ଭାରତକୁ ପୁଣି ଚୀନର ଧମକ ! ଗ୍ଲୋବାଲ ଟାଇମ୍ସରେ ପ୍ରକାଶ, ଡୋକ୍ଲାମ୍ ସୀମା ବିବାଦ ନେଇ ଯୁଦ୍ଧ ପାଇଁ ପ୍ରସ୍ତୁତ ଚୀନ
କନକ ବ୍ୟୁରୋ : ଭାରତକୁ ପୁଣି ଧମକାଇଲା ଚୀନ୍ । ଭାରତ ଓ ଚୀନ୍ ମଧ୍ୟରେ ଲାଗିରହିଥିବା ସୀମା ବିବାଦ ବଢିବାରେ ଲାଗିଛି । ଏହାରି ମଧ୍ୟରେ ଡୋକଲାମ ସୀମା ବିବାଦକୁ ନେଇ ଭାରତକୁ ପୁଣି ନାଲି ଆଖି ଦେଖାଇଛି ଚୀନ୍ । କୌଣସି ପରିସ୍ଥିତିର ସମ୍ମୁଖିନ ହେବା ପାଇଁ ଚୀନ୍ ପ୍ରସ୍ତୁତ ବୋଲି ଚୀନ୍ ମିଡିଆରେ ଖବର ପ୍ରକାଶ ପାଇଛି । ଡୋକଲାମ ବିବାଦକୁ ନେଇ ଯୁଦ୍ଧ କରିବା ପାଇଁ ମଧ୍ୟ ଚୀନ୍ ପଛଘୁଂଚା ଦେବନାହିଁ ଏବଂ ଯଦି ଏପରି ହୁଏ ତେବେ ଭାରତକୁ ଏହାର ପରିମାଣ ଭୋଗିବାକୁ ପଡିବ ବୋଲି ଏଥିରେ ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଚୀନର ସରକାରୀ ଖବରକାଗଜ ଗ୍ଲୋବାଲ ଟାଇମ୍ସ ଆହୁରୀ ମଧ୍ୟ ପ୍ରକାଶ କରିଛି ଯେ, ୧୯୬୨ ଯୁଦ୍ଧ ପରେ ଚୀନକୁ କ୍ରମାଗତ ଭାବେ ଭାରତ ଉସୁକାଉଛି । ଆଗାମୀ ଦିନରେ ସମସ୍ତ ପରିସ୍ଥିତିର ସମ୍ମୁଖିନ ହେବାକୁ ଚୀନ୍ ପ୍ରସ୍ତୁତ ରହିବା ଦରକାର ବୋଲି ମଧ୍ୟ ଏହି ଲେଖାରେ ଉଲ୍ଲେଖ ରହିଛି । ସୀମାରେ ଲାଗିରହିଥିବା ଉତ୍ତେଜନା ପାଇଁ ଚୀନ ଆଗକୁ ଆସି ଏହାର ମୁକାବିଲା କରିବା ଆବଶ୍ୟକ । ଏବଂ ସୀମାରେ ଭାରତକୁ ମଧ୍ୟ କଡା ମୁକାବିଲାର ସମ୍ମୁଖିନ ହେବାକୁ ପଡିବ ବୋଲି ଗ୍ଲୋବାଲ ଟାଇମ୍ସରେ ଖବର ପ୍ରକାଶ ପାଇଛି । ଡୋକଲାମ ଅଂଚଳରେ ଯେଉଁ ସଡକ ନିର୍ମାଣକୁ ନେଇ ବିବାଦ ଆରମ୍ଭ ହୋଇଥିଲା ସେହି ନିର୍ମାଣ କାମ ପୁଣିଥରେ ଆରମ୍ଭ କରିବା ଉଚିତ । ଏହାସହ ସୀମାରେ ଚୀନ୍ ସେନାଙ୍କ ସଂଖ୍ୟା ବଢାଇବା ଦରକାର ବୋଲି ଏଥିରେ ଲେଖାଅଛି ।
ଚୀନ୍ ଏକ ସର୍ବଭୌମ୍ୟ ରାଷ୍ଟ୍ର ହୋଇଥିବାରୁ ଏହା ଚୀନର ଅଧିକାର ବୋଲି ଲେଖିଛି ଗ୍ଲୋବାଲ ଟାଇମ୍ସ । ଚୀନ୍ କୌଣସି ପ୍ରକାର ଯୁଦ୍ଧକୁ ଭୟ କରେ ନାହିଁ ବରଂ ଏଥିପାଥଇଁ ନିଜକୁ ପ୍ରସ୍ତୁତ କରୁଛି ବୋଲି ଏହି ଲେଖାରେ ପ୍ରକାଶ ପାଇଛି । ଡୋକଲାମ ଅଂଚଳରେ ଜୁନ୍ ୧୬ରୁ ଦୁଇ ଦେଶ ମଧ୍ୟରେ ବିବାଦ ଲାଗିରହିଥିବା ବେଳେ ଗ୍ଲୋବାଲ ଟାଇମ୍ସ କ୍ରମାଗତ ଭାବେ ଭାରତକୁ ଧମକ ଦେଇ ଏପରି ଲେଖା ପ୍ରକାଶ କରୁଛି । ସୀମାରେ ଚୀନର ସେନା ଯୁଦ୍ଧାଭ୍ୟାସ କରୁଥିବାରୁ ଭିଡିଓ ମଧ୍ୟ ପ୍ରକାଶ କରିଥିଲା ଗ୍ଲୋବାଲ ଟାଇମ୍ସ ।