ଛାତିଫଟେଇ କାନ୍ଦୁଛି ଚିତ୍ରକୋଣ୍ଡା: ରାହା ଖୋଜୁଛି ରାଲଗୋଡ଼ା, ରାସ୍ତା ନଥିବାରୁ ରାସନ ପାଇଁ ଭରସା ସାଜିଛି ଘୋଡ଼ା ପିଠି ।
କନକ ବ୍ୟୁରୋ: ତୃଣମୂଳସ୍ତରରୁ ବିକାଶର ଦ୍ୱାହି ଦେଉଥିବା ନେତାଙ୍କ ପାଇଁ ଅଜଣା ପାଲଟିଛି ଚିତ୍ରକୋଣ୍ଡାର ରାଲେଗାଡ଼ା ପଞ୍ଚାୟତ । ଗାଁ ର ବିକାଶ ଆଉ ଆଦିବାସୀଙ୍କ ଉନତି ପାଇଁ ସରକାରଙ୍କ ମାଳମାଳ ଯୋଜନା , ହେଲେ ଅନ୍ଧାରିମୂଲକରେ ବଞ୍ଚୁଥିବା ଅନୁସୂଚିତ ଜାତି ଜନଜାତି ଲୋଙ୍କ ପାଇଁ ସତେ ଯେମିତି ଏହି ଯୋଜନା ସବୁ କେବଳ ନାଲିଫିତା ତଳେ ବନ୍ଧା ହୋଇପଡ଼ିଛି । ଯେଉଁଥି ପାଇଁ ରାଜ୍ୟରେ ଏବେବି ଏମିତି କିଛି ଅଞ୍ଚଳ ଅଛି , ଯେଉଁଠି ଏଯାଏଁ ପଡ଼ିନି ବିକାଶର ପାଦଚିହ୍ନ ।
Kanak News is now on WhatsApp
Join and get latest news updates delivered to you via WhatsApp
ସ୍ୱାଭିମାନ ଅଞ୍ଚଳଭାବେ ବୋଲାଉଥିବା ଚିତ୍ରକୋଣ୍ଡାଅଞ୍ଚଳରେ ଥିବା ରାଲେଗାଡା ପଞ୍ଚାୟତରେ ସ୍ୱାଧୀନତାର ୭୨ ବର୍ଷ ପରେ ମଧ୍ୟ ସରକାରୀ ଯୋଜନା ବାଟବଣା ହୋଇଯାଇଛି । ଆଉ ଏଠାରେ ପହଞ୍ଚିପାରିନାହିଁ କୌଣସି ମୌଳିକ ସୁବିଧା । ଖାଦ୍ୟ, ବସ୍ତ୍ର, ବାସଗୃହ ଭଳି ସର୍ବନିମ୍ନ ଆବଶ୍ୟକତା ଆଜି ବି ଏହି ପଞ୍ଚାୟତବାସୀଙ୍କ ପାଇଁ ସାତ ସପନ ପାଲଟିଛି । ଗାଁ ର ରାସ୍ତା କହିଲେ ଆବଡା ଖାବଡା ପାହାଡିଆ ଜଙ୍ଗଲ ରାସ୍ତା । ଆଉ ଘର କହିଲେ, ନୁଆଁଣିଆ ଝାଟିମାଟି କାନ୍ଥର ଘର ।
ସବୁଠାରୁ ବିଡମ୍ବନାର କଥା ହେଲା କି, ଗାଁ ଲୋକଙ୍କ ଅଭିଯୋଗ ମୁତାବକ, ରାଲେଗାଡା ପଞ୍ଚାୟତରେ ଏ ଯାଏଁ କେଉଁ ସରକାରୀ ବାବୁ କି ଜନ ପ୍ରତିନିଧିଙ୍କ ପାଦ ପଡ଼ିନାହିଁ । କାରଣ ବଣ ଜଙ୍ଗଲ ଘେରା ଓ ଦୁର୍ଗମ ଅଞ୍ଚଳକୁ ରାସ୍ତାଟିଏ ନ ଥିବା ବେଳେ ଶାସନ ପ୍ରଶାସନ ଏଠି ପହଞ୍ଚିବ ବା କେମିତି ? ଚାଉଳ, କିରୋସିନୀ, ଭୋତା ପଇସା ଆଣିବାକୁ ହେଲେ ଏଠାରୁ ଦଶ କିଲୋମିଟର ଦୂର ସାରକୁବନ୍ଧ ଗାଁ କୁ ଯିବାକୁ ପଡେ । ଆଉ ସାରକୁବନ୍ଧ ଗାଁ ରୁ ଘୋଡା ସାହାଯ୍ୟରେ ନିଜ ଗାଁ କୁ ଚାଉଳ ନେଇ ଯାଇଥାନ୍ତି ଗ୍ରାମବାସୀ ।
ଚଳିତ ବର୍ଷ ସାରକୁବନ୍ଧ ନାଳ ଉପରେ ଝୁଲା ପୋଲ ନିର୍ମାଣ କରାଗଲା ସେହି ଅଂଚଳକୁ ଯୋଗାଯୋଗ କରିବାପାଇଁ କିନ୍ତୁ ଏହି ପୋଲ ସାହାଯ୍ୟରେ ସାରକୁବନ୍ଧ ଗାଁ ପର୍ଯ୍ୟନ୍ତ ହିଁ ସମସ୍ତ ସୁବିଧା ମିଳିପାରୁଛି । ଏହି ପଞ୍ଚାୟତ ରେ ସ୍କୁଲ ଘରର ଫାଉଣ୍ଡେସନ ଅଛି ସତ କିନ୍ତୁ ସ୍କୁଲ ନାହିଁ । ଅଙ୍ଗନବାଡି କେନ୍ଦ୍ର କଥା ନ କହିବା ଭଲ । ବର୍ଷ ବର୍ଷ ଧରି ପାନୀୟଜଳ କଷ୍ଟ ଭାଗୁଛନ୍ତି ଗ୍ରାମବାସୀ । କିନ୍ତୁ ହାତ ନପତେଇ ସ୍ୱାଭିମାନୀ ଭାବେ ହଳଦୀ ଚାଷକରି ନିଜର ଗୁଜୁରାଣ ମେଣ୍ଟାଉଛନ୍ତି ରାଲେଗାଡ଼ା ପଞ୍ଚାୟତବାସୀ । ଆଉ ବୋଝ ଉପରେ ନଳିତା ବିଡା ଭଳି ଏହି ଅଞ୍ଚଳ ଅତି ଘଞ୍ଚ ଜଙ୍ଗଲ ହୋଇଥିବା ଯୋଗୁଁ ମାଓବାଦୀ ମାନେ ଏଠାରେ ନିଜର କାୟା ବିସ୍ତାର କରିଛନ୍ତି । ଯାହା ଗ୍ରାମବାସୀଙ୍କ ଜୀବନଯାପନ ଖଣ୍ଡାଧାର ଉପରେ ରହିଥିବା ଭଳି ମନେ ହେଉଛି ।