ପ୍ରସ୍ତୁତ ଥିବା କହୁଛନ୍ତି । ଜିଲ୍ଲାପାଳ ପୂର୍ବରୁ ଏପ୍ରିଲ ୪ ତାରିଖରେ ଚାବି ଟ୍ରେଜରୀରେ ନଥିବା କଥା କହିଥିଲେ । ଯାହାକୁ ନେଇ ପୁଣିଥରେ ବିବାଦ ଦେଖାଦେଇଥିଲା । ଏସବୁ ଭିତରେ ଏବେ ପୁରା ଘଟଣାର ତଦନ୍ତ କରିବେ କମିଶନ, ହଜିଥିବା ଚାବି ଏବଂ ମିଳିଥିବା ଚାବିର ହେବ ଛାନବିନ୍ । ବନ୍ଦ ଲଫାପା ଭିତରେ ଥିବା ଚାବି ସତରେ କ’ଣ ଭଣ୍ଡାର ଘର ଚାବି ନା’ ଏହା ପଛରେ ଆଉ କିଛି ରହସ୍ୟ ଅଛି ତାହା ସାମ୍ନାକୁ ଆସିବ ।ବଡ କଥା ହେଉଛି- ଯେଉଁ ଭଣ୍ଡାର ଚାବିକୁ ନେଇ ରାଜ୍ୟବ୍ୟାପୀ ଏକ କ୍ଷୋଭର ବାତାବରଣ ସୃଷ୍ଟି ହୋଇଛି, ତାରି ଭିତରେ ଚାବିକୁ ନେଇ ଆସୁଥିବା ନୂଆ ନୂଆ କାହାଣୀ ସମସ୍ତଙ୍କୁ ଆହୁରି ବିଚଳିତ କରୁଛି ।