କଲମା କନ୍ଦଳ ! ନବୀନ୍ ବ୍ୟାରେଜକୁ ରାଜନୈତିକ ପ୍ରସଙ୍ଗ ବନାଇ ରଖିବାକୁ ଚାହୁଁଛନ୍ତି କହିଲେ ଛତିଶଗଡ଼ ସରକାର
କନକ ବ୍ୟୁରୋ : ପୁଣି ରାଜନୀତିକୁ ଫେରିଲା ମହାନଦୀ ପ୍ରସଙ୍ଗ । ଛତିଶଗଡ଼ ସରକାର ମହାନଦୀର ଉପର ମୁଣ୍ଡରେ ତିଆରି କରିଥିବା କଲମା ବ୍ୟାରେଜ ଗେଟ୍ ବନ୍ଦ କରିଦେବାରୁ ତଳମୁଣ୍ଡରେ ଜଳ ପ୍ରବାହ କମିଯାଇଛି । ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରମଣ ସିଂଙ୍କୁ ଚିଠି ଲେଖିବା ପରେ ପ୍ରତିକ୍ରିୟା ରଖିଛନ୍ତି ଛତିଶଗଡ ସରକାର । ଜଳସଂପଦ ମନ୍ତ୍ରୀ କହିଛନ୍ତି କୌଣସି ଗେଟ୍ ବନ୍ଦ କରାଯାଇ ନାହିଁ । ସେପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଏନେଇ କେନ୍ଦ୍ର ଜଳ ସଂପଦ ମନ୍ତ୍ରାଳୟ ଓ ଛତିଶଗଡ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ । ହେଲେ ବିଜେଡି କହିଛି, ଶିଳ୍ପ ସଂସ୍ଥାକୁ ପାଣି ଯୋଗାଇ ଦେବାପାଇଁ ଏକପାଖିଆ ଭାବେ ଓଡିଶା ବିରୋଧୀ ନିଷ୍ପତି ନେଉଛି ଛତିଶଗଡ । ଆଉ କଂଗ୍ରେସ୍ ଏହି ପ୍ରସଙ୍ଗରେ ଉଭୟ ବିଜେଡି ଓ ବିଜେପିକୁ ଦାୟୀ କରିଛି ।
Kanak News is now on WhatsApp
Join and get latest news updates delivered to you via WhatsApp
ମହାନଦୀ ଉପର ମୁଣ୍ଡରେ ଛତିଶଗଡ ସରକାରଙ୍କ ୬ଟି ବ୍ୟାରେଜ୍ ନିର୍ମାଣକୁ ବିରୋଧ କରି ସୁପ୍ରିମକୋର୍ଟ ଯାଇଛନ୍ତି ଓଡିଶା ସରକାର । ମାମଲା ବିଚାରାଧୀନ ଥିବା ସମୟରେ ଶିଳ୍ପ ସଂସ୍ଥାକୁ ପାଣି ଯୋଗାଇ ଦେବା ପାଇଁ ଛତିଶଗଡ ଉପରମୁଣ୍ଡରେ ପାଣି ଅଟକାଇବାକୁ ନିନ୍ଦା କରିଛି ଓଡିଶା । ତେବେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏହି ପ୍ରସଙ୍ଗରେ ପ୍ରତିକ୍ରିୟା ରଖି ଉଭୟ କେନ୍ଦ୍ର ଓ ଛତିଶଗଡ ସରକାରଙ୍କ ସହ ଆଲୋଚନା କରିବାକୁ ପ୍ରତିଶ୍ରୁତି ଦେଇଛନ୍ତି ।
ମହାନଦୀ ହେଉଛି ଓଡିଶାର ଜୀବନଧାରା । ଯଦି ମହାନଦୀର ପାଣିକୁ ଅଟକାଇ ଦିଆଯାଏ ତେବେ ଓଡିଶାର ତଳ ମୁଣ୍ଡରେ ଏକ ବଡ ଧରଣର ଜଳାଭାବ ସୃଷ୍ଟି ହେବାର ଆଶଙ୍କା ରହିଛି । ଗୋଟିଏ ପଟେ ଓଡିଶା ସରକାର କହୁଛନ୍ତି ବ୍ୟାରେଜର ଗେଟ୍ ବନ୍ଦ ପାଇଁ ପ୍ରଭାବ ସୃଷ୍ଟି ହୋଇଛି, ଅନ୍ୟପଟେ ଛତିଶଗଡ କହୁଛି ଯେତିକି ପାଣି ଛଡାଯିବା କଥା ଛଡାଯାଉଛି । ପ୍ରଶ୍ନ ଉଠୁଛି ଛତିଶଗଡ ସରକାର ସତ କହୁଛନ୍ତି ତ?