ଦେଶକୁ ବାର୍ତ୍ତା ଦେଉଛନ୍ତି ନବୀନ । ମାଓବାଦୀଙ୍କୁ ସମାଜର ମୁଖ୍ୟସ୍ରୋତରେ ସାମିଲ କରିବା ପାଇଁ ନବୀନଙ୍କ ନୂଆ ଫର୍ମୁଲା ।
ହାତରୁ ବନ୍ଧୁକ ଓ ହିଂସାର ମାର୍ଗ ଛାଡ଼ି କିପରି ସମ୍ମାନ ସହ ଜୀବନ ବିତାଇବେ ସେନେଇ ସରକାର ଆପଣାଉଛନ୍ତି ନୂଆ ତରିକା ।
କନକ ବ୍ୟୁରୋ: ରାଜ୍ୟରେ ଧିରୋ ହ୍ରାସ ପାଉଛି ମାଓବାଦୀଙ୍କ ଆତଙ୍କ ରାଜ୍ । କାରଣ ମାଓବାଦୀ ମାନଙ୍କୁ ଆତ୍ମସମର୍ପଣ କରି ସମାଜର ମୁଖ୍ୟସ୍ରୋତରେ ସାମିଲ୍ ହେବା ପାଇଁ ଆହ୍ୱାନ ଦେଉଛନ୍ତି ରାଜ୍ୟ ସରକାର । ହାତରୁ ବନ୍ଧୁକ ଓ ହିଂସାର ମାର୍ଗ ଛାଡ଼ି କିପରି ସମ୍ମାନ ସହ ଜୀବନ ବିତାଇବେ ସେନେଇ ସରକାର ଆପଣାଉଛନ୍ତି ନୂଆ ତରିକା । ଆଉ ଏହାର ଉଦାହରଣ ଗତ କିଛିଦିନ ତଳେ କଳିଙ୍ଗ ଷ୍ଟାଡ଼ିୟମରେ ହକି ବିଶ୍ୱକପର କ୍ୱାର୍ଟରଫାଇନାଲରେ ଦେଖିବାକୁ ମିଳିଥିଲା । ଯେଉଁଠି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମ୍ୟାଚ୍ ବସି ଦେଖୁଥିଲେ ତାଙ୍କ ନିକଟରେ କୌଣସି ଭିଭିଆଇପି ବସିନଥିଲେ ବରଂ ବସିଥିଲେ ନିକଟରେ ଆତ୍ମ ସମର୍ପଣ କରିଥିବା ୩୦ରୁ ଉଦ୍ଧ୍ୱର୍ ମାଓବାଦୀ । ଏବଂ ଯେଉଁମାନଙ୍କ ହୃଦୟରେ ବାହାର ଦୁନିଆ ବା ସରକାରଙ୍କୁ ନେଇ ଘୃଣାଭାବ ରହିଥିଲା ତାହାର ବିଲୋପ ଘଟିଥିବା ଏହି ଦୃଶ୍ୟ ହିଁ ବୟାନ କରିଛି । ଏବଂ ଏହାକୁ ନେଇ ମଧ୍ୟ ସାରା ଦେଶରେ ପ୍ରଶଂସା ସାଉଣ୍ଟିଛନ୍ତି ମୁଖ୍ୟମନ୍ତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ମାଓବାଦୀଙ୍କୁ ନୂଆ ଦୁନିଆ ବିଷୟରେ ଜାଣିବା, ପାଠ ପଢ଼ିବା, ସାଧାରଣ ଲୋକଙ୍କ ସହ ମିଶିବା ସମାଜର ମୁଖ୍ୟସ୍ରୋତରେ ସାମିଲ ହେବାପାଇଁ ସରକାର ଓ ପୋଲିସ ସବୁବେଳେ ଚେଷ୍ଟାରତ । ସେଥିପାଇଁ ତ ବିଗତ ୩ ବର୍ଷ ହେବ ରାଜ୍ୟରେ ମାଓ ଉପଦ୍ରବ ହ୍ରାସ ପାଇଥିବାବେଳେ ୮୦ରୁ ଉଦ୍ଧ୍ୱର୍ ମାଓବାସୀ ଆତ୍ମ ସମର୍ପଣ କରିଥିବା ରିପୋର୍ଟ କହୁଛି । କେବଳ ଯେ ସରକାର ଏନେଇ ଚେଷ୍ଟା କରୁଛନ୍ତି ତା’ନୁହେଁ ଏହାକୁ ସଫଳ କରାଇବା ଏବଂ ମାଓବାଦୀଙ୍କ ମନ ପରିବର୍ତ୍ତନ କରିବା ପାଇଁ ପୋଲିସ ବିଭାଗ, ଆରପିଏଫ,ଗ୍ରେ-ହଣ୍ଟ ଏବଂ ଏସଓଜି ସୁରକ୍ଷାବାହିନୀଙ୍କ ଭୂମିକା ପ୍ରଂଶସନୀୟ ।
ବିଗତ ୩ ବର୍ଷରେ ବଦଳିଛି ଲାଲକରିଡ଼ରର ନକ୍ସା । ଅତିରିକ୍ତ ପୋଲିସ ଡ଼ିଜିପି ଅପରେସନ ଆର,ପି କୋଚେଙ୍କ କହିବା ମୁତାବକ ୨୦୧୬ରୁ ବର୍ତ୍ତମାନ ପର୍ଯ୍ୟନ୍ତ ୮୨ ଜଣ ମାଓବାଦୀମାନେ ଆତ୍ମ ସମର୍ପଣ କରିଛନ୍ତି । ସେହିଭଳି ୧୦୦ରୁ ଉଦ୍ଧ୍ୱର୍ ମାଓବାଦୀଙ୍କୁ ଗିରଫ କରାଯାଇଛି । ବିଗତ ୩ ବର୍ଷର ରିପୋର୍ଟ କାର୍ଡକୁ ଯଦି ଅନୁଧ୍ୟାନ କରାଯାଏ ତେବେ, ଏହି ୩ ବର୍ଷରେ ରାଜ୍ୟରେ ମାଓ ଉପଦ୍ରବ ଘଟଣା ମଧ୍ୟ କ୍ରମଶଃ ହ୍ରାସ ପାଇବାରେ ଲାଗିଛି । କାରଣ ୨୦୧୬ବର୍ଷରେ ରାଜ୍ୟରେ ୬୮ଟି ମାଓ ଉପଦ୍ରବ ଘଟଣା ସାମ୍ନାକୁ ଆସିଥିବାବେଳେ ୨୦୧୭ରେ ୫୨ ଏବଂ ଚଳିତ ବର୍ଷ ସୁଦ୍ଧା ୪୦ରୁ କମ୍ ରହିଥିବା କହିଛନ୍ତି ଅତିରିକ୍ତ ଡିଜିପି ଅପରେସନ ଆର.ପି କୋଚେ ।
ମାଓବାଦୀ ମାନଙ୍କୁ ସମାଜର ମୁଖ୍ୟ ସ୍ରୋତକୁ ଫେରିବା ପାଇଁ ଅନେକ ମାଓବାଦୀ ଆତ୍ମ ସମର୍ପଣ କରିଛନ୍ତି । ଏପରିକି କ୍ଷେତ ବାଡ଼ି ଚାଷ କରି ଏକ ସୁନ୍ଦର ପରିବାର ସହ ଜୀବନ ଯାପନ କରୁଛନ୍ତି । ସବୁଠାରୁ ବଡ଼କଥାହେଲା ଯେ, ଗତ ଦୁଇ ଦିନ ତଳେ ୩୦ ମାଓବାଦୀଙ୍କୁ ନେଇ ରାଜଧାନୀ କଳିଙ୍ଗ ଷ୍ଟାଡିୟମର ଦୃଶ୍ୟ ସମଗ୍ର ଭାରତବର୍ଷକୁ ଭିନ୍ନ ଏକ ବାର୍ତା ପ୍ରଦାନ କରିଛି । ବିଶ୍ବକପ୍ ହକି ଯେମିତି ଓଡ଼ିଶାକୁ ଭାରତ ବର୍ଷରେ ସ୍ବତନ୍ତ୍ର ପରିଚୟ ଦେଇଛି, ସବୁଦିନ ପାଇଁ ଉଦାହରଣ ହୋଇ ରହିବ । ଠିକ୍ ସେମିତି କଳିଙ୍ଗ ଷ୍ଟାଡିୟମର ଏହି ଘଟଣା ଆଳରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପରୋକ୍ଷରେ ସଙ୍କେତ ଦେଇଛନ୍ତି, ଯେ ଥରେ ହିଂସା ମାର୍ଗ ଛାଡି ମୁଖ୍ୟ ସ୍ରୋତରେ ମାଓବାଦୀ ସାମିଲ ହେଲେ , ସମାଜ ଏମିତି ତାଙ୍କୁ ସମ୍ମାନ ଦେବ।