ଭୁବନେଶ୍ୱର ବ୍ୟୁରୋ,କନକ ନ୍ୟୁଜ୍ : ଆଜି ତିନୋଟି ବିଭାଗର ସମୀକ୍ଷା କରିବେ ମୁଖ୍ୟମନ୍ତ୍ରୀ । ପୂର୍ବାହ୍ନରେ କ୍ରିଡା ଓ ଯୁବ ବ୍ୟାପାର ମନ୍ତ୍ରାଳୟର କାମର ସମୀକ୍ଷା କରିବା ସହ ଆଗାମୀ ଯୋଜନା ନେଇ ଆଲୋଚନା କରିବେ । ଅପରାହ୍ନରେ ଉଚ୍ଚ ଶିକ୍ଷା ବିଭାଗର ସମୀକ୍ଷା କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏଥିରେ ଯୁକ୍ତ ଦୁଇ ଶିକ୍ଷା ବିଭାଗରେ ହେଉଥିବା ସଂସ୍କାର କାର୍ଯ୍ୟକ୍ରମର ବିଶଦ ଆଲୋଚନା ହେବ ବୋଲି ସୂଚନା ମିଳିଛି । ସେହିପରି ଆଜି ଗ୍ରାମ ଉନ୍ନୟନ ବିଭାଗର ଗ୍ରାମ୍ୟ ଜଳଯୋଗାଣ ବ୍ୟବସ୍ଥା ନେଇ ମୁଖ୍ୟମନ୍ତ୍ରୀ ସମୀକ୍ଷା କରିବେ ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି । ଏହି ସମୀକ୍ଷାରେ ବିଭାଗୀୟ ମନ୍ତ୍ରୀ ସମେତ ବରିଷ୍ଠ ଅଧିକାରୀ ମାନେ ଉପସ୍ଥିତ ରହି ନିଜ ନିଜ ବିଭାଗର ସଫଳତା ନେଇ ତଥ୍ୟ ଉପସ୍ଥାପନା କରିବେ ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀ ନିଜ ନିର୍ବାଚନୀ ଇସ୍ତାହାରରେ ଦେଇଥିବା ପ୍ରତିଶ୍ରୁତି ଦିଗରେ ବିଭାଗମାନେ କେତେ କାମ ହାତକୁ ନେଇ ସଫଳତା ପାଇଛନ୍ତି ତାହା ସମୀକ୍ଷା କରୁଛନ୍ତି । ଗତକାଲି ୪ଟି ବିଭାଗର ସମୀକ୍ଷା କରିଥିଲେ ମୁଖ୍ୟମନ୍ତ୍ରୀ । ସକାଳେ ପରିବହନ ଓ ଗ୍ରାମ୍ୟ ଉନ୍ନୟନ ପରେ ସନ୍ଧ୍ୟାରେ ଖାଦ୍ୟ ଯୋଗାଣ ଏବଂ ପରିବେଶ ଓ ଜଙ୍ଗଲ ବିଭାଗର କାର୍ଯ୍ୟ ଦକ୍ଷତାର ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ । ଜାତୀୟ ଖାଦ୍ୟ ସୁରକ୍ଷା ଉପରେ ଗୁରୁତ୍ୱ ଦେଇଛନ୍ତି ନବୀନ । ଯୋଗ୍ୟ ହିତାଧିକାରୀଙ୍କୁ ରାସନ କାର୍ଡ ମିଳିବା ଉପରେ ଗୁରୁତ୍ୱ ଦେଇଛନ୍ତି । ସେହିପରି ଜଙ୍ଗଲ ଓ ପରିବେଶ ବିଭାଗର କାର୍ଯ୍ୟାବଳୀ ଉପରେ ମଧ୍ୟ ସମୀକ୍ଷା କରାଯାଇଛି । ଜଙ୍ଗଲ ଯୋଜନା ଜରିଆରେ ୧୧୭୦ କୋଟି ଟଙ୍କା ବିନଯୋଗ କରାଯିବ ବୋଲି କହିଛନ୍ତି ବିଭାଗୀୟ ମନ୍ତ୍ରୀ । ଚଳିତ ବର୍ଷ ଜୁନ ମାସରୁ କେନ୍ଦୁପତ୍ର ତୋଳାଳିଙ୍କୁ ବୋନସ ଜରିଆରେ ୬୨ କୋଟି ପ୍ରଦାନ କରାଯିବ ।
ସେପଟେ ରାଜ୍ୟ ସରକାରଙ୍କ ସମୀକ୍ଷାକୁ ନାଟକ ବୋଲି କହିଛି ବିରୋଧୀ ବିଜେପି । ସରକାର ନାଟକ ବନ୍ଦ କରି ବାସ୍ତବ କାର୍ଯ୍ୟ ସମୀକ୍ଷା କରନ୍ତୁ ବୋଲି କହିଛନ୍ତି ବିଜେପି ଉପସଭାପତି ସମୀର ମହାନ୍ତି ।