ବରିଷ୍ଠ ନାଗରିକଙ୍କ ଅଭିଯୋଗ ପରେ ବଢ଼ିପାରେ ଆଧାର-ପ୍ୟାନ କାର୍ଡ ଲିଙ୍କ୍ ସମୟସୀମା !
ଆଜିକା ତାରିଖରେ ଆଧାରକାର୍ଡ ଓ ପ୍ୟାନ କାର୍ଡ ଜଣେ ବ୍ୟକ୍ତିର ସବୁଠାରୁ ପରିଚୟ । ଉଭୟ ସରକାରୀ ଓ ବେସରକାରୀ କାର୍ଯ୍ୟାଳୟରେ ଅଧିକାଂଶ କାମରେ ଆଧାରକାର୍ଡକୁ ବ୍ୟକ୍ତିର ପ୍ରକୃତ ପରିଚୟ ଭାବରେ ଗ୍ରହଣ କରାଯାଉଛି । ସେହିଭଳି ଆର୍ଥିକ କାରବାରରେ ପ୍ୟାନ କାର୍ଡ ଏକ ଗୁରୁତ୍ୱପୂର୍ଣ୍ଣ ପ୍ରମାଣ ପତ୍ର । ସେଥିପାଇଁ ଆଧାରକାର୍ଡ ସହିତ ପ୍ୟାନ କାର୍ଡକୁ ଆଗାମୀ ଜୁଲାଇ ୩୧ ମଧ୍ୟରେ ଯୋଡ଼ିବାକୁ ବାଧ୍ୟତାମୂଳକ କରିଛନ୍ତି ସରକାର ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ବିଭିନ୍ନ ଅସୁବିଧା ଯୋଗୁଁ ଲକ୍ଷ ଲକ୍ଷ ଲୋକ ଆଧାର କାର୍ଡକୁ ପ୍ୟାନ କାର୍ଡ ସହିତ ସଂଯୋଗ କରିପାରି ନାହାନ୍ତି । ଏହି କାରଣରୁ ସରକାର ସମୟସୀମାକୁ ବଢ଼ାଇବା ପାଇଁ ଚିନ୍ତା କରୁଛନ୍ତି । ଗଣମାଧ୍ୟମ ରିପୋର୍ଟ ଅନୁସାରେ, ଆଧାର ସହିତ ପ୍ୟାନକୁ ଯୋଡ଼ିବାକୁ ନେଇ ଆୟକର ବିଭାଗକୁ ଅନେକ ଗୁଡ଼ିଏ ଅଭିଯୋଗ ଆସିଛି । ଏମାନଙ୍କ ମଧ୍ୟରୁ କିଛି ଲୋକ ହେଉଛନ୍ତି ବରିଷ୍ଠ ନାଗରିକ ।
ଅଭିଯୋଗ ଅନୁସାରେ ଜଣେ ବ୍ୟକ୍ତିଙ୍କ ଦ୍ୱାରା ଆଧାର କାର୍ୟ୍ୟାଳୟ ଓ ଆୟକର କାର୍ୟ୍ୟାଳୟକୁ ଭିନ୍ନ ଭିନ୍ନ ତଥ୍ୟ ଦିଆଯାଇଥିବାରୁ ଆଧାରକାର୍ଡ ଓ ପ୍ୟାନକାର୍ଡକୁ ଲିଙ୍କ କରିବାରେ ଅସୁବିଧା ହେଉଛି । ସରକାରଙ୍କୁ ଏଭଳି ଅନେକଗୁଡ଼ିଏ ଅଭିଯୋଗ ଆସିଛି । ଲୋକମାନେ ପ୍ୟାନକାର୍ଡ ପାଇବା ପାଇଁ ସରକାରଙ୍କୁ ଦେଇଥିବା ତଥ୍ୟ ଓ ଆଧାରକାର୍ଡ ପାଇଁ ଦେଇଥିବା ତଥ୍ୟ ମଧ୍ୟରେ ସମାନତା ରହୁନାହିଁ ।
ସେହିଭଳି ବରିଷ୍ଠ ନାଗରିକମାନେ ଆଧାରକାର୍ଡ ସଂଶୋଧନ କରିବା ପାଇଁ ଦୀର୍ଘ ସମୟ ଧରି ଲାଇନରେ ରହିବାକୁ ପଡ଼ୁଥିବାରୁ ସେମାନେ ନାହିନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଅନ୍ୟପକ୍ଷରେ ଅଧିକାରୀ କହିଛନ୍ତି, ସେଣ୍ଟ୍ରାଲ ବୋର୍ଡ ଅଫ ଡାଇରେକ୍ଟ ଟ୍ୟାକ୍ସ(ସିବିଡିଟି) ଦ୍ୱାରା ସମୀକ୍ଷା କରାଯିବା ପରେ ଆଧାରକାର୍ଡ ସହିତ ପ୍ୟାନ କାର୍ଡକୁ ସଂଯୋଗ କରିବା ପାଇଁ ସାଧାରଣ ଲୋକଙ୍କୁ ଯଥେଷ୍ଟ ସମୟ ଦିଆଯାଇଥିଲା । ଆୟକର ରିଟର୍ଣ୍ଣ ଦାଖଲ କରିବାର ଶେଷ ତାରିଖ ହେଉଛି ଜୁଲାଇ ୩୧ ।
ସରକାରୀ ତଥ୍ୟ ଅନୁସାରେ ଜୁଲାଇ ୧୭ ମଧ୍ୟରେ ୨୫ ପ୍ରତିଶତ ପ୍ୟାନ କାର୍ଡଧାରୀ ସେମାନଙ୍କର ପ୍ୟାନକାର୍ଡକୁ ଆଧାରକାର୍ଡ ସହିତ ସଂଯୋଗ କରି ସାରିଛନ୍ତି । ଯେଉଁମାନଙ୍କର ବାର୍ଷିକ ଆୟ ୫ଲକ୍ଷ କିମ୍ବା ତା’ ଠାରୁ ଅଧିକ ଟଙ୍କା ସେମାନଙ୍କୁ ଆଧାରକାର୍ଡ ସହିତ ପ୍ୟାନକାର୍ଡକୁ ସଂଯୋଗ କରିବାକୁ ପଡ଼ିବ । ଏଥି ସହିତ ଜୁଲାଇ ୩୧ ସୁଦ୍ଧା ଅନଲାଇନରେ ଆଇଟି ରିଟର୍ଣ୍ଣ ଦାଖଲ କରିବାକୁ ହେବ ।