ପର୍ବତ ଦୋହଲାଇବା ସହଜ ହେଲେ ଚୀନ ସେନାକୁ ନୁହେଁ ! ଭାରତକୁ ନାଲିଆଖି ଦେଖାଇଲା ଡ୍ରାଗନ୍
ଚାଇନାର ପ୍ରତିରକ୍ଷା ମନ୍ତ୍ରଣାଳୟ ପୁଣି ଭାରତକୁ ନାଲିଆଖି ଦେଖାଇଛି । ନିଜ ସୀମା ଓ ସାର୍ବଭୌମତ୍ୱ ବଜାୟ ରଖିବାକୁ ଚୀନ୍ ସେନାର ଦକ୍ଷତା ଓ ପାରିବା ପଣିଆକୁ ନେଇ ପ୍ରଶ୍ନ କରିବା କିମ୍ବା ଦ୍ୱନ୍ଦ୍ୱରେ ରହିବାକୁ ଭାରତକୁ ମନା କରିଛି ଏହି ପଡୋଶୀ ରାଷ୍ଟ୍ର । ଅର୍ଥାତ୍ ପରୋକ୍ଷରେ ଚେତାଇ ଦେବାକୁ ଚାହିଁଛି ଯେ, ଚୀନ୍ ସେନାର ଦକ୍ଷତା ପ୍ରତି ଭାରତ ପ୍ରଶ୍ନବାଚୀ ସୃଷ୍ଟିନ’କରୁ । ନଚେତ ପରିସ୍ଥିତି ବିଗିଡିବ । ଏହାର ଅଧାରରେ ଭାରତକୁ ଯୁଦ୍ଧର ଧମକ ଦେବାକୁ ମଧ୍ୟ ପଛାଇନାହିଁ ଚୀନ୍ ।
Kanak News is now on WhatsApp
Join and get latest news updates delivered to you via WhatsApp
ଚୀନ୍ ପ୍ରତିରକ୍ଷା ମନ୍ତ୍ରଣାଳୟର ମୁଖପାତ୍ର କହିଛନ୍ତି, ପର୍ବତକୁ ଦୋହଲାଇବା ସହଜ ହେଲେ ପିପୁଲ୍ସ ଲିବରେସନ୍ ଆର୍ମି ବା ପିଏଲଏକୁ ହଲାଇବା କଷ୍ଟକର । ନିଜ ଦେଶର ସାର୍ବଭୌମତ୍ୱ ବଜାୟ ରଖିବାକୁ ଚୀନ୍ ସେନା ସଂପୂର୍ଣ୍ଣ ସକ୍ଷମ ଓ ସର୍ବଦା ସେନାର ଶକ୍ତି ବୃଦ୍ଧି ଉପରେ ଗୁରୁତ୍ୱ ଦିଆଯାଉଛି ବୋଲି ଡ୍ରାଗନ୍ କହିଛି । ସିକ୍କିମର ଡୋକଲାମ ଅଂଳରେ ଭାରତ ଓ ଚୀନ୍ ମଧ୍ୟରେ ବଢୁଥିବା ଟେନସନ୍ ଦୃଷ୍ଟିକୋଣରୁ ଏହି ବୟାନ ଯଥେଷ୍ଟ ଗୁରୁତ୍ୱ ବହନ କରୁଛି । ଚୀନ୍ ସରକାର ପରେ ଏବେ ଚୀନ୍ ସେନା ଭାରତକୁ ନାଲିଆଖି ଦେଖାଇବାକୁ ଆଗକୁ ଆସିଛି ।
ଚୀନ୍ ସେନା ପକ୍ଷରୁ ଦିଆଯାଇଥିବା ବୟାନ ଅନୁସାରେ, ଡୋକଲାମ୍ ଅଂଚଳରୁ ଭାରତୀୟ ସେନା ପଛକୁ ହଟିଯାଉ, ନଚେତ୍ ଚାଇନା ନିଜ ସେନା ସଂଖ୍ୟା ଆହୁରି ବୃଦ୍ଧି କରିବ । ୧ ଅଗଷ୍ଟରେ ପିଏଲଏକୁ ପୁରିବ ୯୦ ବର୍ଷ । ଆଉ ଏହା ପୁର୍ବରୁ ଏକ ଶକ୍ତିଶାଳୀ ବାର୍ତ୍ତା ଦେଇଛି ଚୀନ୍ ସେନା । ଗତ ୯୦ ବର୍ଷ ଧରି ନିଜ ସୀମାର ରକ୍ଷା କରିବାକୁ ପିଏଲଏ ସକ୍ଷମ ଆଉ ଆଗକୁ ମଧ୍ୟ ଏଦିଗରେ କାର୍ଯ୍ୟ ଜାରି ରଖିବ ବୋଲି ସେନା ମୁଖପାତ୍ର କହିଛନ୍ତି ।
ଗତ ଜୁନ୍ ମଧ୍ୟ ଭାଗରେ ନିଜ ସୀମା ମଧ୍ୟରେ ଅର୍ଥାତ୍ ଡୋଙ୍ଗଲଙ୍ଗ ଅଂଚଳରେ ଚୀନ୍ ସେନା ଏକ ସଡକ ନିର୍ମାଣ କରୁଥିବା ବେଳେ ଭାରତୀୟ ସେନା ଅନ୍ତର୍ଜାତୀୟ ନିୟମର ଉଲ୍ଲଂଘନ କରି ଚୀନ୍ ସେନାର କାମରେ ବାଧା ଆଣିଥିଲା । ତେଣୁ ବିବାଦୀୟ ଅଂଚଳରୁ ସେନା ଅପସାରି ନେବାକୁ ଭାରତକୁ ପରାମର୍ଶ ଦେଇଛି ଚୀନ୍ । ଏହି ସମୟରେ ଭାରତ ବୟାନ୍ ଜରି କରି କହିଥିଲା, ସୀମାରେ ଚାଇନା ନିର୍ମାଣ କରୁଥିବା ଏହି ରାସ୍ତାର ଗୁରୁତର ପ୍ରଭାବ ରହିଛି । ହେଲେ ଏହି ସମୟରେ ଉଭୟ ରାଷ୍ଟ୍ର ମଧ୍ୟରେ ହୋଇଥିବା କିଛି ବୟାନ୍ ବିବାଦକୁ ଆହୁରି ଆଗକୁ ନେଇଥିଲା ।
ଚୀନ୍ ମିଡିଆରେ ପୂର୍ବରୁ ପ୍ରକାଶ ପାଇଥିବା ଖବର ଅନୁସାରେ, ଡୋକଲାମ ବିବାଦକୁ ନେଇ ଯୁଦ୍ଧ କରିବା ପାଇଁ ଚୀନ୍ ପଛଘୁଂଚା ଦେବନାହିଁ ଏବଂ ଯଦି ଏପରି ହୁଏ ତେବେ ଭାରତକୁ ଏହାର ପରିମାଣ ଭୋଗିବାକୁ ପଡିପାରେ । ଚୀନର ସରକାରୀ ଖବରକାଗଜ ଗ୍ଲୋବାଲ ଟାଇମ୍ସ ଆହୁରି ମଧ୍ୟ ପ୍ରକାଶ କରିଥିଲା, ୧୯୬୨ ଯୁଦ୍ଧ ପରେ ଚୀନକୁ କ୍ରମାଗତ ଭାବେ ଭାରତ ଉସୁକାଉଛି । ଏପରିକି ସୀମାରେ ଚୀନର ସେନା ଯୁଦ୍ଧାଭ୍ୟାସ କରୁଥିବାରୁ ଭିଡିଓ ମଧ୍ୟ ପ୍ରକାଶ କରିଥିଲା ଗ୍ଲୋବାଲ ଟାଇମ୍ସ ।
ସେହିପରି ସୀମାରେ ପରିସ୍ଥିତି, ସମ୍ଭାବ୍ୟ ଯୁଦ୍ଧ ଓ ସେନା ମୁତୟନ ନେଇ ଜେଟଲୀ କହିଥିଲେ, ୧୯୬୨ର ଭାରତ ଓ ବର୍ତ୍ତମାନର ଭାରତ ମଧ୍ୟରେ ଅନେକ ପରିବର୍ତ୍ତନ ଆସିଛି । ଯାହାର ଜବାବରେ ଭାରତକୁ ନାଲି ଆଖି ଦେଖାଇ ଚୀନ୍ କହିଥିଲା, ନିଜ ସୀମା ସୁରକ୍ଷା ପାଇଁ ଯୁଦ୍ଧ ପାଇଁ ଆମେ ପ୍ରସ୍ତୁତ । ୧୮୯୦ ସିନୋ ବ୍ରିଟିଶ ଚୁକ୍ତି ଅନୁଯାୟୀ ଭାରତ-ଚୀନ୍ ମଧ୍ୟରେ ସିକ୍କିମ ଠାରେ ସୀମା ନିୟନ୍ତ୍ରଣ କରାଯାଇଥିଲା ଏବଂ ଭାରତ ଏହି ଚୁକ୍ତିକୁ ସମ୍ମାନ ଜଣାଉ । ଏହାସହ ଡୋକଲାମରେ ପ୍ରବେଶ କରିବା ପାଇଁ ଭୁଟାନକୁ କଭର ଅପ୍ ଭାବେ ଭାରତ ବ୍ୟବହାର କରୁଛି ବୋଲି ଚୀନ୍ ଅଭିଯୋଗ କରିଥିଲା ।
ତେବେ ବୈଦେଶିକ ବ୍ୟାପାର ମନ୍ତ୍ରୀ ସୁଷମା ସ୍ୱରାଜ କଡା ପ୍ରତିକ୍ରିୟା ରଖି କହିଥିଲେ, ଚୀନର ମୁକାବିଲା ପାଇଁ ଭାରତ ସଂପୂର୍ଣ ରୂପେ ସକ୍ଷମ । ଚୀନ, ଡୋକଲାମ ଟ୍ରାଇ ଜଙ୍କସନ ଶେଷ ହେଉଥିବା କ୍ଷେତ୍ରର ସ୍ଥିତି ବଦଳାଇବା ପାଇଁ ପ୍ରୟାସ କରୁଛି । ରାସ୍ତାର ମରାମତି ଇତ୍ୟାଦି କାମ କରି ଏହି କ୍ଷେତ୍ରରେ ଆଧିପତ୍ୟ ବିସ୍ତାର ପାଇଁ ଚୀନ୍ ଉଦ୍ୟମ କରୁଛି । ଯାହାକି ଭାରତ ପାଇଁ ବିପଜ୍ଜନକ ସାବ୍ୟସ୍ତ ହୋଇପାରେ । ଫଳରେ ଭାରତୀୟ ସେନା ଏହାର ବିରୋଧ କରିବାରୁ ଚୀନ୍ ବାରମ୍ବାର ପରିଣାମ ଭୋଗିବାକୁ ଧମକ ଦେଉଛି ।
ଯଦି ଯୁଦ୍ଧ ଭଳି ପରିସ୍ଥିତି ସୃଷ୍ଟି ହୁଏ ତେବେ ଏହାର ମୁକାବିଲା ପାଇଁ ଆମେ ସମ୍ପୂର୍ଣ୍ଣ ଭାବେ ସକ୍ଷମ ବୋଲି ପୂର୍ବରୁ ଦୃଢୋକ୍ତି ପ୍ରକାଶ କରିଥିଲେ ସୁଷମା । ଡୋକଲାମ କ୍ଷେତ୍ରରୁ ସେନା ପ୍ରତ୍ୟାହାର ପାଇଁ ମଧ୍ୟ ଭାରତ ଉପରେ ଚାପ ସୃଷ୍ଟି କରୁଛି ଚୀନ୍ । କିନ୍ତୁ ଚୀନର କାର୍ଯ୍ୟକଳାପକୁ ବିରୋଧ କରିବା ପାଇଁ ନିୟମ ଓ ଆଇନ ଭାରତ ସପକ୍ଷରେ ଅଛି । ତେଣୁ ଚୀନ ଯଦି ସୀମାରୁ ସେନା ପ୍ରତ୍ୟାହାର କରେ ତେବେ ଆମେ ମଧ୍ୟ ସେନା ଫେରାଇ ଆଣିବୁ ବୋଲି କହିଥିଲେ ବୈଦେଶିକ ମନ୍ତ୍ରୀ ।
ତେବେ ଏହା ଭିତରେ ଉଭୟ ଦେଶ ମଧ୍ୟରେ ଚାଲିଥିବା ବୟାନବାଜି ଆଉ ପରସ୍ପରକୁ ନାଲି ଆଖି ଦେଖାଇବା ଦିନକୁ ଦିନ ଜଟିଳ ହେବାରେ ଲାଗିଛି । ଉଭୟ ଦେଶର କୁଟନୈତିକ ବିଶେଷଜ୍ଞ ସ୍ଥିତିକୁ ସାମାନ୍ୟ କରିବାକୁ ଉଦ୍ୟମ କରୁଥିବା ବେଳେ ଏଭଳି ବୟାନବାଜି ସ୍ଥିତିକୁ ଜଟିଳ କରୁଥିବା ଅନୁମାନ କରାଯାଉଛି ।