କନକ ବ୍ୟୁରୋ : ବିଜେପୁର ଊପନିର୍ବାଚନ ପାଇଁ ବିଜେପି ପକ୍ଷରୁ ୪୦ ଜଣିଆ ଷ୍ଟାର ପ୍ରଚାରକଙ୍କ ତାଲିକା ପ୍ରକାଶ ପାଇଛି । ତେବେ ଏହି ତାଲିକା ପ୍ରକାଶ ପାଇବା ପରେ ରାଜନୀତିକ ଚର୍ଚ୍ଚା ଆରମ୍ଭ ହୋଇଛି । କାରଣ ବିଜେପୁର ମୈଦାନକୁ ଷ୍ଟାର ପ୍ରଚାରକ ଭାବେ ରମଣ ସିଂ ଆସିବା ନେଇ ବିଜେପି ନେତା ଯେଉଁଭଳି ଭାବେ ଗଳା ଫଟାଇ କହୁଥିଲେ ସେଥିରେ ବ୍ରେକ ଲଗାଇଛନ୍ତି ଖୋଦ ଦଳୀୟ ମୁଖିଆ । କାରଣ ଷ୍ଟାର ପ୍ରଚାରକ ଲିଷ୍ଟରୁ ରମଣଙ୍କୁ ବଏକଟ କରାଯାଇଛି । କିନ୍ତୁ ରମଣଙ୍କୁ କାହିଁକି ଷ୍ଟାର ପ୍ରଚାରକ ତାଲିକାରୁ ବାଦ ଦିଆଗଲା ତାହାକୁ ନେଇ ଏବେ ରାଜନିତିକ ମହଲରେ ଆରମ୍ଭ ହୋଇଛି ଚର୍ଚ୍ଚା । ବିଜେପୁର ପାଇଁ ଦଳର ରାଷ୍ଟ୍ରୀୟ ସଭାପତି ଅମିତ ଶାହ ପ୍ରଚାରର ମଙ୍ଗ ଧରିବେ ବୋଲି ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଷ୍ଟାର ପ୍ରଚାର ତାଲିକା ପ୍ରକାଶ ପାଇବା ପୂର୍ବରୁ ରାଜ୍ୟ ବିଜେପି ନେତା ରମଣଙ୍କ ନାଁକୁ ହେଭିୱେଟ ତାଲିକାରେ ପ୍ରଥମରେ ରଖିଥିବା ବେଳେ ହଠାତ୍ ଏହି ସୂଚୀରେ ଏଭଳି ପରିବର୍ତ୍ତନ ଅନେକଙ୍କୁ ବିସ୍ମିତ କରିଛି । ଏପରିକି ରାଜ୍ୟ ବିଜେପି ମୁଖପାତ୍ର ସଜ୍ଜନ ଶର୍ମା ମଧ୍ୟ ରମଣ ଆସିବା ନେଇ ସ୍ୱଷ୍ଟ କରିଥିଲେ । କିନ୍ତୁ ହଠାତ୍ ଏମିତି କଣ ହେଲା ଯେ ରମଣଙ୍କୁ ବିଜେପୁରକୁ ଆସିବା ପାଇଁ ଡାକରା ମିଳିଲାନି । କଣ ରାଜ୍ୟ ବିଜେପିର ରମଣଙ୍କ ଉପରେ ଭରଷା ପାଇଲାନି । ପୂର୍ବରୁ ପଞ୍ଚାୟତ ନିର୍ବାଚନରେ ଦଳ ପାଇଁ ପ୍ରଚାର କରିଥିଲେ ରମଣ । ଆଉ ରମଣଙ୍କ ପ୍ରଚାର ଯୋଗୁଁ ଦଳ ସଫଳତା ମଧ୍ୟ ସାଉଁଟିଥିଲା । କିନ୍ତୁ ବିଜେପୁର ପାଇଁ ରାତି ଅଧିଆ ପ୍ରସ୍ତୁତ ହୋଇଥିବା ଷ୍ଟାର ପ୍ରଚାରକ ତାଲିକାରେ ରମଣଙ୍କୁ ବଏକଟ କରାଯିବା ଏବେ ଅନ୍ୟ ଦଳ ପାଇଁ ଚର୍ଚ୍ଚାର ଖୋରାକ ପାଲଟିଛି ।
ରମଣଙ୍କୁ ଷ୍ଟାର ପ୍ରଚାରକ ତାଲିକାର କାରଣ ଖୋଜୁ ଖୋଜୁ ମହାନଦୀ ବିବାଦ ପାଖରେ ଏହାର ଖିଅ ମିଳିଥିଲା । ମହାନଦୀ ବିବାଦ ଥମିନଥିବା ବେଳେ ବିଜେପୁରକୁ ରମଣଙ୍କୁ ଡାକିବା ବିଜେପି ପାଇଁ ବୁମେରାଂ ହୋଇପାରେ ବୋଲି ଚର୍ଚ୍ଚା ହେଉଛି । କାରଣ ଛତିଶଗଡ ମହାନଦୀର ଉପରପାଶ୍ୱର୍ରେ ବନ୍ଧ ନିର୍ମାଣ କରି ପାଣି ଅଟକାଇବା ଫଳରେ ଓଡ଼ିଶାର ଲକ୍ଷ ଲକ୍ଷ ହେକ୍ଟର ଚାଷଜମି ଏବେ ଜଳସେଚନରୁ ବଞ୍ଚିତ ହେଉଛି । ତେଣୁ ବନ୍ଧ ନିର୍ମାଣ ବନ୍ଦ କରିବା ପାଇଁ ରମଣ ସରକାରଙ୍କୁ ବାରମ୍ବାର ନବୀନ ସରକାର ନିବେଦନ କରିଛନ୍ତି । କିନ୍ତୁ ଛତିଶଗଡ ଓଡ଼ିଶାର ଏଭଳି ଦାବୀକୁ ନ ଶୁଣି ବନ୍ଧ ନିର୍ମାଣ କାର୍ଯ୍ୟ ଜାରି ରଖିଛି । ଯାହାକୁ ନେଇ ଓଡ଼ିଶା- ଛତିଶଗଡ ମଧ୍ୟରେ ଦୀର୍ଘଦିନରୁ ବିବାଦ ଲାଗି ରହିଛି । ଏପରିକି ଏହି ବିବାଦକୁ ସମାଧାନ କରିବା ପାଇଁ ସୁପ୍ରିମକୋର୍ଟ ଟ୍ରିବ୍ୟୁନାଲ ଗଠନ କରିବା ପାଇଁ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । କିନ୍ତୁ ଏସବୁ ପରେ ମଧ୍ୟ ସବୁ ଫଳ ଶୂନ । ତେଣୁ ଓଡ଼ିଶା ପାଇଁ ଏବେ ରମଣ ବାଗୀ ପାଲଟି ଯାଇଛନ୍ତି ।
ଏଭଳି ସ୍ଥଳେ ରମଣଙ୍କୁ ବିଜେପୁର ପାଇଁ ପ୍ରଚାର ମୈଦାନକୁ ଓହ୍ଲାଇବା ଦଳକୁ କ୍ଷତି ପହଞ୍ଚାଇବ ବୋଲି ବିଜେପି ଭାବୁଛି । କାରଣ ବିଜେପୁର ଏକ କୃଷି ପ୍ରବଣ ଅଞ୍ଚଳ । ଏଠାକାର ଅଧିକାଂଶ ଭୋଟର ଚାଷ ଉପରେ ନିର୍ଭରଶୀଳ । ଯେହେତୁ ମହାନଦୀ ବିବାଦ ପାଇଁ ରମଣଙ୍କୁ ବିଜେଡି ଚାଷୀ ବିରୋଧୀ ବୋଲି ଦର୍ଶାଇଛି ତେଣୁ ତାଙ୍କୁ ବିଜେପୁର ପ୍ରଚାର ମୈଦାନକୁ ଓହ୍ଲାଇ ଦଳ କୌଣସି ରିସ୍କ ନେବାକୁ ଚାହୁଁନାହିଁ ବୋଲି ଚର୍ଚ୍ଚା ହେଉଛି । ରମଣଙ୍କୁ ଷ୍ଟାର ପ୍ରଚାରକ ଲିଷ୍ଟରେ ସାମିଲ କରିଥିଲେ ବିଜେଡିକୁ ଏହା ଡବଲ ଫାଇଦା ଦେଇଥାନ୍ତା । ରମଣଙ୍କୁ ଚାଷୀ ବିରୋଧୀ ଚିତ୍ରଣ କରି ଚାଷୀଙ୍କ ଭୋଟ ହାତେଇବାରେ ସକ୍ଷମ ହୋଇଥାଆନ୍ତା ବିଜେଡି । ତେଣୁ ଏହାକୁ ଦୃଷ୍ଟିରେ ରଖି ବିଜେପି ରାଜନୀତିର ଚାଣକ୍ୟ ଅମିତ ଶାହା ବିଜେପୁର ପାଇଁ ଷ୍ଟ୍ରାଟେଜି ବଦଳାଇଛନ୍ତି । ଆଉ ନିଜେ ଧରିଛନ୍ତି ପ୍ରଚାରର ମଙ୍ଗ । ତେବେ ବିଜେପୁରରେ ଅମିତଙ୍କ ପ୍ରଭାବ ପଡିବ କି ନାହିଁ ତାହା ଆଗାମୀ ଦିନରେ ଜଣା ପଡିବ ।