ପୁଣିଥରେ ଭାରତୀୟ ସୀମା ମଧ୍ୟକୁ ଅନୁପ୍ରବେଶ କରିଛନ୍ତି ଡ୍ରାଗନବାହିନୀ । କିନ୍ତୁ ଚଳିତଥର ଭାରତୀୟ ସୀମା ମଧ୍ୟକୁ ପ୍ରବେଶ କରିବାକୁ ନୂଆ ରଣନୀତି ଆପଣାଇଛି ଚୀନ୍ । ମୋଟର ସାଇକେଲ ମାଧ୍ୟମରେ ଚୀନ୍ ସେନା ଭାରତୀୟ ସୀମା ମଧ୍ୟକୁ ପ୍ରବେଶ କରିଛନ୍ତି । ଚଳିତ ମାସରେ ଉତ୍ତରାଖଣ୍ଡର ବାରାହୋତି ଅଞ୍ଚଳରେ ଡ୍ରାଗନବାହିନୀ ଅନୁପ୍ରବେଶ କରି ଭାରତର ଚିନ୍ତା ବଢାଇଛି ।
Kanak News is now on WhatsApp
Join and get latest news updates delivered to you via WhatsApp
ଆଇଟିବିପିର ସୁତ୍ର ଅନୁଯାୟୀ, ଜୁଲାଇ ୧୦ ତାରିଖରେ ବାରାହେତିର ତୁନଜୁନ ଅଞ୍ଚଳରେ ଚୀନ୍ ସୈନିକ ମାନେ ବାଇକରେ ଭାରତୀୟ ସୀମା ମଧ୍ୟକୁ ଅନୁପ୍ରବେଶ କରିଥିଲେ । ଜଣେ ସୈନିକ ବାଇକରେ ବସି ଭାରତୀୟ ସୀମାର ୫୦୦ ମିଟର ପର୍ଯ୍ୟନ୍ତ ଭିତରକୁ ଅନୁପ୍ରବେଶ କରିଥିଲେ । ତେବେ ଭାରତୀୟ ସେନାର ବିରୋଧ ପରେ ଡ୍ରାଗନବାହିନୀ ଉକ୍ତ ଅଞ୍ଚଳରୁ ଫେରି ଯାଇଥିଲେ । ଆଇଟିବିପି ଅନୁଯାୟୀ, ଜୁଲାଇ ମାସରେ ପାଖାପାଖି ୫ ଥର ଚୀନ ସୈନିକ ମାନେ ଭାରତୀୟ ସୀମା ମଧ୍ୟକୁ ପ୍ରବେଶ କରିଥିଲେ । ପ୍ରଥମେ ୮ ଜୁଲାଇରେ ଡ୍ରାଗନବାହିନୀର ୩୨ ଜଣ ସୈନିକ ଛୋଟ ଛୋଟ ଗାଡି ଗୁଡିକରେ ଅନୁପ୍ରବେଶ କରିବା ସହ ଭାରତୀୟ ସୀମାର ୪ କିଲୋମିଟର ଭିତରକୁ ଚାଲି ଆସିଥିଲେ । ଏହାପରେ ସେହିଦିନ ପୁଣିଥରେ ଘୋଡାରେ ବସି କିଛି ଚୀନ ସୈନିକ ଉକ୍ତ ଅଞ୍ଚଳକୁ ଆସିଥିଲେ ।
ତେବେ ଭାରତୀୟ ସେନାର ବିରୋଧ ପରେ ଚୀନ ସୈନିକ ମାନେ ଉକ୍ତ ଅଞ୍ଚଳରୁ ଫେରି ଯାଇଥିଲେ । ମିଳିଥିବା ଖବର ଅନୁଯାୟୀ, ୩ ଜୁଲାଇ, ୬ ଜୁଲାଇ, ୭ ଜୁଲାଇରେ ମଧ୍ୟ ଡ୍ରାଗନବାହିନୀ ତୁନଜୁନର ପାଖାପାଖି ୨୦୦ ମିଟର ଭିତରକୁ ଚାଲି ଆସିଥିଲେ । କିନ୍ତୁ ବାରମ୍ବାର ଡ୍ରାଗନବାହିନୀର ଏଭଳି ଅନୁପ୍ରବେଶ ଭାରତ ପାଇଁ ଚିନ୍ତାର କାରଣ ପାଲଟିଛି । ଏହାପୂର୍ବରୁ ମଧ୍ୟ ବାରାହେତି ଅଞ୍ଚଳକୁ ନେଇ ଅନେକ ସମୟରେ ଚର୍ଚ୍ଚା ହୋଇଛି । କାରଣ ଏହି ଅଞ୍ଚଳରେ ଚୀନ ସେନା ବାରମ୍ବାର ଅନୁପ୍ରବେଶ କରି ନିଜର ଆଧିପତ୍ୟ ଦେଖାଇବାକୁ ଚାହୁଁଛି ।
ଉତ୍ତରାଖଣ୍ଡ ହିମାଳୟ କ୍ଷେତ୍ରରେ ଆସୁଛି । ଆଉ ସବୁଠୁ ବଡ କଥା ହେଲା,ଏହି ରାଜ୍ୟ ୩୪୫ କିଲୋମିଟର ଅଞ୍ଚଳ ଚୀନ ସୀମାକୁ ଲାଗି କରି ରହିଛି । ଖାସକରି ଚମୋଲି, ଉତ୍ତରକାଶୀ ଓ ପିଥୋରଗଡ ଜିଲ୍ଲାର ସୀମା ଚୀନ ସୀମାର ପାଖରେ ରହିଛି । ତେଣୁ ଅଧିକାଂଶ ସମୟ ଚୀନ ସେନା ଏଠାରେ ପ୍ରବେଶ କରିଥାନ୍ତି । ଗୋଟିଏ ସମୟରେ ଏଠାକାର ନିବାସୀ ମାନଙ୍କର ତିବ୍ଦତ ସହ ବ୍ୟବସାୟିକ ସମ୍ବନ୍ଧ ରହିଥିଲା । କିନ୍ତୁ ୧୯୬୨ ମସିହାରେ ଚୀନ ସହ ଯୁଦ୍ଧ ହେବା ପରେ ଏହି ସମ୍ବନ୍ଧରେ ଲକ୍ଷ୍ମଣରେଖା ଟଣା ହୋଇଥିଲା । ସେବେଠାରୁ ବାରମ୍ବାର ଚୀନ ଏହି ଅଞ୍ଚଳ ଉପରେ ଆଧିପତ୍ୟ ଜାହିର କରିବାକୁ ପ୍ରୟାସ କରି ଆସୁଛି ।