କେଉଁଝର : ବେଲବାହାଳିରେ କୁଶେଇ ସେତୁ ନିର୍ମାଣକୁ ନେଇ ଉତ୍ତେଜନା । ଘଟଣାସ୍ଥଳରେ ପୁଲିସ–ଜନତା ମୁହାଁମୁହିଁ ହୋଇଛନ୍ତି । କେଉଁଝର ଜିଲ୍ଲା ଆନନ୍ଦପୁର ବ୍ଲକ୍ କୁଶେଇ ନଦୀ ଉପରେ ସେତୁ ନିର୍ମାଣକୁ ନେଇ ଆଜି ପୁଲିସ ଓ ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ଜୋରଦାର ଉତ୍ତେଜନା ଦେଖା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଉତ୍ତେଜନା ପରିସ୍ଥିତି କାରଣରୁ ସେତୁ ନିର୍ମାଣ କାମ ବନ୍ଦ ରହିଥିବା ବେଳେ ଗତକାଲି ଠାରୁ ପ୍ରଶାସନ ପୁଣି ଥରେ ସେତୁ ନିର୍ମାଣ କାମ ଆରମ୍ଭ କରିଥିଲା । ଉତ୍ତେଜନା ଆଶଙ୍କା ଥିବାରୁ ଘଟଣାସ୍ଥଳରେ ୨୨ ପ୍ଲାଟୁନ୍ ପୁଲିସ ମୁତୟନ ହୋଇଥିଲା । ତେବେ ଗତକାଲି ଗ୍ରାମବାସୀଙ୍କ ପକ୍ଷରୁ କୌଣସି ବିରୋଧ ଦେଖିବାକୁ ମିଳି ନଥିଲା । ଆଜି ସକାଳୁ ମଧ୍ୟ କାମ ଜାରି ରହିଥିଲା । ମଧ୍ୟାହ୍ନ ସୁଦ୍ଧା ବି କୌଣସି ବିରୋଧାଭାସର ସୂଚନା ମିଳି ନଥିଲା ।
ହେଲେ ମଧ୍ୟାହ୍ନ ଭୋଜନ ପରେ ପୁଣି ଥରେ କାମ ଆରମ୍ଭ ହେବା ପରେ ହଠାତ୍ ସଂଘବଦ୍ଧ ହୋଇ ସ୍ଥାନୀୟ ଗ୍ରାମବାସୀ ଆକ୍ରମଣ କରିବା ସହ ପୁଲିସ ଉପରକୁ ଢେଲାପଥର ମାଡ କରିଥିଲେ । ଜବାବରେ ପୁଲିସ ମଧ୍ୟ ଲାଠି ଚାର୍ଜ କରିବା ସହ ଲୁହବୁହା ବାଷ୍ପ ପ୍ରୟୋଗ କରିଥିଲା । ଏହି ଘଟଣାରେ ପୁଲିସ ୩ ଜଣଙ୍କୁ ଗିରଫ କରିଥିବା ସୂଚନା ମିଳିଛି ।
୨ ମାସ ତଳେ ଏହି ସେତୁ ନିର୍ମାଣକୁ ନେଇ ଉତ୍ତେଜନା ଦେଖା ଦେଇଥିଲା । ସେବେଠାରୁ ସେତୁ ନିର୍ମାଣ ବନ୍ଦ ରହିଥିବା ବେଳେ ଗତକାଲିଠାରୁ ପୁଣି ପ୍ରଶାସନ ପକ୍ଷରୁ କାମ ଆରମ୍ଭ ହୋଇଥିଲା ।