ଜଗା-ବଳିଆଙ୍କ ଭଳି ଆଉ ଏକ ଯୋଡାମୁଣ୍ଡ ଶିଶୁଙ୍କର ହେଲା ସଫଳ ଚିକିତ୍ସା ! ଆମେରିକାରେ ଅପରେସନ ପରେ ସୁସ୍ଥ ହୋଇ ଘରକୁ ଫେରିଲେ ଦୁଇ ଶିଶୁ
କନକ ବ୍ୟୁରୋ : ସରିଛି ଜଗା-ବଳିଆର ପ୍ରଥମ ପର୍ଯ୍ୟାୟ ଅପରେସନ । ଯୋଡ଼ାମୁଣ୍ଡକୁ ଅଲଗା କରିବା ପାଇଁ ଦେଢ଼ମାସ ପରେ ହେବ ଦ୍ୱିତୀୟ ପର୍ଯ୍ୟାୟ ଅପରେସନ । ଯେତେବେଳେ ଜଗାବଳିଆଙ୍କ ସ୍ୱାସ୍ଥ୍ୟ ପାଇଁ ସାରା ଓଡ଼ିଶା ପ୍ରାର୍ଥନା କରୁଛି, ଠିକ୍ ସେତିକି ବେଳେ ଆମେରିକାରୁ ଆସିଛି ଏଭଳି ଏକ ଖବର । ଯାହା ଶୁଣିଲେ ଆଶ୍ଚର୍ଯ୍ୟ ହୋଇଯିବେ ଏବଂ ଆଶ୍ୱସ୍ତ ହୋଇଯିବେ ଯେ, ଜଗା-ବଳିଆ ବି ସୁସ୍ଥ ହୋଇ ଘରକୁ ଫେରିବେ ।
Kanak News is now on WhatsApp
Join and get latest news updates delivered to you via WhatsApp
ହସ୍ପିଟାଲରୁ ସୁସ୍ଥ ହୋଇ ଫେରୁଥିବା ଏଇ ଦୁଇ ଜଣ ଶିଶୁ ହେଲେ ଆମେରିକା ଭଲହାଲା ସହରର ଜଡାନ୍ ମ୍ୟାକଡୋନାଲ ଏବଂ ଆନିଆସ୍ ମ୍ୟାକଡୋନାଲ । ଜନାଡ୍ ଏବଂ ଆନିଆସଙ୍କ କାହାଣୀ ବି ଠିକ୍ କନ୍ଧମାଳର ଆମ ଜଗା-ବଳିଆଙ୍କ ଭଳି । ଜନ୍ମ ହେଲା ବେଳକୁ ଏହି ଜାଆଁଳା ଶିଶୁଙ୍କ ମୁଣ୍ଡ ଯୋଡ଼ି ହୋଇ ରହିଥିଲା । ଯାହା ବାପା-ମା’କୁ ଚିନ୍ତାରେ ପକାଇ ଦେଇଥିଲା । ଏହି ଜାଆଁଳା ଶିଶୁଙ୍କୁ ଠିକ୍ ୧୩ ମାସ ହୋଇଥିବା ବେଳେ ଚିକିତ୍ସା ପାଇଁ ଭର୍ତି କରାଯାଇଥିଲା ଲେଥେଡାଲ ଶିଶୁ ଡାକ୍ତରଖାନାରେ । ଆଉ ଯୋଡ଼ାମୁଣ୍ଡକୁ ଅଲଗା କରିବା ପାଇଁ ହୋଇଥିଲା ଦୀର୍ଘ ୨୭ ଘଂଟାର ମାରାଥନ ଅପରେସନ ।
ଅପରେସନର ପ୍ରାୟ ୧୦ ମାସ ପରେ ସଂପୂର୍ଣ୍ଣ ସୁସ୍ଥ ହୋଇ ଘରକୁ ଫେରିଛନ୍ତି ଜଡାନ୍ ଏବଂ ଆନିଆସ୍ । ଖିଆପିଆ କରିବା ସହ କୁନି କୁନି ପାଟିରେ ଖନେଇ ଖନେଇ କଥା ବି କହୁଛନ୍ତି ମ୍ୟାକଡୋନାଲ ପରିବାର ଏହି ଦୁଇ କୁନି ଶିଶୁ ।
ଆମେରିକାର ଏହି ଖବର ଓଡ଼ିଶା ଲୋକଙ୍କ ବିଶ୍ୱାସକୁ ଦୁଇଗୁଣିତ କରି ଦେଇଛି । ଠିକ୍ ଜଡାନ୍ ଓ ଆନିଆସଙ୍କ ଭଳି ଆମ ଜଗାବଳିଆ ବି ଏମିତି ସୁସ୍ଥ ହୋଇ ଘରକୁ ଫେରିବା ଆଶା ଆହୁରୀ ମଜବୁତ ହୋଇଛି । ଆଉ ଏସବୁ ଭିତରେ ଅପେକ୍ଷା ଜଗାବଳିଆଙ୍କ ଦ୍ୱିତୀୟ ପର୍ଯ୍ୟାୟ ଅପରେସନକୁ, ଯେତେବେଳେ ଯୋଡ଼ାମୁଣ୍ଡକୁ ଅଲଗା କରିବା ପାଇଁ ହେବ ଦ୍ୱିତୀୟ ଅପରେସନ ।