ଚର୍ଚ୍ଚାରେ ସରକାରୀ ବାବୁଙ୍କ ଶୀତଳ ଯୁଦ୍ଧ! ଚ୍ୟାମ୍ବର ଖୋଲା ନ ହେବାରୁ ବାହାରେ ଛିଡା ହେଲେ ଅତିରିକ୍ତ ଜିଲ୍ଲାପାଳ
କନକ ବ୍ୟୁରୋ : ଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳ ମଧ୍ୟରେ ଶୀତଳ ଯୁଦ୍ଧ । ଚାମ୍ବରରେ ତାଲା, ବାହାରେ ଠିଆ ହେଲେ ଅତିରିକ୍ତ ଜିଲ୍ଲାପାଳ । ମାଲକାନଗିରିରେ ଦୁଇ ବଡ ଅଧିକାରୀଙ୍କ ଭିତରେ ଲାଗିଥିବା ବିବାଦ ଚର୍ଚାରେ ରହିଛି । ତେବେ ବିବାଦର କାରଣ କଣ? କାହିଁକି ବଡ ଅଧିକାରୀଙ୍କ ଭିତରେ ଚାଲିଛି ବିବାଦ?
Kanak News is now on WhatsApp
Join and get latest news updates delivered to you via WhatsApp
ମାଲକାନଗିରିରେ ପ୍ରଶାସନିକ ସ୍ତରେ ବିବାଦ ଥମିବାର ନାଁ ଧରୁ ନାହିଁ । ଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳଙ୍କ ମଧ୍ୟରେ ଶୀତଳ ଯୁଦ୍ଧ ଚାଲିଥିବା ନେଇ ଚର୍ଚା ହେଉଛି । ଅତିରିକ୍ତ ଜିଲ୍ଲାପାଳ ଭାବେ ଅଯୋଧ୍ୟାକାନ୍ତ ଶତପଥୀ ଦାୟିତ୍ୱରେ ନେଇଥିବା ବେଳେ ତାଙ୍କ ଚ୍ୟାମ୍ବର ଖୋଲାଯାଇ ନାହିଁ । ଫଳରେ ଦୀର୍ଘ ସମୟ ଧରି ବାହାରେ ସେ ଠିଆ ହୋଇଥିବା ଦେଖିବାକୁ ମିଳିଛି ।
ଏଡିଏମଙ୍କୁ ନେଇ ଏହି ବିବାଦ ଦୀର୍ଘ ଦିନରୁ ଲାଗି ଆସିଛି । ଯେବେଠାରୁ ସେ ମାଲକାନଗିରି ଏଡିଏମ ଭାବେ ଦାୟିତ୍ୱ ନେଲେ ସେତେବେଳୁ ହିଁ ଏପରି ବିବାଦ ଆରମ୍ଭ ହୋଇଥିଲା । କୁହାଯାଏ, ପ୍ରଥମ ଦିନରୁ ହିଁ ଏଡିଏମ ସ୍ୱତନ୍ତ୍ର ଗାଡି, ସଶସ୍ତ୍ର ସୁରକ୍ଷାକର୍ମୀ, ଉପଯୁକ୍ତ ସରକାରୀ ବାସଭବନ ଦାବି କରି ବିବାଦୀୟ ପରିସ୍ଥିତି ସୃଷ୍ଟି କରିଥିଲେ । କିଛି ମାସ ତଳେ ସରକାରୀ ଗାଡି ମିଳିଲା ନାହିଁ ବୋଲି କହି ଚାଲି ଚାଲି ସେ ଅଫିସକୁ ଆସିଥିବା ଦେଖିବାକୁ ମିଳିଥିଲା । ଏହା ସହ ଜିଲ୍ଲାପାଳଙ୍କୁ ନଜଣାଇ ସେ ଜିଲ୍ଲାର ବହୁ ବିଡିଓଙ୍କ ବଦଳିକୁ ସ୍ୱୀକୃତି ଦେଇଥିଲେ ବୋଲି ମଧ୍ୟ ଅଭିଯୋଗ ହୁଏ ।
ଏପରିକି ଗତ ୭ ତାରିଖରେ ତାଙ୍କର ବଦଳି ହୋଇଥିବା ବେଳେ ଜିଲ୍ଲାପାଳଙ୍କୁ ନଜଣାଇ ସେ ନିଜ ନୂଆ କାର୍ଯ୍ୟସ୍ଥଳି ରାୟଗଡାକୁ ଯାଇଥିଲେ । କିନ୍ତୁ ନିର୍ବାଚନ କମିଶନ ଏହି ବଦଳିକୁ ସ୍ଥଗିତ କରିବା ପରେ ଅଯୋଧ୍ୟାକାନ୍ତ ଶତପଥୀ ପୁଣି ମାଲକାନଗିରି ଫେରିଛନ୍ତି । ତଥାପି ଜିଲ୍ଲାର ପ୍ରଶାସନ ସ୍ତରରେ ଥିବା ବିବାଦ ଥମୁନାହିଁ । ମାଲକାନଗିରି ଜିଲ୍ଲାପାଳ ଛୁଟିରେ ଥିବା ଯୋଗୁଁ ତାଙ୍କର ପ୍ରତିକ୍ରିୟା ମିଳି ପାରିନାହିଁ । ହେଲେ ବଡ ବଡ ଅଧିକାରୀଙ୍କ ଭିତରେ ଚାଲିଥିବା ଏଭଳି ଏକ ବିବାଦ ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି ।