ଟ୍ୟାଙ୍କ ଓ ହେଲିକପ୍ଟରକୁ ନେଇ ସୀମାରେ ଯୁଦ୍ଧାଭ୍ୟାସ କଲା ଡ୍ରାଗନବାହିନୀ ! ଚୀନ୍ ଗଣମାଧ୍ୟମରେ ପ୍ରକାଶ ପାଇଲା ସାଂଘାତିକ ତଥ୍ୟ
କନକ ବ୍ୟୁରୋ : ଭାରତ ଓ ଚୀନ୍ ଆକାଶରେ ଏବେ ଯୁଦ୍ଧର କଳାବାଦଲ ଘୂରି ବୁଲୁଛି । ଭାରତ ଓ ଚୀନ୍ ମଧ୍ୟରେ ଦେଖା ଦେଇଥିବା ଡୋକଲାମ ବିବାଦ ଥମିବାର ନାଁ ନେଉନଥିବା ବେଳେ ଚୀନର ଆଉ ଏକ ଚାଲାକି ସାମ୍ନାକୁ ଆସିଛି । ଚୀନ୍ ମିଡିଆ ରିପୋର୍ଟ ଅନୁଯାୟୀ, ଡ୍ରାଗନବାହିନୀ ବର୍ଡର ଠାରୁ କିଛି ଦୂରରେ ଟ୍ୟାଙ୍କ ଓ ହେଲିକପ୍ଟର ସହ ଯୁଦ୍ଧାଭ୍ୟାସ ଆରମ୍ଭ କରିଛି ।
Kanak News is now on WhatsApp
Join and get latest news updates delivered to you via WhatsApp
ଚୀନ୍ ଗଣମାଧ୍ୟମ ଚାଇନା ସେଣ୍ଟ୍ରାଲ ଟେଲିଭିଜନରେ ପ୍ରକାଶିତ ରିପୋର୍ଟ ଅନୁଯାୟୀ, ସୀମା ପାଶ୍ୱର୍ବତ୍ତୀ ଅଞ୍ଚଳରେ ଚୀନର ପିପୁଲ୍ସ ଲିବରେସନ ଆର୍ମିର ଯବାନ ମାନେ ଯୁଦ୍ଧାଭ୍ୟାସ ଆରମ୍ଭ କରିଛନ୍ତି । ଏହି ଯୁଦ୍ଧାଭ୍ୟାସରେ ପିଏଲଏର ୧୦ଟି ୟୁନିଟ ସହ ବାୟୁସେନାର ୟୁନିଟ ମଧ୍ୟ ଭାଗ ନେଇଛନ୍ତି । ଭାରତୀୟ ସୀମା ନିକଟବର୍ତ୍ତୀ ଅଞ୍ଚଳରେ ୱେଷ୍ଟର୍ଣ୍ଣ ଥିଏଟର କମାଣ୍ଟରଙ୍କ ନେତୃତ୍ୱରେ ଏହି ମର୍କଡ୍ରିଲ କରାଯାଇଛି । ଏହି ମର୍କଡ୍ରିଲରେ ଟ୍ୟାଙ୍କର ଶକ୍ତି ପରୀକ୍ଷଣ କରାଯାଉଥିବା ବେଳେ ହେଲିକପ୍ଟରରୁ ଗୁଳିବର୍ଷା କରାଯାଉଥିବାର ଭିଡିଓ ସାମ୍ନାକୁ ଆସିଛି ।
ଡୋକଲାମ ବିବାଦର ସମାଧାନର ବାଟ ବାହାରି ନଥିବା ବେଳେ ଅଗଷ୍ଟ ୧୫ରେ ଚୀନ୍ ସେନା ଲଦାଖ ଅଞ୍ଚଳରେ ପୁଣି ଥରେ ଅନୁପ୍ରବେଶ କରିବାକୁ ଚେଷ୍ଟା କରଥିଲା । କିନ୍ତୁ ଭାରତୀୟ ଯବାନ ମାନେ ଚୀନର ଏହି ଚାଲାକିକୁ ସଫଳ ହେବାକୁ ଦେଇନଥିଲେ । ତେଣୁ ଅନ୍ୟ ଉପାୟ ନପାଇ ଡ୍ରାଗନବାହିନୀ ଭାରତୀୟ ଯବାନଙ୍କ ଉପରକୁ ପଥର ଫିଙ୍ଗିଥିଲେ । ଭାରତ ମଧ୍ୟ ଅନୁରୂପ ଭାବେ ଚୀନ୍ ସେନାକୁ ପଥର ଫିଙ୍ଗିଥିଲା । ଫଳରେ ଉଭୟ ପକ୍ଷର କିଛି ସୈନିକ ଆହତ ହୋଇଥିଲେ ।
କଣ ଏହି ଡୋକଲାମ ବିବାଦ:ଡୋକଲାମ କ୍ଷେତ୍ର ଭାରତ-ଚୀନ୍ -ଭୂଟାନ ଟ୍ରାଇଜଙ୍କସନରେ ଅବସ୍ଥିତ । ଏହି କ୍ଷେତ୍ରଟି ମୁଖ୍ୟତଃ ଭୂଟାନ ସୀମାରେ ଅବସ୍ଥିତ । କିନ୍ତୁ ଚୀନ୍ ଏହି କ୍ଷେତ୍ରରେ ଦାଦାଗିରି ଦେଖାଉଛି । ଚଳିତ ବର୍ଷ ଜୁନ ମାସରେ ଚୀନ୍ ଏହି ଅଞ୍ଚଳକୁ ନିଜର ବୋଲି କହି ସଡକ ନିର୍ମାଣ ଆରମ୍ଭ କରିଥିଲା । କିନ୍ତୁ ଭାରତୀୟ ସେନା ଚୀନ୍ କରୁଥିବା ସଡକ ନିର୍ମାଣକୁ ବନ୍ଦ କରିବା ପରେ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଛି ।
କାରଣ ଭାରତ-ଭୂଟାନ ମଧ୍ୟରେ ପ୍ରତିରକ୍ଷା କ୍ଷେତ୍ରରେ ହୋଇଥିବା ଚୁକ୍ତି ଅନୁଯାୟୀ, ବାହ୍ୟ ଆକ୍ରମଣରୁ ଭୂଟାନକୁ ରକ୍ଷା କରିବା ପାଇଁ ଭାରତ ପ୍ରତିଶୃତିବଦ୍ଧ । ତେଣୁ ଚୀନ ଭୂଟାନ ସୀମାରେ କରୁଥିବା ସଡ଼କ ନିର୍ମାଣକୁ ଭାରତ ବନ୍ଦ କରିଛି । ଯାହାକୁ ସହଜରେ ଗ୍ରହଣ କରିପାରୁ ନାହିଁ ଚୀନ୍ । ତେଣୁ ନିଜର ଆଧିପତ୍ୟ ଜାହିର କରିବା ପାଇଁ ଭାରତକୁ ବାରମ୍ବାର ଯୁଦ୍ଧ ଧମକ ଦେଉଛି ।