ଗରିବଙ୍କ ଖାଦ୍ୟ ଥାଳି ସାଜିଛି ‘କମ୍ୟୁନିଟି ଫ୍ରିଜ’ ! ଭୋକିଲା ମଣିଷକୁ ଖାଦ୍ୟ ଦେବାପାଇଁ ଇଶାଙ୍କ ଭିନ୍ନ ପ୍ରୟାସ
ଚେନ୍ନାଇ : ଆଜି ବି ଆମ ଦେଶରେ ଅନେକ ଲୋକ ଭୋକ ଉପାସରେ ଦିନ କାଟନ୍ତି । ଭୋକିଲା ପେଟରେ ରାତିରେ ଶୋଇଯାନ୍ତି । ଖାଇବାକୁ ନପାଇବି ଅନେକ ମୃତ୍ୟୁମୁଖରେ ପଡନ୍ତି । ଏମିତି ଅନେକ ଉଦାହରଣ ଦେଖିବାକୁ ମିଳେ । ସମାଜର ଗରିବ ଓ ଅବହେଳିତ ଶ୍ରେଣୀୟ ଲୋକଙ୍କ ପାଇଁ ସରକାର ଅନେକ ସୁବିଧା ସୁଯୋଗ ଯୋଗାଇଥିଲେ ବି ତାହା ସମସ୍ତଙ୍କ ପାଖରେ ପହଁଚିପାରେନାହିଁ । ନିଜର ହକ୍ ପାଇଁ ଲଢେଇ କରିବାକୁ ତାଙ୍କ ପାଖରେ ସାମର୍ଥ ନଥାଏ । ଆଉ ଏହି ଗରିବ ଭୋକିଲା ମଣିଷଙ୍କର ଦୁଃଖ ପ୍ରଭାବିତ କରିଥାଏ ଅନେକ ଲୋକଙ୍କୁ । ଯେଉଁମାନଙ୍କ ପ୍ରାଣ ଏମାନଙ୍କ ପାଇଁ କାନ୍ଦିଉଠେ । ଆଉ ନିଜେ ଖାଇବା ପୂର୍ବରୁ ସେମାନଙ୍କ କଥା ମନେପଡେ । ସେଇ ମାନଙ୍କ ମଧ୍ୟରୁ ଜଣେ ହେଲେ ଇଶା ଫାତିମା ଜସ୍ମିନ୍ । ଚେନ୍ନାଇ ସହରର ଏହି ଯୁବତୀ ଜଣକ ଭୋକିଲା ଓ ଅସହାୟ ଲୋକମାନଙ୍କ ପାଇଁ ପେଟପୂରା ଗଣ୍ଡେ ଖାଇବାର ବନ୍ଦୋବସ୍ତ କରିଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ପେଶାରେ ଡାକ୍ତର ଥିବା ଇଶା ଚେନ୍ନାଇ ସହରରେ ଥିବା ଭୋକିଲା ଲୋକଙ୍କ ପାଇଁ ବସାଇଛନ୍ତି ଏକ କମ୍ୟୁନିଟି ଫ୍ରିଜ୍ । ଯାହା ଦ୍ୱାରା ଅନେକ ଗରିବ ଭୋକିଲା ଲୋକ ହେଉଛନ୍ତି ଉପକୃତ । ଇଶା ଚେନ୍ନାଇ ଆସିବା ପରେ ବେସନ୍ତ ନଗରରେ ରହୁଥିଲେ । ପ୍ରତିଦିନ ମେଡିକାଲକୁ ଯିବା ଆସିବା ସମୟରେ ସେ ଅନେକ ଅଭାବୀ ଓ ଅସହାୟ ଲୋକମାନଙ୍କୁ ଦେଖୁଥିଲେ । ଡ୍ୟୁଟି ସାରି ରାତିରେ ଫେରିବା ସମୟରେ ରାସ୍ତାରେ ଲୋକମାନଙ୍କୁ ଶୋଇଥିବା , ଦୋକାନ ଦୋକାନ ବୁଲି ଖାଦ୍ୟ ମାଗୁଥିବା ଲୋକମାନଙ୍କୁ ସେ ଦେଖୁଥିଲେ । ଯାହା ତାଙ୍କୁ ବହୁତ ଦୁଃଖ ଦେଇଥିଲା । ଲୋକଙ୍କର ଦୁଃଖକୁ ସେ ଅତି ପାଖରୁ ଦେଖିପାରିଥିଲେ । ଏମାନଙ୍କର ସମାଧାନ ପାଇଁ ମନରେ ତାଙ୍କର ଇଚ୍ଛା ସୃଷ୍ଟି ହେଲା । ଆଉ କେମିତି ଏହାକୁ ବାସ୍ତବିକ୍ ରୂପ ଦେବେ ଭାବିଲେ । ଶେଷରେ ମନରେ ଆସିଲା ‘କମ୍ୟୁନିଟି ଫ୍ରିଜ’ ବସାଇବାର ଧାରଣା ।
‘କମ୍ୟୁନିଟି ଫ୍ରିଜ’ ହେଲା ଏମିତି, ଯେଉଁ ଲୋକ ନିଜର ବଳକା ଖାଦ୍ୟ ଫୋପାଡି ଦେଉଥିଲେ । ସେମାନେ ଚାହିଁଲେ ଏହି ଭୋକିଲା ଗରିବ ଲୋକଙ୍କୁ ଖାଦ୍ୟ ଓ ପନିପରିବା ଦେଇପାରିବେ । ଆଉ ଏହି କମ୍ୟୁନିଟି ଫ୍ରିଜରେ ଆଣି ରଖିପାରିବେ । ଏହିଠାରୁ ଲୋକେ ନିଜର ଆବଶ୍ୟକ ଅନୁସାରେ ଖାଦ୍ୟ ନେଇପାରିବେ । ଏହିଭଳି ଏକ ଉନ୍ନତ ଚିନ୍ତା ମନରେ ଧାରଣ କରି ଇଶା ଆଗେଇଲେ । ଏହାକୁ କାର୍ଯ୍ୟକାରୀ କରିବାକୁ ତାଙ୍କୁ ଲାଗିଯାଇଥିଲା ୪ମାସ । ଶେଷରେ ବେସନ୍ତ ନଗର ଟେନିସ୍ କ୍ଲବ ନିକଟରେ ବସାଇଯାଇଥିଲା ଏହି କମ୍ୟୁନିଟି ଫ୍ରିଜ୍ । ଏବେ ଏହି ଫ୍ରିଜର ଚାହିଦା ବଢି ବଢି ଚାଲିଛି । ଯାହାର ନାମ ରଖାଯାଇଛି ‘ଆୟାମିଟ୍ଟୁ ଉନ୍ନ’ । ଏହି ତାମିଲ ଶବ୍ଦର ଅର୍ଥ ହେଉଛି ନିଜେ ଖାଇବା ପୂର୍ବରୁ ଅନ୍ୟ ଆବଶ୍ୟକ ଲୋକମାନଙ୍କୁ ବାଣ୍ଟନ୍ତୁ ।
ଇଶାଙ୍କର ଏହି ପ୍ରୟାସକୁ ଲୋକେ ଖୁବ୍ ପ୍ରଶଂସା କରିଥିଲେ । ଅନେକ ସ୍ଥାନୀୟ ଲୋକେ ଏଥିରେ ତାଙ୍କୁ ଖୁବ୍ ସହଯୋଗ କରିଥିଲେ । ଘରେ ବଳକା ପଡିଯାଉଥିବା ଖାଦ୍ୟ ହେଉ ବା ସଙ୍ଗେ ସଙ୍ଗେ ଖାଇବା ରୋଷେଇ କରି ଆଣି ଏହି ଫ୍ରିଜରେ ରଖିଥିଲେ । ଆଉ ସେଠାରୁ ଅଭାବୀ ଲୋକମାନେ ବିନା କୌଣସି ମୂଲ୍ୟ ଦେଇ ଖାଇବା ନେଇ ଯାଉଥିଲେ । ଏବେ ବି ଏହି ଧାରା ଜାରି ରହିଛି । ଏବେ ଏଥିରେ ଲୋକଙ୍କ ପାଇଁ ଆଉ କିଛି ସୁବିଧା ଯୋଡା ଯାଇଚି । ଏହି ଫ୍ରିଜ୍ ପାଖରେ ରହିଛି ଆଉ ଏକ ଷ୍ଟୋର୍ । ଏଥିରେ ଅଭାବୀ ଲୋକଙ୍କ ପାଇଁ ରଖାଯାଇଛି ଡ୍ରେସ୍ ଓ ଜୋତା । ଏଠାରେ ଲୋକେ ନିଜର କମ୍ ଦିନ ବ୍ୟବହୃତ କରିଥିବା ଜୋତା ଓ ପୋଷାକ ଆଣି ଅଭାବୀ ଲୋକଙ୍କ ପାଇଁ ରଖୁଛନ୍ତି । ଏହି ଫ୍ରିଜ୍ ଓ ଷ୍ଟୋର୍ କୁ ଜଗୁଛନ୍ତି ଜଣେ ସିକ୍ୟୁରିଟି ଗାର୍ଡ ।
ଆଜି ଇଶାଙ୍କର ଏହି ଅଭିନବ ପ୍ରୟାସ ଓ ପଦକ୍ଷେପ ପାଇଁ ତାଙ୍କୁ ମିଳିଛି ଅନେକ ପ୍ରଶଂସା । ଆଗାମୀ ଦିନରେ ଚେନ୍ନାଇର ଆଉ କିଛି ସ୍ଥାନରେ ଏପରି କମ୍ୟୁନୁଟି ଫ୍ରିଜ୍ ବସାଇବାର ଯୋଜନା କରୁଛନ୍ତି ଇଶା । ଦେଶର ଅନେକ ଯୁବକଯୁବତୀଙ୍କ ପାଇଁ ପ୍ରେରଣା ପାଲଟିଛନ୍ତି ଇଶା । ଡାକ୍ତରୀ ପେଶାରେ ଥାଇବି ସେ ଗରିବଗୁରୁବାଙ୍କ ପାଇଁ କରିଛନ୍ତି ଚିନ୍ତା । ଆଉ ଯାହା ତାଙ୍କର ଆତ୍ମାକୁ ଦେଇଛି ଖୁବ୍ ଶାନ୍ତି ବୋଲି ଇଶା କୁହନ୍ତି ।
(ସୌଜନ୍ୟ-ଇଣ୍ଡିଆଟାଇମ୍ସ)