ଡୋକଲାମ ବିବାଦକୁ ଗୋଟିଏ ବର୍ଷ ବିତିଗଲାଣି । ଭାରତ ସହ ଚୀନର ସଂପର୍କରେ ଟିକିଏ ସୁଧାର ଆସିବା ମଧ୍ୟ କୁହାଯାଉଛି । କିନ୍ତୁ ବିବାଦୀୟ ଅଞ୍ଚଳରେ ଚୀନର ସଂଦେହଜନକ କାର୍ୟ୍ୟକଳାପ ଜାରି ରହିଛି । ଭାରତ ସୀମାକୁ ଲାଗିଥିବା ତିବ୍ଦତ ଅଞ୍ଚଳରେ ଚୀନ ନିୟମିତ ଭାବେ ଯୁଦ୍ଧାଭ୍ୟାସ ଜାରି ରଖିଛି । ଏହା ସହିତ ଯୁଦ୍ଧ ହେଲେ କିପରି ବିଭିନ୍ନ ଉପକରଣ ଏ ଅଂଚଳକୁ ଆସିପାରିବ, ସାଧାରଣ ଲୋକଙ୍କୁ କିପରି ସ୍ଥାନାନ୍ତର କରାଯିବ ତାହା ଉପରେ ମଧ୍ୟ ଅଭ୍ୟାସ କରୁଛି ଚୀନ ।
Kanak News is now on WhatsApp
Join and get latest news updates delivered to you via WhatsApp
ଗତ ମଙ୍ଗଳବାର ଦିନ ଚୀନ ସେନା ପିପୁଲ୍ସ ଲିବରେସନ ଆର୍ମି ପକ୍ଷରୁ ତିବ୍ଦତରେ ଏକ ବଡ଼ ଧରଣର ଅଭ୍ୟାସ କରାଯାଇଛି । ଡୋକଲାମ ପରେ ଏହା ଏହି ଧରଣର ସବୁଠୁ ବଡ଼ ଅଭ୍ୟାସ ବୋଲି କୁହାଯାଉଛି । ହିମାଳୟର ପ୍ରତିକୂଳ ପରିବେଶ ପରିବେଶରେ କିପରି ଯୁଦ୍ଧ କରିହେବ, ସ୍ଥାନୀୟ ଲୋକଙ୍କ ସହାୟତା କିପରି ମିଳିପାରିବ ସେ ନେଇ ଚୀନ ଉଦ୍ୟମ କରୁଛି । ଏଥିରୁ ଜଣାପଡୁଛି ଯେ ଚୀନ ଭବିଷ୍ୟତରେ ଭାରତ ସହ ଯୁଦ୍ଧ ସମ୍ଭାବନାକୁ ଅସ୍ୱୀକାର କରୁନାହିଁ ।
ଗତ ବର୍ଷ ଜୁନରେ ଭୁଟାନର ବିବାଦୀୟ ଅଞ୍ଚଳ ଡୋକଲାମକୁ ନେଇ ଭାରତ ଓ ଚୀନ ସେନା ଦୀର୍ଘ ୭୩ ଦିନ ଧରି ମୁହାଁମୁହିଁ ରହିଥିଲେ । ଚୀନ ଡୋକଲାମକୁ ନିଜର ଅଞ୍ଚଳ ବୋଲି କହୁଛି । ଚୀନ ସେନା ଡୋକଲାମ ଅଂଚଳରେ ତମ୍ବୁ ପକାଇ ରହିବା ପରେ ଭୁଟାନର ଅନୁରୋଧ କ୍ରମେ ଭାରତୀୟ ସେନା ତାହାର ବିରୋଧ କରିଥିଲା । କିନ୍ତୁ ଭାରତ ଚୀନ ସୀମାରେ ଅନୁପ୍ରବେଶ କରିଛି ବୋଲି ଚୀନ ଅଭିଯୋଗ କରିଥିଲା ।