ସୋସିଆଲ ମିଡିଆରେ ଗୁଜବକୁ ନେଇ ଓଡ଼ିଶାରେ ଚାଲିଛି ମାରପିଟ! ପିଲା ଚୋର ସନ୍ଦେହରେ ଅଜଣା ଓ ସନ୍ଦିଗ୍ଧ ବ୍ୟକ୍ତିଙ୍କୁ ଆକ୍ରମଣ କରୁଛନ୍ତି ସ୍ଥାନୀୟ ଲୋକ
କନକ ବ୍ୟୁରୋ : ସୋସିଆଲ୍ ମିଡିଆରେ ମିଛ ଖବରକୁ ନେଇ ରାଜ୍ୟର ବିଭିନ୍ନ ଜିଲ୍ଲା ଗୁଡିକରେ ଚାଲିଛି ମାରପିଟ୍ । ଯେଉଁଠି ଅଜଣା ବ୍ୟକ୍ତିଙ୍କୁ ଦେଖୁଛନ୍ତି, ତାଙ୍କୁ ଆକ୍ରମଣ କରିଦେଉଛନ୍ତି । ସୋସିଆଲ୍ ମିଡିଆରେ ଭାଇରାଲ୍ ହୋଇଥିବା ଏକ ମେସେଜରେ କୁହାଯାଇଛି, ବିହାରରୁ ପ୍ରାୟ ୫ଶହ ଜଣ ପିଲାଚୋର ଓଡିଶାରେ ପସିଆସିଛନ୍ତି ଏବଂ ସେମାନେ ଛଟୋ ପିଲାଙ୍କୁ ଚୋରି କରି ତାଙ୍କ କିଡନୀ ଓ ଆଖି କାଢି ନେଉଛନ୍ତି । ସେହି ମେସେଜରେ ଫଟୋ ବି ଦିଆଯାଇଛି । ଏହାକୁ ଦେଖି ଲୋକେ ତାତି ଉଠିଛନ୍ତି ଏବଂ ଯେଉଁ ଅଜଣା ବ୍ୟକ୍ତିଙ୍କୁ ଦେଖୁଛନ୍ତି , ତାଉପରେ ଆକ୍ରମଣ କରୁଛନ୍ତି । ଆଜି ରାୟଗଡା, ବ୍ରହ୍ମପୁର, କନ୍ଧମାଳ ଓ ଭୁବନେଶ୍ୱରର ସାଲିଆ ସାହିରେ ଏଭଳି ଆକ୍ରମଣ ଘଟଣା ଦେଖିବାକୁ ମିଳିଛି । ସେପଟେ ପୋଲିସ ଡିଜି କହିଛନ୍ତି, ସୋସିଆଲ ମିଡିଆରେ ଭାଇରାଲ୍ ହେଉଥିବା ଏହି ଖବର ସମ୍ପୂଣ୍ଣ ମିଛ ।
Kanak News is now on WhatsApp
Join and get latest news updates delivered to you via WhatsApp
ପିଲା ଚୋରୀର ଗୁଜବ ଖେଳିଗଲା ପରେ ଅଜରା ବ୍ୟକ୍ତିଙ୍କୁ ସନ୍ଦେହଜନକ ଅବସ୍ଥାରେ ଦେଖାଦେବା ମାତ୍ରେ ଆରମ୍ଭ ହୋଇଯାଉଛି ମାଡ଼ । ଜଙ୍ଗଲରେ ନିଆଁ ବ୍ୟାପିବା ପରି ଓଡ଼ିଶାର ଗୋଟିଏ ଜିଲ୍ଲାରୁ ଆଉ ଗୋଟିଏ ଜିଲ୍ଲାକୁ ମାଡ଼ ବ୍ୟାପି ଚାଲିଛି । ରାୟଗଡ଼ାରେ ସୋସିଆଲ ମିଡ଼ିଆରେ ମେସେଜ ଦେଖିବା ପରେ ଲୋକଙ୍କ ମନରେ ଧାରଣା ହୋଇଥିଲା ପିଲା ଚୋରୀ କରିବାକୁ ରାକେଟ ବୁଲୁଛି । ଆଉ ଅଜଣା ବ୍ୟକ୍ତିଙ୍କୁ ଦେଖିଦେଲେ, ଜୀବନ ନେବାକୁ ମଧ୍ୟ ପଛାଉ ନାହାନ୍ତି ଲୋକ ।
ବିହାରରୁ ୫୦୦ ଯୁବକଙ୍କ ପିଲା ଚୋରି ରାକେଟ ଏବେ ଓଡ଼ିଶା ଆସିଛନ୍ତି । ଏମାନେ ପିଲାଙ୍କୁ ଚୋରି କରି ନେବା ସହ ସେମାନଙ୍କ ଆଖି ତାଡ଼ି ନେଇ ଯାଉଛନ୍ତି ।ଏହି ସବୁ ମେସେଜ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଏହି ମେସେଜରେ କେତେ ଜଣଙ୍କର ଆଖି ତାଡ଼ି ନିଆଯାଉଥିବା ମଧ୍ୟ କୁହାଯାଉଛି । ଆଉ ଏହା ଦେଖି ନିଜ ନିଜ ଅଞ୍ଚଳରେ ସଦିଗ୍ଧ ବ୍ୟକ୍ତିଙ୍କୁ ଦେଖିବା ମାତ୍ରେ ରକ୍ତମୁଖା ହେଉଛନ୍ତି ସାଧାରଣ ଲୋକ । ଏସବୁ ଭିତରେ ନୟାଗଡ଼ରେ ମଧ୍ୟ ଜଣେ ବ୍ୟକ୍ତିଙ୍କ ଉପରେ ମାଡ଼ର ବର୍ଷା ହୋଇଛି । ବିଚରା ନିର୍ଦ୍ଦୋଷ ବ୍ୟକ୍ତି ଗାୟତ୍ରୀ ପରିବାରର ଏବଂ ଲୋକଙ୍କୁ ନୈତିକ ଶିକ୍ଷା ଦେବାକୁ ଆସନ୍ତି । କିନ୍ତୁ ଆଜି ସେ ପଡ଼ିଗଲେ-ଉତ୍ତ୍ୟକ୍ତ ଲୋକଙ୍କ ହାବୁଡ଼ରେ ।
ସାରା ରାଜ୍ୟରେ ଏଭଳି ଘଟଣା ଘଟୁଥିବାର ରିପୋର୍ଟ ଆସିବା ପରେ ପୋଲିସ ଡ଼ିଜି ଏନେଇ ପ୍ରତିକ୍ରିୟା ଦେଇ କହିଛନ୍ତି, ସୋସିଆଲ ମିଡ଼ିଆରେ ଗୁଜବ ସୃଷ୍ଟି କରାଯାଉଛି । ତେଣୁ ଏହାକୁ ବନ୍ଦ କରିବାକୁ ହେଲେ ସୋସିଆଲ ମିଡ଼ିଆରେ ଏଭଳି ଗୁଜବ ବନ୍ଦ କରିବାକୁ ପଡ଼ିବ । ବ୍ରହ୍ମପୁର, ଖଲ୍ଲିକୋଟ, ନୟାଗଡ଼, ଦଶପଲ୍ଲା, କୋରାପୁଟର କୁମୁଲି, ଜୟପୁରର ଜୟନଗର ଓ କନ୍ଧମାଳ ଭଳି ସ୍ଥାନରେ ପିଲାଚୋର ସନ୍ଦେହରେ ମାଡ଼ ମାରି ଲହୁଲୁହାଣ କରିଦେଇଛନ୍ତି ନିର୍ଦ୍ଦୋଷ ବ୍ୟକ୍ତିଙ୍କୁ । ତେବେ ଏହାର ମୂଲ କାରଣ-ସୋସିଆଲ ମିଡ଼ିଆରେ ଏଭଳି ମେସେଜ କିଏ ପଠାଉଛି ଓ କାହିଁକି ପଠାଉଛି ତାହା ସ୍ପଷ୍ଟ ହୋଇପାରିନାହିଁ ।