ଭାରତକୁ ଚୀନର ଡବଲ ଧୋକା ! ଲଦାଖ ଆକାଶରେ ଉଡିଥିଲା ଚୀନ୍ ସେନାର ଦୁଇଟି ହେଲିକପ୍ଟର, ସୀମା ଭିତରକୁ କଲା ଅନୁପ୍ରବେଶ ।
କନକ ବ୍ୟୁରୋ : ଭାରତକୁ ଡବଲ ଧୋକା ଦେଇଛି ଚୀନ୍ । ଡୋକଲାମ ବିବାଦ ପରେ ପୁଣି ଥରେ ଭାରତୀୟ ସୀମାରେ ପ୍ରବେଶ କରିବାକୁ ସାହସ ଦେଖାଇଛି ଚୀନ । ଚୀନ୍ ସେନା ପକ୍ଷରୁ ଦୁଇଟି ସ୍ଥାନରେ ଭାରତୀୟ ସୀମା ଭିତରକୁ ପ୍ରବେଶ କରିବାକୁ ଉଦ୍ୟମ କରାଯାଇଛି । ଗୋଟିଏ ପଟେ ଜମ୍ମୁ କଶ୍ମୀର ଲଦାଖ ଅଂଚଳରେ ଚୀନ୍ ସେନାର ଦୁଇଟି ହେଲିକପ୍ଟର ଭାରତୀୟ ଆକାଶ ସୀମା ଭିତରେ ଦେଖିବାକୁ ମିଳିଛି । ଅନ୍ୟପଟେ ଅରୁଣାଚଳପ୍ରଦେଶରେ ଚୀନ୍ ସୈନିକଙ୍କୁ ଭାରତୀୟ ସୀମା ଭିତରେ ଦେଖିବାକୁ ମିଳିଛି । ଭାରତ-ତିବତ ସୀମା ପୋଲିସ ବା ଆଇଟିବିପି ରିପୋର୍ଟରେ ଏହି ଖୁଲାସା ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ରିପୋର୍ଟ ଅନୁସାରେ ଚୀନର ଦୁଇଟି ହେଲିକପ୍ଟର ଅଗଷ୍ଟ ୨୭ ତାରିଖ ସକାଳ ୯ଟାରେ ଲଦାଖର ବୁର୍ତସେ ଏବଂ ଟ୍ରେକ୍ ଜଙ୍କସନ୍ ପୋଷ୍ଟ ନିକଟରେ ଦେଖିବାକୁ ମିଳିଥିଲା । ଏହି ୨ଟି ହେଲିକପ୍ଟର ଏମଆଇ-୧୭ ଭଳି ଦେଖା ଯାଉଥିଲେ । ଭାରତୀୟ ସୀମା ଭିତରେ ଏହି ହେଲିକପ୍ଟର ଦୁଇଟି ପ୍ରାୟ ୫ ମିନିଟ ପର୍ଯ୍ୟନ୍ତ ଦେଖିବାକୁ ମିଳିଥିଲା । ଲଦାଖର ବୁର୍ତସେ ଓ ଟ୍ରେକ୍ ଜଂକସନ୍ ପୋଷ୍ଟ ଟ୍ରିଗ ହାଇଟ ଡ଼େପସାଂଗ ଅଂଚଳରେ ପଡ଼ୁଥିବାରୁ ରଣନୈତିକ ଦୃଷ୍ଟିରୁ ଭାରତ ପାଇଁ ଏହା ବେଶ୍ ଗୁରୁତ୍ୱ ରଖୁଛି । ସେପଟେ ଅରୁଣାଚଳ ପ୍ରଦେଶର ଦିବାଙ୍ଗ ଘାଟିରେ ମଧ୍ୟ ଚୀନ୍ ସେନା ପ୍ରବେଶ କରିଥିଲା । ସ୍ଥାନୀୟ ଗ୍ରାମବାସୀଙ୍କ ପାଖରୁ ଏପରି ସୂଚନା ମିଳିବା ପରେ ଭାରତୀୟ ସେନା ପକ୍ଷରୁ ଅଧିକ ସତର୍କତା ପୂର୍ବକ ଚୀନ୍ ସେନାର ଗତିବିଧି ଉପରେ ନଜର ରଖାଯାଇଛି ।